मिडिया हाउसको गेटमा बेवारिसे गाडी पार्किङ कसले गर्‍यो ?

काठमाडौं । काठमाडौंमा तीनवटा सञ्चारगृहको कार्यालय अगाडि निजी नम्बर प्लेटका गाडी बेवारिसे अवस्थामा पार्क गरिएको पाइएको छ । अनलाइनखबर, हिमालय टेलिभिजन र कान्तिपुर मिडिया ग्रुपका कार्यालयको मूल गेट अवरोध हुने गरी निजी गाडी पार्क गरेर छाडिएका छन् ।

अनलाइनखबरको बुद्धनगरस्थित कार्यालयको गेटमै एउटा कार पार्क गरिएको । गाडी गेटमै राखिएकाले अन्य सवारीसाधन कार्यालय परिसरमा प्रवेश गर्न सकेका छैनन्। कार चालकको समेत अहिलेसम्म पहिचान हुन सकेको छैन।

जिल्ला प्रहरी परिसर काठमाडौंका प्रवक्ता एसपी पवनकुमार भट्टराईले घटनाबारे जानकारी प्राप्त भएपछि प्रहरी टोली परिचालन गरिएको बताएका छन् । उनका अनुसार गाडीका चालक तथा धनीको पहिचान गरी नियन्त्रणमा लिने प्रयास भइरहेको छ ।

कान्तिपुर मिडिया ग्रुप र हिमालय टेलिभिजनको कार्यालय अगाडि पनि बेवारिसे गाडी पार्क गरिएको छ ।