सञ्चारमाध्यमलाई त्रसित पार्ने गतिविधिको निष्पक्ष छानबिन गर्न रास्वपाको माग
काठमाडौँ- राष्ट्रिय स्वतन्त्र पार्टी (रास्वपा) का महामन्त्री विपिन कुमार आचार्यले विभिन्न सञ्चारमाध्यमका कार्यालय बाहिर पहिचान नखुलेका सवारीसाधन शंकास्पद रूपमा राखिएको घटनाप्रति पार्टीको गम्भीर ध्यानाकर्षण भएको बताएका छन्।
सोमबार विज्ञप्तिमार्फत महामन्त्री आचार्यले आमसञ्चारमाध्यम र सञ्चारकर्मीलाई मनोवैज्ञानिक दबाबमा राख्ने उद्देश्यले गरिएका यस्ता गतिविधि लोकतान्त्रिक मूल्यमान्यताविपरीत रहेको उल्लेख गरेका छन्। उनले स्वतन्त्र र निर्भीक पत्रकारितामाथि कुनै पनि प्रकारको हस्तक्षेप स्वीकार्य नहुने बताए।
आचार्यले राज्यको चौथो अंगका रूपमा रहेको सञ्चार क्षेत्रको स्वतन्त्रता, नागरिकको सुसूचित हुन पाउने अधिकार तथा प्रेस स्वतन्त्रताको संरक्षणमा रास्वपा सदैव प्रतिबद्ध रहेको बताए। कुनै पनि बहानामा सञ्चार स्वतन्त्रता हनन गर्ने, सञ्चार गृहमा त्रासको वातावरण सिर्जना गर्ने तथा चौथो अंगलाई कमजोर पार्ने प्रयास अस्वीकार्य रहेको उनको भनाइ छ।
उनले घटनामा संलग्न जोसुकै भए पनि तत्काल पहिचान गरी कानुनबमोजिम कारबाही गर्न आग्रह गर्दै सञ्चारकर्मीलाई कुनै पनि दबाब वा त्रासमा नपरी सत्यतथ्यमा आधारित पत्रकारिता गर्न अपिल गरेका छन्।
सञ्चारकर्मी र सञ्चार गृहको सुरक्षा तथा पूर्ण प्रेस स्वतन्त्रताको पक्षमा रास्वपा सदैव दृढतापूर्वक उभिने प्रतिबद्धता पनि व्यक्त गरेका छन्।
ट्रेन्डिङ
सम्बन्धित
