स्पेन बन्यो विश्वकप बिजेता

न्यूयोर्क, १९ जुलाई । फिफा विश्वकप २०२६ को उपाधी स्पेनले जितेको छ ।

अमेरिकाको न्युयोर्कस्थित न्यु जर्सी स्टेडियममा सम्पन्न फाइनल खेलमा अर्जेन्टिनालाई शुन्यका विरुद्ध एक गोलले पराजित गर्दै स्पेनले विश्वकप जितेको हो ।

निर्धारित ९० मिनेटसम्म दुवै टोलीले गोल गर्न नसकेपछि खेल अतिरिक्त समयमा धकेलिएको थियो। स्पेनले अधिकांश समय खेलमा पकड जमाए पनि अर्जेन्टिनाको सुदृढ रक्षापङ्क्ति र गोलकिपरको उत्कृष्ट प्रदर्शनका कारण गोल गर्न संघर्ष गर्नुपरेको थियो।

खेलको १०६औँ मिनेटमा बेन्चबाट मैदान प्रवेश गरेका फेरान टोरेसले बायाँ खुट्टाले आकर्षक प्रहार गर्दै निर्णायक गोल गरे। त्यसपछि अर्जेन्टिनाले बराबरी गोलका लागि प्रयास गरे पनि सफल हुन सकेन।

अर्जेन्टिनाले खेलको इन्जुरी समयमा मिडफिल्डर एन्जो फर्नान्डेज दोस्रो पहेंलो कार्ड पाएपछि १० खेलाडीमा सीमित भएर खेल समाप्त गरेको थियो।

यस जितसँगै स्पेनले आफ्नो इतिहासमा दोस्रोपटक पुरुष विश्वकपको उपाधि जित्न सफल भएको छ। साथै स्पेन पुरुष र महिला दुवै विश्वकपको उपाधि एकै समयमा आफ्नो नाममा राख्ने पहिलो राष्ट्र बनेको छ।

अमेरिका, क्यानडा र मेक्सिकोले संयुक्त रूपमा आयोजना गरेको ४८ टोली सहभागी विश्वकपको यो पहिलो संस्करणमा कुल १०४ खेल खेलिए। प्रतियोगिताले सर्वाधिक ३०८ गोल भएको नयाँ कीर्तिमान पनि कायम गरेको छ।