The Everest Post Search

Author: The Everest Post

एम्बाप्पेको गोल्डेन बुटको सपना कायमै: अझै एउटा खेल बाँकी

Posted on by The Everest Post

स्पेनसँगको सेमिफाइनल हारले फ्रान्स र केलियन एम्बाप्पेको विश्वकप उचाल्ने सपना त चकनाचुर पार्‍यो, तर उनको अर्को एउटा ठूलो व्यक्तिगत सपना भने अझै जिवितै छ, त्यो हो दोस्रोपटक ‘गोल्डेन बुट’ जित्ने!

धेरैलाई लागेको थियो उनको जादु स्पेनसँगै सकियो, तर कहानी अझै बाँकी छ। फ्रान्सले शनिबार तेस्रो स्थानका लागि खेल्ने ‘प्ले-अफ’ म्याचमा गरिने गोलहरू पनि गोल्डेन बुटको दौडमा गणना हुन्छन्।

यसको अर्थ, उनीसँग अझै ९० मिनेटको समय बाँकी छ। उपाधि जित्न नसकेको झोक उनले शनिबारको खेलमा गोलको वर्षा गरेर फेर्न सक्छन्। यदि उनले आफ्नो जादुयी लय देखाउँदै विपक्षीको पोस्टमा पर्याप्त बल छिराउन सके भने, विश्वकपको ट्रफी नपाए पनि त्यो ‘सुनौलो जुत्ता’ भने उनकै पोल्टामा पर्न सक्छ।

विश्वकपको उपाधि गुमे पनि एम्बाप्पेको यो अन्तिम भिडन्त पक्कै पनि रोमाञ्चक हुनेछ। अब सबैको नजर शनिबारको खेलमा!

विश्वकप ६४ टोलीमा विस्तारित हुन सक्ने

Posted on by The Everest Post

एजेन्सी : फिफा अध्यक्ष जियानी इन्टफान्टिनोले ४८ टोलीलाई विश्वकपमा खेलाउने योजना सफल भएपछि अब, ६४ टोलीलाई खेलाउने योजना बुनेका छन् । विश्वकपको इतिहासमा पहिलोपटक ४८ टोलीलाई खेलाएको उत्तर अमेरिकामा जारी प्रतियोगिता सफल भइसकेको इन्फान्टिनोले बताए ।
यसबारे उनले हालै एक अन्तर्वार्तामा बताए – हामी विश्वकपपछि यस ६४ टोलीको विश्वकपबारे छलफल गर्नेछौं । विश्वकप आयोजना गरिरहँदा यो विश्वकै लागि हुनुपर्दछ । केवल यूरोप र दक्षिण अमेरिकालाई सोचेर अगाडि बढ्न सक्दैनौं । हाम्रो एउटै इच्छा छ कि विश्वकपमा सहभागिता हुने सपना देखिरहेका टोलीहरू पनि खेल्न सकोस् ।

फिफा अध्यक्ष इन्फान्टिनोले ४८ टोलीको विश्वकप कसरी सम्भव होला भनेर प्रश्न गरेको थियो । उनले बताए कि अहिले विश्वकप सफल भइसकेको छ । उनले ससाना टोलीलाई मौका दिनु पर्ने बताए । उनले बताए—विश्वभरि नै फुटबलको क्रेज रहेको छ । यसका लागि हामीले ससाना टोलीलाई पनि मौका दिनुपर्छ । यदि, यसो नगरेमा ती ससाना टोलीले प्रगति गर्न सक्दैनन् ।

इन्फान्टिनोले यस विश्वकप २०२६ मा नयाँ प्रयोग गरे । जसमा ३२ टोलीबाट ४८ टोलीलाई सहभागि गराए । यस विश्वकपमा अफ्रिकाबाट १० र एसियाबाट ९ टोलीले खेले । ३२ टोली गर्दा कतिपय खेल्न सक्ने टोली छनोट हुन सकेको थिएन । तर, ४८ टोली गर्दा एसिया र अफ्रिकाबाट सहभागि टोलीहरूको संख्या ह्वात्तै बढे ।

जारी विश्वकपमा अफ्रिकाले धेरै प्रगति गरेको पनि इन्फान्टिनोले बताए । उनले भने–गत विश्वकपमा अफ्रिकाबाट ५ टोलीले सहभागिता जनायो । यसपटक १० टोलीले सहभागिता जनाउँदा ९ टोलीले नकआउट चरणमा स्थान बनायो । यसले के देखाउँछ भने टोलीहरूलाई अवसर दिँदा उनीहरूले त्यो अवसर समाउन कोशिस गर्नेछन् । जति धेरै टोली भयो आम्दानी पनि दोब्बर तेब्बर हुने र फुटबल संघहरूलाई लाभ मिल्नेछ ।
६४ टोलीको संख्यामा विश्वकप अर्को संस्करण २०३० मै हुन सक्ने अड्कल काटिएको छ । तर, इन्फान्टिनोले यसबारे कुनै निर्णयमा पुग्न नसकेको बताए । २०३० को विश्वकप पनि तीन राष्ट्रमा आयोजना हुँदैंछ । जुन संस्करण युरोपका स्पेन र पोर्चुगल तथा अफ्रिकाको मोरक्कोमा आयोजना हुँदैछ ।

यसका साथै विश्वकप आयोजना भएको १ सय वर्ष हुने भएको हुँदा प्रारम्भिक तीन खेलहरू अर्जेन्टिना, उरुग्वे र पारग्वेमा संचालन गरिनेछ । विश्वकपको पहिलो संस्करण उरुग्वेमा सन् १९३० मा भएको थियो । पहिलो संस्करणको फाइनलमा उरुग्वेले अर्जेन्टिनालाई हराएर उपाधि जितेको थियो ।

कसले के के भने ?
यूईएफए अध्यक्ष एलेक्सान्डर सेफेरिनले ६४ टोलीको प्रस्तावलाई खारेज गर्दै भने कि यो खराब योजना हो । त्यस्तै एएफसीका अध्यक्ष शेख सलमान बीन इब्राहिम अल खलिफाले टोली बढाउँदा अव्यवस्थित र अलमल हुने बताए । यसैगरी कनकाकाफका अध्यक्ष भिक्टोर मोन्टाग्लीयानीले टोली बढाएर सुन्दर फुटबल ध्वस्त हुने बताए ।

 

सुदूरपश्चिम विश्वविद्यालयमा अध्ययन बिदा र जग्गाको छानबिन गर्न समिति गठन

Posted on by The Everest Post

काठमाडौं । सुदूरपश्चिम विश्वविद्यालयमा अध्ययन बिदाको दुरुपयोग र जग्गाबारे छानबिन गर्न समिति गठन गरिएको छ ।

कार्यकारी परिषद्ले अध्ययन बिदा दुरुपयोग सम्बन्धी छानबिन गरी प्रतिवेदन पेस गर्न प्रा. डा. राजेन्द्र प्रसाद भट्टको संयोजकत्वमा समिति गठन गरिएको छ ।

त्यसैगरी विश्वविद्यालय र आंगिक क्याम्पसहरूको नाममा रहेको/चलन भोगमा रहेको जग्गाको छानबिन गर्न प्राध्यापक यज्ञराज पाठकको संयोजकत्वमा समिति गठन गरिएको हो ।

विश्वविद्यालयका आंगिक क्याम्पसहरूले प्रदान गर्ने १० प्रतिशत छात्रवृत्तिलाई पारदर्शी बनाएर व्यवस्थापन गर्न व्यवस्थापन संकायका डीन केशवराज भट्टको संयोजकत्वमा कार्यविधि निर्मण गरिएको छ ।

सुदूरपश्चिम विश्वविद्यालयका मानविकी तथा सामाजिकशास्त्र केन्द्रीय विभाग, शिक्षाशास्त्र केन्द्रीय विभाग, सामान्य विज्ञान केन्द्रीय विभाग, कम्प्युटर विज्ञान तथा सूचना प्रविधि केन्द्रीय विभाग र कानून केन्द्रीय विभागका शैक्षिक एवम् प्रशासनिक भवनहरूको विद्युतीय बोलपत्र आह्वान पनि भएको छ ।

विश्वविद्यालयमा उपकुलपतिमा प्रा. डा. किशन दत्त भट्टले पदभार ग्रहण गरेपछि सुशासन, पारदर्शिता र संस्थागत सुधारलाई प्राथमिकता दिँदै निर्णय गरिएको विश्वविद्यालयले जनाएको छ ।

आज सुनको मूल्य प्रतितोला १२ सयले घट्यो

Posted on by The Everest Post

काठमाडौँ । स्थानीय बजारमा आज सुनचाँदीको मूल्य घटेको छ । सोमबारको तुलनामा सुन तोलामा रु एक हजार दुई सयले घटेको छ भने र चाँदीको मूल्य प्रतितोला रु १५ ले घटेको छ ।

नेपाल सुनचाँदी व्यवसायी महासङ्घका अनुसार आज छापावाल सुन प्रतितोला रु दुई लाख ८४ हजार र त्यति नै परिमाणको सेतो धातुको मूल्य प्रतितोला रु चार हजार ३६० कायम भएको छ ।

सोमबार छापावाल सुन प्रतितोला रु दुई लाख ८५ हजार दुई सय र त्यति नै परिमाणको सेतो धातुको मूल्य प्रतितोल रु चार हजार तीन सय ७५ प्रतितोला कायम भएको थियो ।

भौतिक विकासको पर्खाइमा डडेलधुराको पलगडी गाउँ

Posted on by The Everest Post

कञ्चनपुर: डडेलधुरा जिल्लाको परशुराम नगरपालिका–११ स्थित पलगडी गाउँ आज पनि विकासको मूल प्रवाहबाट टाढा छ। कञ्चनपुरसँग सीमा जोडिएको चुरे क्षेत्रको विकट पहाडी भागमा रहेको यो गाउँमा सडक, विद्युत्, स्वास्थ्य सेवा, खानेपानी र गुणस्तरीय शिक्षाजस्ता आधारभूत सुविधा अझै पुग्न सकेका छैनन्।

नेपालको संविधानले सुनिश्चित गरेका आधारभूत सेवासमेत सहज रूपमा नपाउँदा यहाँका बासिन्दा वर्षौंदेखि कठिन जीवन बिताउन बाध्य छन्। करिब ५० परिवार बसोबास गर्ने पलगडी गाउँमा अझै मोटर बाटो पुगेको छैन।

गाउँ पुग्ने एकमात्र माध्यम पैदल यात्रा हो। स्थानीयका अनुसार झलारी बजारबाट गाउँ पुग्न करिब छ घण्टा उकालो–ओरालो, खोला र जङ्गल पार गर्नुपर्छ। वर्षायाममा यो बाटो अझ जोखिमपूर्ण बन्छ। पहिरो, हिलो र चिप्लोका कारण यात्रा निकै कठिन हुन्छ। बाढीले पनि स्थानीयको दैनिक जीवन थप कष्टकर बनाउने गरेको छ। यो उनीहरूको नियमित दैनिकी जस्तै बनेको छ।

गाउँमा कोही बिरामी परेका अवस्थामा झन् कठिन हुन्छ। एम्बुलेन्स त परको कुरा, स्ट्रेचरसमेत पुग्न सक्दैन। त्यसैले बिरामीलाई डोको वा पिठ्युँमा बोकेर करिब छ घण्टा पैदल हिँडेर कञ्चनपुरको झलारी वा अन्य स्वास्थ्य संस्थासम्म लैजानुपर्छ। स्थानीय हरिश कुँवर भन्छन्, “गाउँसम्म सडक छैन। बिरामीलाई पिठ्युँमा बोकेर हिँडाउनुपर्छ। बाटोमै ज्यान जाने डर हुन्छ। अर्को विकल्प पनि छैन।”

शिक्षाको अवस्था पनि उस्तै चुनौतीपूर्ण छ। गाउँमा कक्षा ५ सम्म मात्रै पढाइ हुने विद्यालय छ। माध्यमिक शिक्षा पढ्न बालबालिकाले दैनिक चार घण्टासम्म पैदल हिँडेर आलितालको दोबाटा पुग्नुपर्छ। लामो यात्रा, वर्षायामको जोखिम र आर्थिक अभावका कारण धेरै विद्यार्थीले बीचमै पढाइ छाड्ने गरेका छन्।

गाउँमा आधारभूत स्वास्थ्य चौकी पनि छैन। सामान्य बिरामी हुँदा झारफुक वा घरेलु उपचारमै भरपर्नुपर्ने अवस्था छ। दैनिक उपभोगका सामग्री किन्न पनि पलगडीका बासिन्दा कञ्चनपुरको झलारी बजार जानुपर्छ। खाद्यान्न, लत्ताकपडा, औषधि र अन्य आवश्यक सामग्री पिठ्युँमा बोकेर गाउँ ल्याउनुपर्ने बाध्यता रहेको स्थानीय मोहनबहादुर ऐर बताउछन्।

उनी भन्छन्, “किनमेल गर्न झलारी पुग्नुपर्छ। सामान किनेर फेरि पिठ्युँमा बोकेर गाउँ ल्याउनुपर्छ। वर्षायाममा धारापानी खोलामा बाढी आउँछ। जोखिम छ भन्ने थाहा हुँदाहुँदै पनि घर पुग्न खोला तर्नैपर्छ।” उनका अनुसार धारापानी खोलामा पुल नहुँदा हरेक वर्ष स्थानीयले जोखिम मोल्नुपरेको छ । एउटै खोला तीन–चार ठाउँबाट तर्नुपर्ने अवस्था छ। तीन वर्षअघि गाउँकै एक जना स्थानीय खोला तर्ने क्रममा बगेर ज्यान गुमाएका थिए । त्यो घटना अझै गाउँलेको सम्झनामा ताजै छ। ऐर भन्छन्, “सडक र पुल बने हाम्रो जीवन धेरै सहज हुन्थ्यो। तर कहिले बन्ला भन्ने आशामै बसेका छौँ ।”

स्थानीय गीता कुँवरका अनुसार वर्षायाम सुरु भएपछि गाउँ बाहिर निस्कन पनि डर लाग्छ। उनी भन्छन्, “बाटोमा हिँड्दा कुनबेला पहिरो झर्छ, कुनबेला खोला बढ्छ भन्ने थाहा हुँदैन। सडक छैन, सुरक्षित बाटो छैन। हरेक यात्रा जोखिमपूर्ण हुन्छ।” कठिन भौगोलिक अवस्थाका बीच यहाँका अधिकांश परिवार बाख्रापालन र कृषिमा निर्भर छन्। केही युवा रोजगारीका लागि भारत तथा अन्य ठाउँमा मजदुरी गर्न जाने गरेका छन्। गाउँमा उत्पादन भएका खसीबोका बिक्री गरेर घरखर्च चलाउने परिवार पनि धेरै छन्। सडक नहुँदा स्थानीय उत्पादन बजारसम्म पु¥याउनसमेत समस्या हुने गरेको छ।

स्थानीय रतनबहादुर साउदका अनुसार गाउँमा बिजुली पुगेको छैन। त्यसैले सौर्य ऊर्जामा भर पर्नुपरेको छ। सञ्चार सेवा पनि कमजोर छ। मोबाइलको नेटवर्क कहिलेकाहीँ मात्र लाग्ने भएकाले आपतकालीन अवस्थामा सूचना आदानप्रदान गर्न कठिन हुन्छ। स्थानीयले पिठ्युँमा बोकेर विद्युत्का खम्बा गाउँसम्म पु¥याएका छन्। तर खम्बा गाड्ने र तार तान्ने काम अझै भएको छैन।

वर्षौंदेखि स्थानीयले सडक, पुल, स्वास्थ्य चौकी, माध्यमिक विद्यालय र विद्युत् विस्तारको माग गर्दै आएका छन्। तर त्यसमा खासै प्रगति हुन सकेको छैन। साउद भन्छन्, “पलगडीको विकासका लागि सबैभन्दा पहिले सडक चाहिन्छ। सडक पुगेपछि स्वास्थ्य सेवा, शिक्षा, विद्युत्, कृषि र बजारसँगको पहुँच आफैँ विस्तार हुन्छ।” विकासको उज्यालोबाट टाढा रहेको पलगडी गाउँ आज पनि सडक, पुल, स्वास्थ्य सेवा र गुणस्तरीय शिक्षाको पर्खाइमा छ।

सञ्चारमाध्यमलाई त्रसित पार्ने गतिविधिको निष्पक्ष छानबिन गर्न रास्वपाको माग

Posted on by The Everest Post

काठमाडौँ- राष्ट्रिय स्वतन्त्र पार्टी (रास्वपा) का महामन्त्री विपिन कुमार आचार्यले विभिन्न सञ्चारमाध्यमका कार्यालय बाहिर पहिचान नखुलेका सवारीसाधन शंकास्पद रूपमा राखिएको घटनाप्रति पार्टीको गम्भीर ध्यानाकर्षण भएको बताएका छन्।

सोमबार विज्ञप्तिमार्फत महामन्त्री आचार्यले आमसञ्चारमाध्यम र सञ्चारकर्मीलाई मनोवैज्ञानिक दबाबमा राख्ने उद्देश्यले गरिएका यस्ता गतिविधि लोकतान्त्रिक मूल्यमान्यताविपरीत रहेको उल्लेख गरेका छन्। उनले स्वतन्त्र र निर्भीक पत्रकारितामाथि कुनै पनि प्रकारको हस्तक्षेप स्वीकार्य नहुने बताए।

आचार्यले राज्यको चौथो अंगका रूपमा रहेको सञ्चार क्षेत्रको स्वतन्त्रता, नागरिकको सुसूचित हुन पाउने अधिकार तथा प्रेस स्वतन्त्रताको संरक्षणमा रास्वपा सदैव प्रतिबद्ध रहेको बताए। कुनै पनि बहानामा सञ्चार स्वतन्त्रता हनन गर्ने, सञ्चार गृहमा त्रासको वातावरण सिर्जना गर्ने तथा चौथो अंगलाई कमजोर पार्ने प्रयास अस्वीकार्य रहेको उनको भनाइ छ।

महामन्त्री आचार्यले स्वतन्त्र र भयरहित पत्रकारिता लोकतन्त्रको आधार भएकाले प्रेस क्षेत्रलाई त्रसित बनाउने उद्देश्यका सबै गतिविधिको रास्वपाले भर्त्सना गर्ने उल्लेख गरेका छन्। घटनाको तत्काल निष्पक्ष र सत्यतथ्य छानबिन गरी सञ्चारमाध्यम तथा सञ्चारकर्मीको भौतिक र मनोवैज्ञानिक सुरक्षा सुनिश्चित गर्न नेपाल सरकार, गृह मन्त्रालय र सम्बन्धित सुरक्षा निकायसँग माग गरेका छन्।

उनले घटनामा संलग्न जोसुकै भए पनि तत्काल पहिचान गरी कानुनबमोजिम कारबाही गर्न आग्रह गर्दै सञ्चारकर्मीलाई कुनै पनि दबाब वा त्रासमा नपरी सत्यतथ्यमा आधारित पत्रकारिता गर्न अपिल गरेका छन्।

सञ्चारकर्मी र सञ्चार गृहको सुरक्षा तथा पूर्ण प्रेस स्वतन्त्रताको पक्षमा रास्वपा सदैव दृढतापूर्वक उभिने प्रतिबद्धता पनि व्यक्त गरेका छन्।

नेप्से ३०.६० अंकले घट्यो

Posted on by The Everest Post

काठमाडौं– सेयर कारोबार मापक नेप्से परिसूचक सोमबार ३०.६० अंकले घटेको छ । अघिल्लो साताको अन्तिम कारोबार दिन शुक्रबार करिब १ अंकले घटेको नेप्सेमा सोमबार उच्च अंकको गिरावट भएको हो ।

अघिल्लो कारोबार दिनको तुलनामा सोमबार १.१७ प्रतिशतले घटेर समग्र नेप्से २५७०.१८ अंकमा ओर्लेर बन्द भएको हो । यसअघि ९ पुस २०८२ मा नेप्से २५८५.८७ अंकमा पुगेको थियो । सोमबार कारोबारमा आएकामध्ये २२ कम्पनीको सेयर मूल्य बढ्यो भने २४९ कम्पनीको घट्यो । तर, सो दिन ४ कम्पनीको मूल्य स्थिर रहेको छ ।

उक्त दिन कुल ५१ हजार २९५ पटकको कारोबारमा ४ करोड १७ लाख २५ हजार ३२३ कित्ता सेयर किनबेच भए । ती किनबेचमा ७ अर्ब ४६ करोड ८४ लाख रुपैयाँ बराबरको कारोबार भएको छ । अघिल्लो दिनको तुलनामा कारोबार रकम बढेको हो । गत शुक्रबार सेयर बजारमा ६ अर्ब ८६ करोड ७ लाख रुपैयाँ बराबरको कारोबार भएको थियो ।

सोमबार कारोबारमा आएका १३ उपसमूहमध्ये सबैको परिसूचक घटेपछि समग्र नेप्सेमा उच्च अंकको गिरावट भएको हो ।

मिडिया हाउसको गेटमा बेवारिसे गाडी पार्किङ कसले गर्‍यो ?

Posted on by The Everest Post

काठमाडौं । काठमाडौंमा तीनवटा सञ्चारगृहको कार्यालय अगाडि निजी नम्बर प्लेटका गाडी बेवारिसे अवस्थामा पार्क गरिएको पाइएको छ । अनलाइनखबर, हिमालय टेलिभिजन र कान्तिपुर मिडिया ग्रुपका कार्यालयको मूल गेट अवरोध हुने गरी निजी गाडी पार्क गरेर छाडिएका छन् ।

अनलाइनखबरको बुद्धनगरस्थित कार्यालयको गेटमै एउटा कार पार्क गरिएको । गाडी गेटमै राखिएकाले अन्य सवारीसाधन कार्यालय परिसरमा प्रवेश गर्न सकेका छैनन्। कार चालकको समेत अहिलेसम्म पहिचान हुन सकेको छैन।

जिल्ला प्रहरी परिसर काठमाडौंका प्रवक्ता एसपी पवनकुमार भट्टराईले घटनाबारे जानकारी प्राप्त भएपछि प्रहरी टोली परिचालन गरिएको बताएका छन् । उनका अनुसार गाडीका चालक तथा धनीको पहिचान गरी नियन्त्रणमा लिने प्रयास भइरहेको छ ।

कान्तिपुर मिडिया ग्रुप र हिमालय टेलिभिजनको कार्यालय अगाडि पनि बेवारिसे गाडी पार्क गरिएको छ ।

प्रधानमन्त्री बालेन शाह र रास्वपा सभापति रवि लामिछानेबीच छलफल

Posted on by The Everest Post

काठमाडौं । प्रधानमन्त्री बालेन शाह, लामा बैठकहरूमा सकभर बस्न खोज्दैनन् । तर रास्वपा सभापति रवि लामिछानेसँग आइतबार उनको चार घन्टा लगातार छलफल चल्यो ।

पार्टी उच्च स्रोतले आइतबार साँझ दिएको जानकारी अनुसार, प्रधानमन्त्री बालेनले सुकुमवासी समस्या हल हुने दिशामै रहे पनि कर्मचारीहरूको एउटा पंक्ति, अनि स्थानीय तहबाट पर्याप्त सहयोग नपाएको बताएका थिए । उनले समाधान गर्न बाँकी सुकुम्बासीबाट सुचीकरण लगायत काममा जतिसक्दो छिटो समन्वयमा सहयोग हुन्छ त्यति नै छिटो सरकारले प्रक्रिया अघि बढाउने भन्दै अलमलमा नपर्न आग्रह गरे ।

उनले रास्वपाभित्रै यस विषयलाई लिएर मतान्तर देखिन थालेकामा उल्टै सभापति लामिछानेको ध्यानाकर्षण गराएका थिए । तर सभापति लामिछानेले यो राजनीतिक भन्दा बढी मानवीय विषय भएकाले ढिलासुस्ती नहोस् भन्नेमात्र मनसाय रहेको बताए ।

अर्थमन्त्री स्वर्णिम वाग्लेलाई उद्योगी व्यवसायी तथा निर्माण व्यवसायीसँगका पछिल्ला दुई छलफलमा लगातार छुटाएका थिए, प्रधानमन्त्री बालेनले । निजी क्षेत्रजस्तो महत्त्वपूर्ण पक्षसँग सरकारको सय दिन पुगेलगत्तै बैठक राखेका बालेनले स्वर्णिमलाई छुटाउनु आफैंमा विषय बन्न पुगेको छ, रास्वपाभित्र ।

बजेट जारी गर्ने बेला करका दर हेरफेर लगायत विषयमा वाग्लेबाट त्रुटि भएको प्रधानमन्त्री टीमको बुझाइ छ । तर वाग्लेले भने प्राविधिक समस्याको स्वाभाविक र नियमसम्मत हल खोज्न छाडेर उल्टै प्रधानमन्त्री निकट केही व्यक्तिहरू आफूलाई नंग्याउन अघि सरेको आरोप लगाउँदै सभापति लामिछानेसँग गुनासो गरेका छन् ।

सभापति लामिछानेले यही सरोकार प्रधानमन्त्रीलाई राखेका हुन् । वाग्ले अनावश्यक कार्यक्रमहरुमा गएर समय बिताउने तथा सरोकार नभएका व्यक्तिहरुसँग भेट्न थालेको भन्दै प्रधानमन्त्री कार्यालयको टिम बिच्किएको सूचना प्राप्त छ । तर वाग्लेले भने यस्ता सूचना स्वयं प्रधानमन्त्री निकटले दिइरहेको गुनासो गरिरहेका छन् ।

बालेन र स्वर्णिमबीचको मतभेदबारे रास्वपाको उच्च पंक्ति केही दिनयता नै जानकार छ । आज पनि यसबारे खुलेर कुरा भएको पार्टी स्रोतले अनलाइनखबरसँग भन्यो ।

बालेनसँग विगतमा महानगरमा निकट भएर काम गरेका भूपदेवलाई नयाँ निर्वाचित कार्यसमितिमा महामन्त्रीमा मनोनीत गर्ने पूर्वयोजना थियो । बालेन निकट कुमार बेन लगायतले महाधिवेशनमा भूपदेवको भूमिकामाथि प्रश्न उठाएका छन् ।

भूपदेवले महाधिवेशनमा आफ्नो समूहको रुचीका पात्र नबोकेर विपिन आचार्यलाई महामन्त्रीमा सघाएको विषयले पार्टीपंक्ति पूरै तरंगित छ । भूपदेवले भने विपिन महामन्त्री नबनेको भए आफू समेत महामन्त्री बन्न नसकिने पक्का देखेर स्वाभाविक रुपमा विपिनलाई सघाएको, त्यसभन्दा अरू कुनै स्वार्थ नरहेको प्रष्टीकरण दिएका छन् । सभापति लामिछाने भूपदेवसँग सहमत देखिए पनि स्वयं बालेन टिम आश्वस्त बन्न सकेको छैन ।

बैठक स्रोत भन्छ, ‘यसबारेमा आज पनि कुरा भयो । सम्भवतः केही दिनमा परिणाम देखिन्छ होला । तर सभापतिजी जति खुला भएर छलफल गर्नुहुन्छ, अरूमा पनि त्यस्तै खुलापन आइदियो भने निर्णयमा पुग्न सजिलो हुन्छ भन्ने हाम्रो बुझाइ छ ।’

प्रधानमन्त्री बालेनले भने आफूलाई पार्टीको आन्तरिक मामिलामा धेरै नतान्न आग्रह गरेको बुझिएको छ । मनोनीत गर्ने अनुहारहरूबारे छिट्टै निर्णयमा पुग्न दुई नेता समझदारी गरेका छन् ।

तर बालेन निकटहरु भने भूपदेवसँग अनावश्यक इगो राखेर उनलाई महामन्त्री त के, केन्द्रीय सदस्य समेत बनाउन नहुने मत राखिरहेका छन् ।

 

साहित्यकार पाण्डेयको उपन्यास ‘श्रीमती’माथि समीक्षा

Posted on by The Everest Post

मेरिल्याण्ड, जुलाई १२
अन्तर्राष्ट्रिय साहित्य समाज अनेसासका वोर्ड अफ ट्रष्टिका उपाध्यक्ष , लेखक तथा साहित्यकार तीर्थराज पाण्डेयद्धारा लिखित उपन्यास ‘श्रीमती’ माथि समीक्षा गरिएको छ ।

शनिवार आयोजना गरिएको कार्यक्रममा सहभागी वक्ताहरुले ‘श्रीमती’ उपन्यासले समेटेको विविध सामाजिक,आर्थिक, मनोवैज्ञानिक पाटोको विश्लेषण गरे ।

२१३ औ भानु जयन्तीको अवसरमा स्टार स्कलर्स नेटवर्क अमेरिकाले आयोजना गरेको कार्यक्रममा साहित्यकार, लेखक, विश्लेषक र समालोचकहरुले श्रीमती उपन्यासले सामाजिक संरचनामा श्रीमतीको भूमिका माथि वहस सृजना गरेको वताए ।

100%xकार्यक्रमलाई सम्वोधन गर्दे मेरिल्याण्ड राज्यका राज्य सांसद तथा कवि,साहित्यकार डा हयारी भण्डारीले श्रीमती उपन्यासले  समेटेको विषयमा चर्चा गर्नु भयो ।

उहाँले उपन्यासले नेपाल र प्रवासको वहुआयामिक पाटोको बारेमा समेटेको बताउनुभयो ।

उपन्यासमा समेटिएका विभिन्न पात्रहरुले नेपालको सूदूर पश्चिमको जनजीवनलाई राम्रो सँग व्याख्या गरिएको छ, भण्डारीले पुस्तकमाथि टिप्पणी गर्दै भन्नुभयो, साथैं, उपन्यासमा स्थानीय भाषा,संस्कृतिको विषयमा समेत उपन्यासकारले लिपीवद्ध गरेका छन् ।

भण्डारीले उपन्यासले प्रवासमा वसेर जीवन यापन गरिरहेकाहरुको जन्मभूमिमा भोगिने भोगाई र त्यस पछि प्रवासमा समेत भोगिने भोगाईलाई श्रीमती र श्रीमानको सहकार्य मार्फत कसरी सफलता प्राप्त गर्न सकिन्छ भन्ने तथ्यलाई राम्रोसँग उजागर गरेको बताउनुभयो ।

कार्यक्रममा साहित्यकार तथा पत्रकार मधुकर अधिकारीले श्रीमती उपन्यासले धर्मशास्त्र र समाजशास्त्रले व्याख्या गरेका विषय वस्तुहरुलाई उपन्यासकारले केलाउने प्रयास गर्नु भएको छ ।

अधिकारीले पछिल्लो समयमा लेखिएका प्रवासको साहित्यमा साहित्यकार पाण्डेयको उपन्यास श्रीमती उत्कृष्ठ नमूना बनेको बताउनुभयो।

उहाँले उपन्यासकारले उपन्यासको मुख्य पात्र वितुर र धिमही मार्फत समाजको संरचनागत कार्यात्मकतालाई प्रष्ट पार्ने काम गरेको बताउनुभयो ।

मोर्गन स्टेट युनिभर्सिटीका प्राध्यापक कृष्ण विष्टले उपन्यासकार पाण्डेयले श्रीमती उपन्यास मार्फत समाजको संरचनामा श्रीमतीको भूमिका महत्वपूर्ण भएको प्रष्ट्याउनुभएको बताउदै उपन्यासले दक्षिण एशियाको साहित्य लेखनमा अग्रणी वन्न सक्ने विषय वस्तु समेटिएको दावी गर्नुभयो ।

कार्यक्रममा स्टार स्कलर्सका अध्यक्ष प्रा डा उत्तम गौली, डा. दीपक कोईराला, अनेसासका संस्थापक अध्यक्ष होमनाथ सुवेदीले उपन्यासका विविध पाटोको बारेमा चर्चा गर्नु भएको थियो ।

पुस्तकका लेखक तथा साहित्यकार तीर्थराज पाण्डेयले किताव प्रकाशनको बारृेमा विस्तत विवरण दिनु भएको थियो ।

अनेसास मेरिल्याण्ड च्याप्टरकी अध्यक्ष पूजा चन्द, अनेसास विओटीका महासचिव प्रकाश नेपाल, साहित्यकार सीता पाण्डे, डिसी च्याप्टरका अध्यक्ष नीलकण्ठ सुवेदी, पशुपति वञ्जाडे, दमन विक्रम शाह लगायतका व्यक्तित्वहरुले पुस्तक माथि टिप्पणी गर्नु भएको थियो ।

कार्यक्रममा दोश्रो पुस्ताका सलोना भण्डारी, प्रज्ज्वल श्रेष्ठ,स्वर्णिम त्रिपाठी,मलिना छन्त्याल र सहिसा छन्त्यालले पुस्तकको वारेमा चर्चा गरेका थिए ।

कार्यक्रममा साहित्यकार,लेखक,कवि तथा साहित्यका अनुरागीको वाक्लो उपस्थिति रहेको थियो ।

कार्यक्रम सफलताको लागि सहयोग गर्ने सबैलाई लेखक, प्रकाशन गृहलाई पाण्डेयले धन्यवाद दिनुभयो ।

साहित्यकार तीर्थराज पाण्डेयले लेख्नु भएको श्रीमती उपन्यास २२० पृष्ठको सामाजिक विषयमा लेखिएको उपन्यास हो । यसको मुख्य पात्र वितुर र धिमही नेपालको सूदूरपश्चिममा जन्मिएर हुर्किएर कोरिया,जापान हुँदै अमेरिका पुगेर वस्दा श्रीमान र श्रीमतिवीच पारस्परिक सम्वन्धले सफलता हासिल गरेको घटनाको व्याख्या गरिएको छ । उपन्यास विसं २०८३ मा प्रकाशित श्रीमति उपन्यास अमेरिकामा रहेको गैर नाफा मुलक संस्था स्टार स्कलर्सले प्रकाशन गरेको हो ।

अफ्रिकामा भानु जयन्तीमा कविता प्रतियोगिता, भट्टराई प्रथम

Posted on by The Everest Post

नैरोबी, केन्या ।

२१३ औं भानु जयन्तीको अवसरमा अन्तर्राष्ट्रिय नेपाली साहित्य समाज अफ्रिका महादेशीय च्याप्टरले अन्तर्राष्ट्रिय कविता प्रतियोगिता सम्पन्न गरेको छ ।
प्रतियोगितामा अमेरिकाकी जमुना भट्टराई प्रथम, सिन्धु पौडेल (नेपाल) द्वितीय, महेन्द्र भट्टराई (सेसेल्स) तृतीय भएका छन् ।

त्यस्तै कवि मधु घिमिरे (अमेरिका) र बिष्णुमाया कट्टेल (सिक्किम, भारत) ले सान्त्वना पुरस्कार प्राप्त गरेकी छन् । कार्यक्रममा उत्कृष्ट १० कविताहरू प्रतियोगी कविहरूले वाचन गरेका थिए ।

कार्यक्रममा अन्तर्राष्ट्रिय नेपाली साहित्य समाज अफ्रिका महादेशीय च्याप्टरका उपाध्यक्ष पासाङ गोपर्मा शेर्पाको अध्यक्षतामा अनेसासका केन्द्रीय अध्यक्ष सर्वज्ञ वाग्लेको प्रमुख आतिथ्य, विशेष अतिथि अनेसास केन्द्रीय सल्लाहकार हिक्मत थापा र महासचिव राजु सिटौला को उपस्थिति रहेको  थियो ।

कार्यक्रम अनेसास केन्द्रीय उपाध्यक्ष एवम् अनेसास अफ्रिकाका संस्थापक अध्यक्ष गणेश खड्काले संयोजन गरेका थिए ।

कार्यक्रममा प्रमुख अतिथि अनेसास केन्द्रीय अध्यक्ष सर्वज्ञ वाग्लेले अनेसास अफ्रिका च्याप्टरले किलिमन्जारो प्रकाशन र सम्पन्न गरेका अन्य राम्रा कामहरूको प्रशंसा गरे ।

विशेष अतिथि अनेसास सल्लाहकार हिक्मत थापाले अफ्रिका महादेशीय च्याप्टरको उन्नति प्रगतिमा अनेसास अफ्रिकाका सम्पूर्ण सदस्यहरूको उत्तिकै योगदान रहेको र आगामी दिनहरूमा नेपाली भाषा साहित्यका लागि अझ बढी योगदान गर्ने अपेक्षा रहेको बताए ।

अनेसास केन्द्रीय उपाध्यक्ष गणेश खड्काले च्याप्टर स्थापना कालदेखि हालसम्म गरिएका कार्यहरु कदापि भुल्न नहुने बताए ।

कार्यक्रममा अनेसासका केन्द्रिय महासचिव राजु सिटौला, प्रमुख निर्णायक वरिष्ठ कवि सुबिद गुरागाई एवम् निर्णायक मण्डल सदस्य राज आशातित लगायत कवि तथा साहित्यकारहरुको उपस्थिति रहेको थियो ।

महासचिव रामचन्द्र राईले सहजीकरण गरेको कार्यक्रममा सचिव भरत रिजाल स्वागत मन्तव्य व्यक्त गरेक थिए ।

प्रहरीले घर पुर्‍याएपछि दुर्गा प्रसाईंले भने – यो सरकार नेपालीको होइन

Posted on by The Everest Post

काठमाडौं । राजावादी अभियन्ता तथा मेडिकल व्यवसायी दुर्गा प्रसाईंलाई झापाबाट काठमाडौं फर्किने क्रममा आइतबार त्रिभुवन अन्तर्राष्ट्रिय विमानस्थलबाट प्रहरीले नियन्त्रणमा लिएर भक्तपुरस्थित निवास पुर्याएको छ ।

प्रसाईंले झापाबाट काठमाडौं आएलगत्तै सुकुम्बासी समस्या, आत्मदाहका घटना, गरिब तथा पीडित नागरिकको अवस्था लगायत समसामयिक राष्ट्रिय विषयमा विशेष सम्बोधन गर्ने कार्यक्रम रहेको बताएका थिए । तर, विमानस्थलमा अवतरण गरेलगत्तै काठमाडौं प्रहरी परिसरका प्रवक्ता प्रहरी उपरीक्षक (एसपी) पवन भट्टराईको टोलीले उनलाई नियन्त्रणमा लिएको थियो । त्यसपछि प्रहरीले आफ्नै सवारीसाधनमार्फत उनलाई भक्तपुरस्थित निवास पुर्‍याएर छाडेको जनाएको छ ।

घर पुगेलगत्तै आयोजित पत्रकार सम्मेलनमा प्रसाईंले मुलुकको वर्तमान सामाजिक तथा आर्थिक अवस्थाबारे सरकारको आलोचना गर्दै सर्वहारा वर्ग, घरबारविहीन नागरिक र आत्मदाहका घटनाप्रति सरकार गम्भीर नभएको आरोप लगाए ।

उनले भने, ‘सर्वहारा वर्ग, घरबारविहीन, जो सडकमा पुगेका छन् । यति मात्र होइन, शरीरमा पेट्रोल छर्काएर आत्मदाह गर्न थाले । जब घर विग्रिन्छ, तब त्यो स्थिति आउँछ । देशको हालत यही भएको छ । देश भनेको हरेक परिवार मिलेर बनेको हो । आज त्यो परिवार कसैको पनि घरमा छैन । यो सुरुवात मात्रै हो ।’

प्रसाईंले पछिल्लो ३५ वर्षमा राजनीतिक दलहरूले भ्रष्टाचार, शोषण तथा विभिन्न आर्थिक अनियमितता गरेको आरोपसमेत लगाए । ‘३५ वर्षसम्म दलहरूले एकलौटी शासन गरे, भ्रष्टाचार गरे, शोषण गरे । लघुवित्त पनि उनीहरूले नै चलाए, सहकारी पनि उनीहरूले नै चलाए, तस्करहरूसँग पार्टनरसिप पनि उनीहरूले नै गरे । यही कारण जनताले साथ दिएर यो नयाँ सरकार ल्याएका हुन्,’ उनले भने ।

उनले अहिलेको सरकारले जनताका अपेक्षाअनुसार काम गर्न नसकेको दाबी गर्दै सुकुम्बासी बस्ती हटाउने कार्यप्रति असन्तुष्टि व्यक्त गरे । ‘यो नयाँ सरकारले के गर्यो भने जसको भोट हो, उसैको घर भत्काइदियो । जसले भोट दियो, उसैका घर भत्काएर पानीमा डुब्छ भनेर उठाएर लगे, फेरि अन्तिममा पानीमै डुबाएर छोडे सुकुम्बासीहरूलाई,’ उनले भने ।

सवारी साधनमा लाग्ने जरिवानाको विषय उठाउँदै प्रसाईंले नेपालमा पूर्वाधार विकासभन्दा दण्डात्मक व्यवस्था बढी भएको टिप्पणी गरे । ‘विश्वका धेरै देशमा पहिले सडक बनाइन्छ, पूर्वाधार तयार गरिन्छ । त्यसपछि राम्रो सडक दिएका छौं, अब नियम उल्लंघन गर्न पाइँदैन भनेर जरिवाना गरिन्छ । तर, नेपालमा न पूर्वाधार छ, न बाटो राम्रो छ । अहिले चाहिँ आवश्यकताभन्दा बढी जरिवाना लगाइएको छ, जसलाई जोसुकैले पनि थेग्न सक्दैन,’ उनले भने ।

आत्मदाह गरेका गणेश नेपालीको परिवारलाई सरकारले राहत तथा सहयोग उपलब्ध गराउने घोषणा गरेको प्रसंग उल्लेख गर्दै प्रसाईंले त्यसप्रति पनि प्रश्न उठाए । ‘सरकारले अहिले गणेश नेपालीको परिवारलाई जागिर दिन्छौं, क्षतिपूर्ति दिन्छौं, बच्चा पढाइदिन्छौं भनेर भन्छ । तर बच्चाहरू पढाउनका लागि सबैले गणेश नेपाली नै हुनुपर्ने हो त ? नेपालीहरूले आत्मदाह गर्नुपर्ने हो त? घरबारविहीनहरूले अब त्यही गर्नुपर्ने हो त? ’ उनले प्रश्न गरे ।

उनले देशमा दैनिक २२ देखि २५ जना मानिस झुण्डिएर ज्यान गुमाइरहेको दाबी गर्दै सरकारले त्यसतर्फ ध्यान नदिएको आरोप लगाए । ‘किन यसतर्फ सरकारको आँखा पुग्दैन? यो सरकार हाम्रो सरकार होइन, नेपालीहरूको सरकार होइन । आज नेपालीले खोलाको डिलमा समेत बास पाएनन् । भोको पेट, पानीमा भिजेको छ । जाडोमा त्यो बच्चाको अवस्था कस्तो होला? कति हृदयविदारक कथा छ । यस्तो कथा अमेरिकाका निर्देशकहरूले भेट्टाए भने त्यसैमा फिल्म बनाएर ओस्कार पुरस्कार जित्न सक्थे,’ उनले भने ।

कीर्तिपुरको डुबानपछि खरिपाटी र बोडे सारिए बागमती किनारका सुकुमवासी

Posted on by The Everest Post

काठमाडौं। अविरल वर्षापछि कीर्तिपुर नगरपालिका-१० सुन्दरीघाटस्थित राधास्वामी सुकुमवासी होल्डिङ सेन्टर पूरै डुबानमा परेपछि त्यहाँ आश्रय लिइरहेका सुकुमवासीहरूलाई सरकारले भक्तपुरको खरिपाटी र बोडेमा स्थानान्तरण गरेको छ।

कीर्तिपुरको सेन्टरमा बाढी पसेर बिजोग भएपछि शनिबार र आइतबार बिहान गरेर दुई दिनको अवधिमा ३१ घरपरिवारका ८९ जनालाई खरिपाटीस्थित होल्डिङ सेन्टरमा सारिएको हो भने केही परिवारलाई भक्तपुरकै बोडेमा व्यवस्थापन गरिएको छ।

बागमती किनारका बस्तीहरू डुबानमा पर्ने भन्दै प्रधानमन्त्री बालेन्द्र शाह (बालेन) नेतृत्वको टोलीले गत वैशाख १२ गतेदेखि बल प्रयोग गरेर थापाथली लगायतका क्षेत्रबाट सुकुमवासीहरूलाई हटाएको थियो।

सुरुमा मात्र १५ दिनका लागि भन्दै होल्डिङ सेन्टरमा राखिएका उनीहरूलाई दुई महिना बित्दासमेत उचित व्यवस्थापन नगर्दा अहिले एकपछि अर्को गम्भीर संकट आइलागेको छ।

दुई दिनअघि मध्यरातमा अचानक होल्डिङ सेन्टरभित्र बाढी पसेपछि सुकुमवासीहरूका प्रायः सबै भौतिक सामग्री, घरायसी सामान, लत्ताकपडा र अत्यावश्यक वस्तुहरू भिजेर पूर्ण रूपमा नष्ट भएका छन्।

अचानक बाढी पसेका कारण धेरैले आफ्नो सामान सुरक्षित स्थानमा निकाल्ने मौका नै पाएनन्, जसले गर्दा उनीहरू अहिले एक सरो लुगाको भरमा मात्र बाँच्न बाध्य भएका छन्। होल्डिङ सेन्टर पूरै डुबानमा परिसकेपछि मात्र सुरक्षाकर्मीहरू उद्धारका लागि पुगेका थिए र उनीहरूले सुकुमवासीहरूलाई डुङ्गाको सहायताले सुरक्षित बाहिर निकालेका थिए।

सुरक्षा निकायका अनुसार होल्डिङ सेन्टरमा रहेका कुल १५४ जनामध्ये ५४ जनाको उद्धार गरी तत्कालका लागि त्रिभुवन विश्वविद्यालयस्थित स्मृति भवनमा सुरक्षित रूपमा स्थानान्तरण गरिएको थियो। त्यस्तै अन्य ६ जना आफ्ना आफन्त वा नजिकैको होस्टलमा बस्न गएका थिए भने बाँकी ९४ जनाले सुरुमा अन्यत्र जान मानेका थिएनन्।

अन्ततः सरकारले उद्धार गरिएका र समस्यामा परेका ती सुकुमवासीहरूलाई भक्तपुरका विभिन्न सेन्टरहरूमा स्थानान्तरण गरे पनि स्थायी विकल्प र उचित व्यवस्थापनको अभावमा उनीहरूको बिचल्ली कायमै रहेको छ।

दुर्गा प्रसाईंलाई नियन्त्रणमा लिएर घरमै पुर्‍याइदियो प्रहरीले

Posted on by The Everest Post

काठमाडौं । दुर्गा प्रसाईंलाई प्रहरीले नियन्त्रणमा लिएको छ । नियन्त्रणमा लिएर उनलाई विमानस्थलबाट निवाससम्म लगिएको छ ।

झापाबाट काठमाडौं आएका प्रसाईंलाई प्रहरीले विमानस्थलबाट नियन्त्रणमा लिएको हो ।

प्रसाईंले पत्रकार सम्मेलन गर्न लागेको सूचना पाएपछि प्रहरीले नियन्त्रणमा लिएको बताएको छ ।

काठमाडौंका एसपी पवन भट्टराईले विमानस्थलमा निषेधित क्षेत्रमा बोल्न खोजेकाले नियन्त्रणमा लिएर निवासमा पुर्‍याइएको बताए ।

“विमानस्थलभित्र जिल्ला सुरक्षा समितिले कुनै पनि किसिमको प्रदर्शन र भेला गर्न नपाइने निर्णय गरेको छ,” उनले भने,“त्यहीअनुसार त्यहाँ भेला गर्न नदिएको हुन सक्छ ।”

 

पूर्वी र मध्य नेपालमा आज र भोलि ठुलो वर्षाको सम्भावना

Posted on by The Everest Post

काठमाडाैं । पश्चिममा केन्द्रित रहेको मनसुनी वर्षा आज (आइतबार)बाट पूर्वी र मध्य नेपालमा सिफ्ट हुने देखिएको छ । जल तथा मौसम विज्ञान विभागका अनुसार दुई दिन कोशी, मधेश, बागमती र गण्डकी तथा लुम्बिनीका पूर्वी क्षेत्रकेन्द्रित वर्षाको सम्भावना छ । त्यसमा पनि कोशी, मधेश, बागमती र गण्डकीका पहाडी भूभागमा अति भारी तथा तराईका केही स्थानमा भारी वर्षा हुन सक्ने चेतावनी दिइएको छ ।

मौसमविद् रोजन लामिछानेले लुम्बिनीका पश्चिमी भूभागसँगै कर्णाली र सुदूरपश्चिममा तुलनात्मक रूपमा कम पानी पर्ने देखिएको बताए । ‘पानी त देशभर पर्छ, तर मनसुनको न्यूनचापीय रेखा पूर्वमा नेपालको तराई नजिक आउँदै छ । यसले आइतबारबाट पूर्वी र मध्य नेपालमा अलि बढी पानी पर्ने देखिन्छ,’ उनले भने, ‘मधेशमा पनि पानी पर्छ । त्यहाँका केही ठाउँमा ठुलो पानी पर्ने सम्भावना छ ।’

विभागका अनुसार आइतबार कोशी, मधेश, बागमती र गण्डकी प्रदेशका तराईका धेरै स्थान तथा लुम्बिनी र सुदूरपश्चिमका केही स्थानमा मध्यम वर्षा हुनेछ । तर, मधेश प्रदेशसहित कोशी, बागमती, गण्डकी र लुम्बिनी प्रदेशका पहाडी तथा तराईका एक–दुई स्थानमा ठुलो वर्षाको सम्भावना पनि छ ।

विभागले वर्षाका कारण नदी तथा खोलामा पानीको सतह बढ्न सक्ने, बाढी, पहिरो र डुबानको जोखिम रहने भएकाले उच्च सतर्कता अपनाउन तथा आवश्यक सावधानीका साथ यात्रा गर्न आग्रह गरेको छ ।

गृहमन्त्रीले महानगर प्रहरी प्रमुख र प्रमुख कार्यकारी अधिकृतलाई सोधपुछका लागि गृह मन्त्रालय बोलाए

Posted on by The Everest Post

काठमाडौं । गणेश नेपालीको आत्मदाह तथा मृत्यु प्रकरणमा गृह मन्त्रालयले घटनाबारे सोधपुछ र छानबिन प्रक्रिया अघि बढाएको छ। प्रत्यक्षदर्शीहरूले काठमाडौं महानगरपालिकाको नगर प्रहरीमाथि गम्भीर लापरबाहीको आरोप लगाएपछि गृहमन्त्री सुधन गुरुङले महानगर प्रहरी प्रमुख विष्णु जोशी र प्रमुख कार्यकारी अधिकृत सरोज गुरागाईंलाई आकस्मिक रूपमा गृह मन्त्रालयमा बोलाएका हुन्।

गृह मन्त्रालयले घटनाका क्रममा नगर प्रहरीको भूमिका, घटनापछिको व्यवस्थापन तथा जिम्मेवारीबारे जानकारी लिन उनीहरूलाई बोलाएको जनाएको छ। मन्त्रालयले घटनाका सबै पक्षबारे तथ्य संकलन गरी निष्पक्ष छानबिन गरिने र आवश्यक परे जिम्मेवारमाथि कानुनअनुसार कारबाही गरिने जनाएको छ।

गणेश नेपालीको आत्मदाह र त्यसपछिको मृत्यु प्रकरणलाई लिएर सार्वजनिक चासो बढिरहेको छ भने घटनामा नगर प्रहरीको भूमिकाबारे विभिन्न कोणबाट प्रश्न उठिरहेका छन्। मन्त्रालयको पछिल्लो कदमलाई घटनाको वास्तविकता उजागर गर्ने प्रयासका रूपमा हेरिएको छ।

निधनको चार महिनापछि इरानी पूर्व सर्वोच्च नेता खामेनीको अन्त्येष्टि

Posted on by The Everest Post

एजेन्सी : इरानका पूर्व सर्वोच्च नेता अली खामेनीलाई उनको निधन भएको चार महिनाभन्दा बढी समयपछि शुक्रबार उनको जन्मस्थान मशहदस्थित इमाम रेजा दरगाहमा दफन गरिएको छ। इरानी सरकारी सञ्चारमाध्यमहरुका अनुसार एक सातासम्म चलेको राष्ट्रिय श्रद्धाञ्जलि कार्यक्रमपछि एक पारिवारिक समारोहका बीच निजी रूपमा दफन प्रक्रिया सम्पन्न गरिएको हो।

राजधानी तेहरानबाट सुरु भएको शवयात्रा र श्रद्धाञ्जलि कार्यक्रममा लाखौँ इरानी नागरिक सहभागी भएका थिए। तेहरानपछि धार्मिक सहरहरू कोम, नजफ र कर्बलामा समेत विशाल शवयात्रा आयोजना गरिएको थियो। अन्तिम चरणमा अत्यधिक भीड नियन्त्रणबाहिर गएपछि उनको कफिनलाई हेलिकोप्टरमार्फत मशहदस्थित इमाम रेजा दरगाह पुर्‍याइएको अन्तर्राष्ट्रिय सञ्चारमाध्यमले जनाएका छन्।

शोकसभामा सहभागीहरूले इरानी राष्ट्रिय झण्डा, खामेनीका तस्बिर र विभिन्न राजनीतिक तथा धार्मिक नारासहित श्रद्धाञ्जलि व्यक्त गरेका थिए। शवयात्राका क्रममा केही स्थानमा अमेरिका र अमेरिकी राष्ट्रपति डोनाल्ड ट्रम्पविरुद्ध तीव्र नाराबाजीसमेत भएको थियो।

गणेश नेपालीको मृत्यु सम्बन्धी घटना अध्ययन गर्न छानविन समिति गठन

Posted on by The Everest Post

काठमाडौँ- गणेश नेपाली आत्मदाहको विषयलाई छानविन गर्न सरकारले पाँच सदस्यीय छानविन समिति गठन गरेको छ ।

सरकारले गणेश नेपाली घटना प्रकरण गर्न पाँच सदस्यीय छानविन समिति गठन गरेको गृहमन्त्री सुधन गुरुङले संसदलाई जनकारी दिनु भएको हो  ।

गृहमन्त्रीले यो घटनामा संघीय सरकार भन्दा पनि स्थानीय सरकारको भूमिका देखिएको भन्दै देशमा तीन तहका सरकार छन् भनेर बुझ्नुपर्ने बताउनुभयो ।

आज प्रतिनिधि सभामा जवाफ दिनुहुँदै  उहाँले सरकारको अथक प्रयासकाबीच गणेश नेपालीलाई बचाउन नसकेको भन्दै घटना प्रति दुख ब्यक्त गर्नुभयो ।

उहाँले संघमा आफ्नो सरकार भएपनि स्थानीय र प्रदेशमा आफ्नो सरकार नभएको भन्दै सरकार भएकाहरु उत्तिकै जिम्मेवार बन्नुपर्ने बताउनुभयो ।।

डिएसपी चौधरीलाई जिल्ला तानिएको भन्ने समाचार सत्य होइन : प्रहरी प्रवक्ता काफ्ले

Posted on by The Everest Post

काठमाडौँ : नेपाल प्रहरीका प्रवक्ता अबिनारायण काफ्लेले प्रहरी नायव उपरीक्षक (डिएसपी) प्रसन्नराज चौधरीलाई सोधपुछका लागि जिल्ला तानिएको भन्ने समाचार सही नभएको स्पष्ट पारेका छन्। कैलाली जिल्लामा कार्यरत डिएसपी चौधरीले हालै सार्वजनिक गरेको एक अभिव्यक्तिका कारण उनीमाथि कारबाही गरी जिल्ला तानिएको भनी सार्वजनिक भएको समाचारमा कुनै सत्यता नरहेको उनको भनाइ छ ।

प्रवक्ता काफ्लेले भने, “उहाँलाई कुनै कारबाही गरिएको छैन, न त उहाँ निलम्वनमा पर्नुभएको छ। नेपाल प्रहरी चेन अफ कमान्डअनुसार सञ्चालन हुने संस्था हो। यस विषयमा सम्बन्धित प्रदेशमार्फत मौखिक रूपमा जानकारी लिन मात्र खोजेका हौँ। कुनै औपचारिक वा लिखित कारबाही प्रक्रिया अघि बढाइएको छैन।”

प्रवक्ता काफ्लेले सरकारका कर्मचारीका रूपमा सार्वजनिक कार्यक्रममा बोल्दा पदको मर्यादा, व्यावसायिक आचरण र कानुनअनुसार प्रस्तुत हुनुपर्ने बताए। उनले भने, “विशेषगरी कुनै व्यक्तिको नाम लिएर अभिव्यक्ति दिँदा अझ बढी जिम्मेवार र संयमित हुनुपर्ने हुन्छ। विद्यार्थीसँगको कार्यक्रममा बोल्दा पनि शिष्ट र व्यावसायिक ढङ्गले प्रस्तुत हुनुपर्ने अपेक्षा रहन्छ। त्यसैले उहाँले कुन सन्दर्भमा के बोल्नुभएको हो भन्ने विषयमा सामान्य प्रशासनिक र व्यावसायिक रूपमा बुझ्न खोजेका हौँ।”

प्रवक्ता काफ्लेले यो जानकारी लिने नियमित प्रक्रिया मात्र रहेको स्पष्ट पार्दै यसलाई कारबाही वा अनुशासनको प्रक्रियाका रूपमा बुझ्नु उपयुक्त नहुने स्पष्ट पारे।

गणेश नेपालीको मृत्युबारे वीर अस्पतालले के भन्यो ?

Posted on by The Everest Post

काठमाडौं । वीर अस्पतालले त्रिपुरेश्वरस्थित राहदानी विभाग अगाडि आत्मदाह प्रयास गरेका मुगुको सोरु गाउँपालिका–१ निवासी २५ वर्षीय गणेश नेपालीको उपचारका क्रममा निधन भएको औपचारिक जानकारी दिएको छ।

वीर अस्पतालले शुक्रबार प्रेस विज्ञप्ति जारी गर्दै शरीरको करिब ५५ प्रतिशत भाग गम्भीर रूपमा जलेका (Severe Burn) नेपालीको शुक्रबार बिहान ११ः१९ बजे उपचारकै क्रममा मृत्यु भएको जनाएको हो।

अस्पतालका अनुसार बिहीबार आकस्मिक कक्षमा भर्ना गरिएपछि उनलाई तत्काल सघन उपचार कक्ष (आईसीयू) मा राखी मेकानिकल भेन्टिलेटरको सहायतामा चौबीसै घण्टा उपचार गरिएको थियो। प्लास्टिक सर्जरी, एनेस्थेसिया र क्रिटिकल केयर विभागका वरिष्ठ विशेषज्ञ चिकित्सक तथा नर्सिङ टोलीले उनको जीवन बचाउन सबै सम्भव प्रयास गरेको वीर अस्पतालको भनाइ छ ।

उच्चस्तरीय उपचारका लागि विदेश लैजाने तयारीसमेत भइरहेका बेला स्वास्थ्य अवस्थामा अचानक गम्भिर जटिलता देखिएपछि चिकित्सकहरूले तत्काल कार्डियोपल्मोनरी रिससिटेसन (सीपीआर) तथा अन्य जीवनरक्षक उपचार गरेका थिए। तर निरन्तरको प्रयासका बाबजुद उनको स्वास्थ्यमा सुधार आउन नसकेको अस्पतालले जनाएको छ।

 

इंग्ल्यान्डसँगको खेलअघि नर्वेको जर्सी युरोपभरि ‘आउट अफ स्टक’

Posted on by The Everest Post

काठमाडौं । फिफा विश्वकप २०२६ मा नर्वेको ऐतिहासिक प्रदर्शनसँगै राष्ट्रिय टोलीको जर्सीको माग अप्रत्याशित रूपमा बढेको छ ।

इंग्ल्यान्डविरुद्धको क्वार्टरफाइनल खेलअघि युरोपभर आधिकारिक विक्रेतासँग नर्वेको जर्सी सकिएको छ भने समर्थकहरू रातभर लाइन बसेर जर्सी किन्न बाध्य भएका छन् ।

नर्वे फुटबल संघ (एनएफएफ) ले जर्सीको मागलाई निकै कम आँकेको स्वीकार गरेको छ । मार्चमा नयाँ जर्सी सार्वजनिक भएयता नाइकसहित अधिकांश आधिकारिक विक्रेतामा जर्सी लगातार बिक्री भएर सकिएको संघले जनाएको छ ।

स्टार स्ट्राइकर एर्लिङ हालान्डको उत्कृष्ट प्रदर्शन र ब्राजिलमाथिको ऐतिहासिक जितपछि जर्सीको माग झन् ह्वात्तै बढेको हो । नयाँ जर्सी बिक्रीमा आउनासाथ केही मिनेटमै सकिने अवस्था रहेको बताइएको छ ।

एनएफएफका व्यावसायिक निर्देशक रुनार पाहर आन्द्रेसेनका अनुसार यस वर्ष खुद्रा विक्रेताहरूले करिब दुई लाख ५० हजार जर्सी अर्डर गरेका छन् । गत वर्ष सोही अवधिमा यो संख्या करिब ५० हजार मात्र थियो ।

उनले समर्थकको माग अनुमानभन्दा निकै माथि पुगेको भन्दै विश्वकप चलिरहेको बेला उत्पादन उल्लेखनीय रूपमा बढाउन कठिन हुने बताए ।

ओस्लोस्थित प्रसिद्ध खेल सामग्री पसल टोर्सहोभ स्पोर्ट मा मंगलबार नयाँ जर्सी आइपुग्ने खबरसँगै बुधबार बिहानैदेखि सयौँ समर्थक लाइनमा बसेका थिए । स्थानीय सञ्चारमाध्यमका अनुसार लाइन करिब ६ सय मिटर लामो थियो। कतिपय समर्थकले १२ घण्टासम्म कुर्सी बोकेर पालो कुर्दै बसेका थिए ।

पसलका प्रबन्धक आन्डर्स लिलेबेर्गले आफूले यति उत्साह यसअघि कहिल्यै नदेखेको बताए । उनले भने, ‘म धेरै वर्षदेखि यहाँ काम गरिरहेको छु, तर यस्तो माहोल पहिले कहिल्यै देखेको थिइनँ। यो साँच्चिकै अविश्वसनीय छ ।’

हाल पसलले अर्को चरणमा आउने जर्सीका लागि नाम दर्ता गर्न थालेको छ । तर सबैले इंग्ल्यान्डविरुद्धको क्वार्टरफाइनलअघि जर्सी पाउने सुनिश्चितता भने छैन ।

जर्सीको अभावसँगै पुनःबिक्री बजारमा यसको मूल्य पनि आकासिएको छ । आधिकारिक रूपमा ८९.९९ पाउन्डमा बिक्री भएको घरेलु जर्सी अहिले केही पुनःबिक्री वेबसाइटमा ३५५ पाउन्डसम्म पुगेको छ । त्यस्तै अवे जर्सी २३१ पाउन्डभन्दा बढीमा बिक्री भइरहेको छ ।

एनएफएफका अनुसार राष्ट्रिय टोलीको जर्सी बिक्रीबाट यस वर्ष अहिलेसम्मकै सबैभन्दा धेरै आम्दानी भएको छ ।

नर्वेले यस विश्वकपमा इराक, सेनेगल, आइभरी कोस्ट र पाँच पटकको विश्वविजेता ब्राजिललाई पराजित गर्दै पहिलो पटक विश्वकपको क्वार्टरफाइनलमा स्थान बनाएको हो ।

अब नर्वेले आइतबार इंग्ल्यान्डसँग सेमिफाइनल प्रवेशका लागि प्रतिस्पर्धा गर्नेछ ।

शरीरमा आगो लगाएका गणेश नेपालीको उपचारका क्रममा निधन

Posted on by The Everest Post

काठमाडौं । हिजो त्रिपुरेश्वरस्थित राहदानी विभाग अगाडि आफ्नै शरीरमा आगो लगाएका मुगुका गणेश नेपालीको निधन भएको छ ।

वीर अस्पतालमा भेन्टिलेटरमा उपचाररत् नेपालीको अहिले बिहान ११:२० मा निधन भएको काठमाडौं प्रहरी प्रवक्ता एसपी पवन भट्टराईले  बताए ।

राति उनलाई भारत उपचारका लागि लाने तयारी गरिएकोमा स्वास्थ्य झन् जटिल बनेको भन्दै चिकित्सकले अस्थिर अवस्थामा नलैजान सुझाएपछि रोकिएको थियो ।

वीर अस्पतालका चिकित्सकले नेपालीको पहिलो शल्यक्रिया भए पनि अवस्थामा सुधार नआएको बताएका थिए ।

नेपालीको अनुहार, टाउको, घाँटी छाती जलेकाले अवस्था क्रिटिकल भएको डाक्टरले बताएका थिए । शरीरको भित्री अंगहरूमा पनि असर पुगेको उनीहरूको भनाइ थियो ।

कैलालीमा १६ वर्षीया किशोरीमाथि करणी गरेको आरोपमा युवक पक्राउ

Posted on by The Everest Post

धनगढी : कैलालीमा १६ वर्षीया किशोरीमाथि जबरजस्ती करणी गरेको आरोपमा एक युवक पक्राउ परेका छन्।

पक्राउ पर्नेमा बर्दगोरिया गाउँपालिका–६ जगतपुर निवासी २३ वर्षीय समिर डगौरा रहेका छन्। बालिकामाथि जबरजस्ती करणी गरेको भन्ने उजुरीका आधारमा इलाका प्रहरी कार्यालय भजनीबाट खटिएको टोलीले बिहीबार उनलाई पक्राउ गरेको जनाइएको छ।

घटनाबारे आवश्यक अनुसन्धान भइरहेको प्रहरीले जनाएको छ।

गणेश नेपालीको स्वास्थ्यबारे वीर अस्पतालले भन्यो– अझै पनि केही भन्न सक्ने अवस्था छैन

Posted on by The Everest Post

काठमाडौँ। वीर अस्पतालले आत्मदाहको प्रयास गरेका मुगुको सोरु गाउँपालिका– १, का २५ वर्षीय गणेश नेपालीको स्वास्थ्य अवस्थाबारे जानकारी दिएको छ।

करिब ५५ प्रतिशत शरीर जलेका उनको वीर अस्पतालको बर्न सेन्टरमा मेकानिकल भेन्टिलेटरमा राखेर उपचार भइरहेको छ।

नेपालीको स्वास्थ्य अवस्थाबारे जानकारी दिन वीर अस्पतालले शुक्रबार बिहान आयोजना गरेको पत्रकार सम्मेलनमा विशेषज्ञ टोली २४ सै घण्टा उपचारमा खटिएको जनाएको छ।

गणेशको अवस्थाबारे अहिले नै ठोस रूपमा भन्न नसकिने र कुनै पनि समयमा अवस्था बिग्रन सक्ने पनि अस्पतालको भनाइ छ। ‘अवस्था अझै पनि हामीले केही भन्न सक्ने अवस्थामा छैन,’ अस्पतालको भनाइ छ, ‘कुनै पनि समयमा उहाँको अवस्था बिग्रन सक्छ। https://nepalnews.com/2026/07/10/bir-hospital-says-it-is-still-too-early-to-say-anything-about-ganesh-nepalis-health/

रक्षा बम भन्छिन्- गणेश नेपाली जेनजी आन्दोलनकारी हो, तिमीहरूको शासनमा मृत्युसँग जुधिरहेको छ

Posted on by The Everest Post

काठमाडौं । त्रिपुरेश्वरस्थित राहदानी विभागअगाडि आत्मदाहको प्रयास गरेका गणेश नेपाली जेन-जी आन्दोलनमा सक्रिय सहभागी भएको खुलेको छ । नागरिक आन्दोलनमा सक्रिय अभियन्ता रक्षा बमले सामाजिक सञ्जालमार्फत गणेशले आन्दोलनमा भाग लिएर घाइते समेत बनेको बताएकी छन् ।

उनी लेख्छिन्, ‘गणेश नेपाली जेन-जी आन्दोलनमा सहभागी थिए । आन्दोलनका क्रममा उनको हातमा सामान्य चोट पनि लागेको रहेछ । उनी त्यही आन्दोलनकारी हुन्, जो आफू बाँच्न लायक देश होस् भनेर त्यो दिन सडकमा ओर्लिएका थिए ।’

हिजो तिनै युवाहरूले गरेको संघर्षको जगमा आज शासन चलिरहेको तर तिनै युवाहरू राज्यको संवेदनहीनताका कारण अस्पतालको शय्यामा पुगेको उनले टिप्पणी गरेकी छिन् ।

बम थप्छिन् ‘आज त्यही संघर्षका कारण तिमीहरू सत्ता र शक्तिमा छौ, तर उ तिमीहरूको शासनमा अस्पतालको शय्यामा मृत्यु र जीवनबीच जुधिरहेको छ ।’

सरकारले भुइँतहका मानिसहरूमाथि त्रास फैलाएको र उनीहरूको आर्थिक अवस्थालाई नजरअन्दाज गरेको बमको आरोप छ । दुई-तिहाइको दम्भले गरिब जनताको पीडा नबुझेको उल्लेख गर्दै उनले भनेकी छिन्, ‘दुईतिहाइको मातले जे पनि गर्न सकिन्छ भनेर तिमीहरूले भुइँतहका मानिसहरूमाथि त्रासमाथि त्रास थोपर्दै आइरहेका छौँ ।’

विशेष गरी ट्राफिक नियम र पार्किङका नाममा लिइने चर्को जरिवानाप्रति उनले गम्भीर प्रश्न उठाएकी छिन् ।

‘ट्राफिक नियम उल्लङ्घन गर्दा हजारौँ/लाखौँ जरिवाना तिर्नुपर्ने व्यवस्था तिमीहरूले आफ्नै आर्थिक हैसियतअनुसार ल्याउँदै छौ । तर, तिमीहरूलाई याद रहोस्, यो देश १,००० रूपैयाँ जरिवाना तिर्न नसकेर आत्मदाह गर्न बाध्य हुने मानिसहरूको देश हो,’ बमले चेतावनीपूर्ण भाषामा भनेकी छिन् ।

निर्माण क्षेत्रका समस्या समाधान गर्न सरकार सकारात्मक छ : प्रधानमन्त्री शाह

Posted on by The Everest Post

काठ्माण्डौ- प्रधानमन्त्री बालेन्द्र शाहले निर्माण क्षेत्रका समस्या, यसको प्रवर्द्धन, भौतिक पूर्वाधार विकास, लगानी वातावरण तथा आर्थिक सुधारका सम्बन्धमा आज निर्माण–व्यवसायीसँग छलफल गरेका छन्।

प्रधानमन्त्री तथा मन्त्रिपरिषद्को कार्यालयमा नेपाल निर्माण व्यवसायी महासङ्घका पदाधिकारीसँग भएको छलफलमा प्रधानमन्त्री शाहले निर्माण क्षेत्र मुलुकको आर्थिक विकास, रोजगारी सिर्जना र पूर्वाधार निर्माणको महत्वपूर्ण आधार भएको उल्लेख गर्दै यस क्षेत्रका समस्याको समाधानका लागि सरकार सकारात्मक रहेको बताए।

प्रधानमन्त्रीले निर्माण व्यवसायलाई मर्यादित, पारदर्शी, जिम्मेवार र परिणाममुखी बनाउँदै विकास–निर्माणका कामलाई निर्धारित समयमाल सम्पन्न गर्न सबै पक्षको सक्रिय सहकार्य आवश्यक भएकामा जोड दिए।

छलफलमा नेपाल निर्माण व्यवसायी महासङ्घका अध्यक्ष निकोलश पाण्डे, वरिष्ठ उपाध्यक्ष मुकेश पन्त, महासचिव शिवहरि घिमिरे, बागमती प्रदेशका उपाध्यक्ष बालकृष्ण थापा तथा महासङ्घका पूर्वअध्यक्ष एवं सल्लाहकार जयराम लामिछाने सहभागी थिए।

उनीहरूले निर्माण क्षेत्रले भोग्दै आएका भुक्तानी, म्याद थप, ठेक्का व्यवस्थापन, समयमा आयोजना कार्यान्वयन, मूल्य समायोजन, बैंकिङ तथा लगानीसम्बन्धी चुनौतीबारे प्रधानमन्त्री शाहलाई जानकारी गराए। साथै, निर्माण उद्योगलाई चलायमान बनाउन सरकार र निजी क्षेत्रबीचको सहकार्यलाई अझ प्रभावकारी बनाउनुपर्ने बताए।

छलफलमा प्रधानमन्त्री तथा मन्त्रिपरिषद्को कार्यालयका प्रमुख सल्लाहकार कुमार व्यञ्जनकार, सूचना तथा सञ्चार प्रविधि सल्लाहकार विवेक मिश्र तथा प्रमुख स्वकीय सचिव सुवास शर्मा सहभागी थिए।

सरकारले एकदिनमै गर्‍यो १७ अर्ब बढी भुक्तानी

Posted on by The Everest Post

काठमाडौं । चालु आर्थिक वर्ष अन्तिम साता प्रवेश गर्नै लाग्दा सरकारले भुक्तानीको गति ह्वात्तै बढाएको छ ।

बुधबार एकदिनमै १७ अर्ब ९ करोड रुपैयाँ बराबर भुक्तानी भएको महालेखा नियन्त्रकको कार्यालयको तथ्यांकबाट देखिएको छ । कानुन अनुसार आज सरकारले गर्ने भुक्तानीको चेक काटिसक्नुपर्छ । सोहीकारण अहिले भुक्तानी प्रणालीमा जाम हुने समस्या आएको छ ।

स्थानीय तहले सञ्चालन गर्ने सूत्र प्रणालीमा देशैभरि समस्या देखिएको छ । यस्तो समस्या भुक्तानी गर्ने अन्तिम दिन अझ बढी देखिने गर्छ । कार्यालयका अनुसार बुधबारसम्म कुल बजेट खर्च १५ खर्ब ३१ अर्ब ९७ करोड बराबर भएको छ ।

मंगलबार बजेट खर्च १५ खर्ब १४ अर्ब ८७ करोड बराबर थियो । पूँजीगत खर्च बुधबारसम्म लक्ष्यको ४० प्रतिशतमात्र छोएको छ । यस वर्ष कुल १ खर्ब ६३ अर्ब १७ करोड बराबर पूँजीगत खर्च भएको छ ।

सरकारले ४ खर्ब ७ अर्ब पूँजीगत खर्चको लक्ष्य राखेको छ । यस वर्ष कुल बजेट भने १९ खर्ब ६४ अर्बको कार्यान्वयन भइरहेको छ । राजस्व संकलन बुधबारसम्म लक्ष्यको ७८.१५ प्रतिशतमात्र भएको  छ ।

कुल १४ खर्ब ८० अर्बको लक्ष्य राखिएको राजस्वमा संकलन भने ११ खर्ब ५६ अर्बमात्र भएको छ ।

सभामुख अर्यालसँग भारतका राजदूत श्रीवास्तवको भेट

Posted on by The Everest Post

काठ्माण्डौ। सभामुख डोल प्रसाद (डीपी) अर्यालसँग नेपालका लागि भारतका राजदूत नवीन श्रीवास्तवले शिष्टाचार भेटवार्ता गेका छन्।

भेटका अवसरमा सभामुख अर्यालले नेपाली जनताको बलियो जनादेशबाट बनेको सरकारले आफ्नो कार्यकालको पहिलो १०० दिन पूरा गरेको उल्लेख गर्दै हालै सम्पन्न निर्वाचनका क्रममा भारत सरकारले उपलब्ध गराएको महहत्वपूर्ण लजिस्टिक सहयोगप्रति आभार व्यक्त गरे।

उनले नेपाल र भारतबीचको सम्बन्ध साझा सभ्यता, भौगोलिक निकटता, सांस्कृतिक तथा सामाजिक सम्बन्धमा आधारित रहेको उल्लेख गर्दै व्यापार, सुरक्षा, नागरिक उड्डयन, जलस्रोत तथा कनेक्टिभिटीलगायतका क्षेत्रमा रहेका विभिन्न द्विपक्षीय संयन्त्रमार्फत सम्बन्ध अझ सुदृढ हुँदै गएको बताए। उच्चस्तरीय भ्रमणको आदानप्रदानले दुई देशबीचको सम्बन्धलाई थप बलियो बनाएको उनको भनाइ थियो।

उनले नागरिक उड्डयन, रेल तथा बस सेवामार्फत कनेक्टिभिटी विस्तारले दुई देशबीचको सम्बन्धलाई थप मजबुत बनाउने उल्लेख गर्दै भविष्यमा थप उडान, रेल तथा बस रुट विस्तार हुने अपेक्षा व्यक्त गरे।

सभामुख अर्यालले भारतको लोकसभाका सभामुख ओम बिरलालाई नेपाल भ्रमणको निमन्त्रणा दिएको जानकारी दिँदै दुवै पक्षका लागि उपयुक्त समयमा उनलाई नेपालमा स्वागत गर्न तत्पर रहेको बताए।

उनले भारतको संसदलाई लोकतन्त्रको दृढ संरक्षकका रूपमा सधैँ उच्च सम्मानका साथ हेर्दै आएको उल्लेख गर्दै आफ्नो गौरवपूर्ण इतिहासमा भारतको संसदले लोकतान्त्रिक मूल्य र मान्यताको संरक्षणमा महत्वपूर्ण भूमिका निर्वाह गरेको बताए।

सभामुख अर्यालले नयाँ प्रतिनिधि सभाको गठनपछि माननीय बिपिन आचार्यको नेतृत्वमा १० सदस्यीय नेपाल–भारत संसदीय मैत्री समूह गठन गरिएको जानकारी दिँदै उक्त समूहले अन्तर–संसदीय सहयोगलाई नयाँ गति प्रदान गर्ने विश्वास व्यक्त गरे।

उनले संसदीय कूटनीतिले नेपाल–भारत द्विपक्षीय सम्बन्धलाई थप सुदृढ बनाउन महत्वपूर्ण भूमिका खेल्ने उल्लेख गर्दै यसले दुवै देशका सांसदहरूबीच आपसी समझदारी, अनुभव आदानप्रदान तथा एकअर्काका प्राथमिकता र आकांक्षाप्रति सम्मान अभिवृद्धि गर्ने बताए।

सभामुख अर्यालले भारतले संसदीय प्रक्रियाको प्रभावकारिता, पारदर्शिता र पहुँच अभिवृद्धिका लागि डिजिटल समाधान तथा ‘नेसनल ई–विधान एप्लिकेसन’ लगायतका प्रविधिमैत्री अभ्यास अवलम्बन गरेकोमा प्रशंसा व्यक्त गर्दै भारतको डिजिटल संसदीय प्रणाली, कागजरहित कार्यप्रणाली तथा प्रविधिमैत्री विधायी अभ्यासबाट ज्ञान आदान–प्रदानको अपेक्षा व्यक्त गरे।

उनले नेपालले भारतसँगको सम्बन्धलाई उच्च प्राथमिकतामा राख्दै आएको उल्लेख गर्दै नेपालको विकास प्रयासमा भारतको निरन्तर सद्भावना र सहयोग महत्वपूर्ण रहेको बताए। साथै, नेपाल र भारतले आपसी सहकार्य र साझेदारीमार्फत साझा शान्ति, समृद्धि र प्रगतिका निम्ति निरन्तर मिलेर कार्य गर्ने विश्वास व्यक्त गरे।

भेटमा राजदूत श्रीवास्तवले भारतका लोकसभाका सभामुख ओम बिरला नेपाल भ्रमणका लागि इच्छुक रहेको जानकारी गराउँदै नेपालका सभामुख तथा सांसदहरूलाई भारतको संसदीय अभ्यास अध्ययन तथा अवलोकनका लागि भारत भ्रमणको निमन्त्रणा दिएका थिए।

उनले संसदीय कूटनीति र उच्चस्तरीय राजनीतिक संवादले नेपाल–भारत सम्बन्धलाई थप उचाइमा पुर्याउन महत्वपूर्ण भूमिका खेल्ने विश्वास व्यक्त गर्दै व्यापार, कनेक्टिभिटी, ऊर्जा, शिक्षा तथा जन–जनबीचको सम्बन्ध विस्तारमा भारत सरकार निरन्तर सहकार्य गर्न प्रतिबद्ध रहेको बताए।

खोज्नुहोस