Month: March 2026

काठमाडौं, २२ फागुन।

काठमाडौं क्षेत्र नम्बर ३ मा उज्यालो नेपाल पार्टीका अध्यक्ष कुलमान घिसिङले सुरुवाती अग्रता लिएका छन् ।

गोकर्णेश्वर नगरपालिका वडा नम्बर १ बाट सुरु भएको मतगणनामा उनले १ हजार ४१ मत प्राप्त गरेका छन् ।

कुलमानलाई रास्वपाका राजु पाण्डेले पछ्याएका छन् । काँग्रेस तेस्रोमा छ । एमाले चौथोमा ।  रास्वपाका राजुनाथ पाण्डेले ७४८ मत, नेपाली कांग्रेसका रमेश अर्यालले २९८ र नेकपा एमालेका रामेश्वर फुयालले भने २७९ मत प्राप्त गरेका छन् ।

काठमाण्डौं, २१ फागुन ।
काठमाडौं क्षेत्र नम्बर ४ मा मत गणना शुरु भएको छ ।

निर्वाचन आयोगका अनुसार बुढानीलकण्ठ नगरपालिका वडा नम्बर १ बाट काठमाण्डौं ४ को मतगणना सुरु भएको हो ।

सर्वदलीय बैठकको निर्णयपछि काठमाडौं ४ मा मतगणना सुरु भएको हो ।

काठमाडौं २१ फागुन।
काठमाडौं क्षेत्र नम्बर १ मा मतगणना शुरु भएको छ ।

काठमाडौंको बानेश्वरस्थित सहकारी प्रशिक्षण केन्द्रमा मतगणना सुरु भएको हो । निर्वाचन आयोगले मत गणना दुई स्थानबाट शुरु भएको जनाएको छ ।

बिहीबार राति १० बजेदेखि सुरु हुने भनिए पनि केहीबेर ढिलागरी मतगणना भएको हो ।

काठमाडौं निर्वाचन क्षेत्र १ मा कांग्रेसका प्रबल थापा क्षेत्री, एमालेका मोहनराज रेग्मी, नेपाली कम्युनिष्ट पार्टीका मेनुका भण्डारी, राष्ट्रिय स्वतन्त्र पार्टीका रञ्जु न्यौपाने, राष्ट्रिय प्रजातन्त्र पार्टीका रवीन्द्र मिश्र लगायत उम्मेदवार प्रतिस्पर्धामा छन् ।

काठमाडौं– नेपाली सेनाले अन्य सुरक्षा निकाय, स्थानीय प्रशासन, आमनागरिकसँगको सहयोग र समन्वयमा प्रतिनिधिसभा सदस्य निर्वाचन सुरक्षित रुपमा सम्पन्न भएको जनाएको छ ।

निर्वाचन सम्पन्न भएपछि नेपाली सेनाका प्रवक्ता एवं सहायक रथी राजाराम बस्नेतले एकीकृत निर्वाचन सुरक्षा योजनाअनुसारका तयारीले निर्वाचनलाई सुरक्षित रुपमा सम्पन्न गर्न सहयोग पुगेको बताए। ‘निर्वाचन सुरक्षाका लागि धनगढी, सुर्खेत, बुटवल, पोखरा, काठमाडौँ, हेटौँडा, बर्दिवास, इटहरी र विराटनगरमा १६ वटा जहाज तयारी अवस्थामा राखिएको थियो’, सैनिक प्रवक्ता बस्नेतले भने। आमनागरिकको सूचना र अन्य सुरक्षा निकायको सहयोगमा निर्वाचनलाई लक्षित गरी भएका शंकास्पद गतिविधिलाई समयमै सुरक्षित तवरमा निस्तेज तुल्याइएको उनको भनाइ छ ।

निर्वाचन स्वच्छ, निष्पक्ष र भयरहित वातावरणमा सम्पन्न गराउन सरकारले गत माघ २१ गतेदेखि निर्वाचनका लागि सेना परिचालित भएको थियो । निर्वाचन अवधिमा शंकास्पद वस्तु तथा विस्फोटक पदार्थलगायत ७१ वटा फेला परेका थिए । ती विस्फोटक पदार्थ प्रतिकार्यका लागि ८१६ वटा टोली परिचालित भएको थियो ।

निर्वाचनपूर्व र मतदानका दिन सुरक्षाका लागि तैनाथ गरिएको हेलिकोप्टर अब मतपेटिका ओसार्न प्रयोग गरिनेछ । निर्वाचन आयोगको योजनाका आधारमा दुर्गम क्षेत्रका मतदान केन्द्रबाट ती मतपेटिका सम्बन्धित निर्वाचन अधिकृतको कार्यालयमा हेलिकोप्टरमार्फत ल्याउने तयारी गरिएको छ ।

काठमाडौं– काठमाडौं आज भएको प्रतिनिधिसभा सदस्यको निर्वाचनमा देशैभरी झण्डै ६० प्रतिशत मत खसेको छ ।

निर्वाचन आयोगका कार्यवाहक प्रमुख आयुक्त रामप्रसाद भण्डारी पत्रकारसम्मेलनमार्फत सो जानकारी गराएका हुन् ।

उनले देशैभरी शान्तिपूर्ण रूपमा निर्वाचन सम्पन्न भएको पनि बताए ।

साथै, उनले आजबाटै मतगणना सुरु गरिने बताए ।

पोखरा। पूर्व शिक्षामन्त्री तथा म्याग्दीका प्रतिनिधि सभा सदस्य उम्मेदवार महाविर पुनले मत दिएनन् । एक महिनासम्म म्याग्दिका मतदातासँग मत मागेका उनले आफैले चाहिँ मत नदिएका हुन् ।

राष्ट्रिय आविष्कार केन्द्रका संस्थापक तथा वैज्ञानिक समेत रहेका उनले केही समयअघि मात्रै मतदाता नामावलीमा नाम लेखाएका थिए । उनले हालसम्म मतदान नै गरेका छैनन्।

मतदाता नामावली चितवनमा भएका कारण आफूले मत नदिएको पुनले बताए । ‘नागरिकता चितवनको छ । मतदाता नामावली पनि चितवनबाटै बनाइयो,’ उनले भने, ‘म्याग्दीमा अरु केही काम छैन । बसाई सराई यता ल्याइएन । अहिले पो समस्या पर्‍यो ।’ उनले शिक्षा मन्त्रीबाट राजीनामा दिएर स्वतन्त्र उम्मेद्वारी दिएका हुन् ।
प्रत्यक्ष नपाएपनि समानुपातिकमा मत दिन पाउने भ्रमले आफू अल्झिएको पुनको भनाई छ ।

‘मलाई समानुपातिकमा चाहिँ म्याग्दीबाटै मत हाल्न पाइन्छ भनेका थिए, त्यसैले म ढुक्क भएर बसेको थिएँ,’ उनले थपे, ‘अघि ४ बजे भोट हाल्न जान्छु भनेर तयारी गर्दा पो थाहा भयो, समानुपातिकमा पनि सम्बन्धित मतदान केन्द्रमै जानुपर्ने रहेछ ।’ उनको नागरिकता राप्ती नगरपालिकामा छ ।

ठट्यौली पारामा उनले भने, ‘अब हेलिकप्टरमा जाने कुरा आएन, नत्र गाडीमा गएर आउजाउ गर्न त अहिले सम्भव छैन ।’ मतदान गर्न नपाएकोमा आफूलाई खल्लो लागेको उनले बताएका छन्।

काठमाडौं- छिटपुट सामान्य घटनाबाहेक प्रतिनिधिसभा सदस्य निर्वाचनको मतदान आज देशभर शान्तिपूर्ण र उत्साहपूर्वक सम्पन्न भएको छ।

निर्वाचन आयोगद्वारा निर्धारित समयअनुसार बिहान ७ बजेदेखि सुरु भएको मतदान साँझ ५ बजे सम्पन्न भएको हो। आयोगका आयुक्त डा. जानकीकुमारी तुलाधरले मत दिने समय साँझ ५ बजेसम्म भए पनि मतदानस्थलको लाइनमा रहेर मत दिन बाँकी मतदाताले त्यसपछि पनि मतदान गर्नसक्ने बताइन्।

आयोगका अनुसार अहिलेसम्म कुनै पनि मतदान केन्द्रको मतदान औपचारिक रूपमा स्थगनको घोषणा भएको छैन। दोलखा, सर्लाही र रौतहटमा केहीबेर विवाद समाधान भएको थियो। केहीबेर मतदान स्थगनपछि दोलखाको तामाकोशी-४ स्थित मालु मतदानस्थलमा अहिले पनि मतदान जारी छ। मतदानको विस्तृत विवरणबारे आज साँझ ६:१५ बजे आयोगले पत्रकार सम्मेलन गरेर जानकारी गराउने जनाएको छ।

पहिलो हुने निर्वाचित हुने निर्वाचन प्रणाली (प्रत्यक्ष)तर्फ ६१ वटा निर्वाचन चिह्नमा ६५ वटा राजनीतिक दलले प्रतिस्पर्धामा छन्। प्रत्यक्षतर्फ तीन हजार १७ पुरुष, ३८८ महिला र एक अन्य गरी तीन हजार ४०६ उम्मेदवार चुनावी प्रतिस्पर्धामा छन्। सामानुपातिक निर्वाचन प्रणालीतर्फ एक हजार ३६३ पुरुष र एक हजार ७७२ महिला गरी तीन हजार १३५ उम्मेदवार प्रतिस्पर्धामा छन्। प्रत्यक्षतर्फ १६५ निर्वाचन क्षेत्र र समानुपातिकतर्फ ११० स्थानका लागि निर्वाचन भएको हो।

यस निर्वाचनमा ९६ लाख ६३ हजार ३५८ पुरुष, ९२ लाख ४० हजार १३१ महिला र २०० अन्य गरी एक करोड ८९ लाख तीन हजार ६८९ मतदाता छन्। निर्वाचनमा एक लाख ८६ हजार १४२ अस्थायी मतदाता कायम छन्।

निर्वाचनका लागि देशभर १० हजार ९६७ मतदानस्थलमा २३ हजार ११२ मतदान केन्द्र निर्धारण गरिएको थियो। १४३ अस्थायी मतदानस्थल तय भएका थिए। ज्येष्ठ नागरिक, अपाङ्गता भएका व्यक्ति तथा अशक्त र गर्भवतीलगायतलाई सहज मतदानका लागि प्राथमिकता दिने व्यवस्था गरिएको थियो।

निर्वाचन सुरक्षाका लागि ७९ हजार ७२७ नेपाली सेना, ७५ हजार ७९७ नेपाल प्रहरी, ३४ हजार ५६७ सशस्त्र प्रहरी बल, एक हजार ९२१ राष्ट्रिय अनुसन्धान र एक लाख ४९ हजार ९० निर्वाचन प्रहरी खटिएका थिए।

झापा । झापा ५ मा ६५ प्रतिशत मत खसेको छ । जिल्ला निर्वाचन अधिकृतको कार्यालयले दिएको जानकारीअनुसार ६५ प्रतिशत मत खसेको छ ।

५ का निर्वाचन अधिकृत विदुर कार्कीले दिएको जानकारीअनुसार ६५ प्रतिशत मतदान भएको छ । यो क्षेत्रमा एक लाख ६३ हजार ३७९ मतदाता थिए । झापा ५ यस निर्वाचनको ‘चुनावी इपिसेन्टर’ बनेको छ । उनका अनुसार आज नै सर्वदलीय बैठक बस्ने तयारी छ । सर्वदलीय बैठकपछि मात्रै मतगणनाको समय टुंगो लाग्नेछ ।

काठमाण्ड- प्रधानमन्त्री सुशीला कार्कीले कतारका समकक्षी शेख मोहम्मद बिन अब्दुल रहमान अल–थानीसँग आज टेलिफोन वार्ता गरी पश्चिम एशिया क्षेत्रमा पछिल्ला दिनमा विकसित घटनाक्रमप्रति चिन्ता व्यक्त गरेकी छन् ।

कार्कीले कतारमा रहेका ३ लाख ६० हजार नेपालीलाई सुरक्षा तथा संरक्षण उपलब्ध गराएकामा नेपाल सरकार र नेपाली नागरिकको तर्फबाट कतारी प्रधानमन्त्री थानीलाई धन्यवाद दिनुभएको प्रधानमन्त्रीको सचिवालयले जनाएको छ ।

प्रधानमन्त्री कार्कीले पश्चिम एशिया क्षेत्रमा विकसित घटनाक्रमलाई नेपालले नजिकबाट नियालिरहेको बताउँदै सम्बद्ध सबै पक्षलाई संयमित रहन, द्वन्द्वलाई थप नचर्काउन र नागरिकको सुरक्षाको प्रत्याभूति हुनुपर्ने नेपालको धारणा रहेको बताएकी थिइन् ।

उनले नेपालले सबै राष्ट्रले संयुक्तराष्ट्र सङ्घको बडापत्र, अन्तर्राष्ट्रिय कानून, जेनेभा अभिसन्धि र मानवीय कानूनको उचित सम्मान र पालना गर्नुपर्ने कुरामा जोड दिइएको बताएकी थिइन् ।

कुनै पनि बहानामा युद्ध शान्तिको विकल्प हुन नसक्ने बताउँदै प्रधानमन्त्री कार्कीले वार्ता र कूटनीतिको माध्यमबाट मात्र दीर्घकालीन शान्ति सुनिश्चित हुने बताइन ।

उनले दुई देशबीचको सम्बन्ध आउँदा दिनमा उच्चस्तरीय भ्रमण आदानप्रदान, आर्थिक तथा सांस्कृतिक सहकार्य र जनस्तरको सम्बन्धमार्फत थप प्रगाढ हुने विश्वास पनि व्यक्त गरे ।

टेलिफोन संवादका क्रममा प्रधानमन्त्री कार्कीले कतारको परिस्थितिप्रति ऐक्यबद्धता व्यक्त गर्दै कतारको सार्वभौम भूमिमा खासगरी गैरसैनिक क्षेत्रमा भएको आक्रमणप्रति गहिरो चासो व्यक्त गरिन् । साथै उनले कतारले रचनात्मक भूमिकासहित वर्तमान परिस्थितिको सामना गर्न सक्षम हुने विश्वास व्यक्त गरिन् ।

कतारका प्रधानमन्त्री एवम् परराष्ट्रमन्त्री थानीले नेपाल र कतारबीचको सुमधुर, प्रगाढ र मित्रवत् सम्बन्धको उच्च प्रशंसा गरेकी थिइन् ।

विराटनगर । झापामा ४ बजेसम्ममा ५९ दशमलव ६७ प्रतिशत मत खसेको छ । जिल्ला निर्वाचन कार्यालय झापाका अनुसार सबै भन्दै बढी झापा ५ मा मत खसेको छ । झापा ५ मा ६१ प्रतिशत भन्दा बढिले मतदान गरेका छन् ।

झापामा ७ लाख १३ हजार ५३७ मतादाता रहेका छन् । ४ बजे सम्ममा ४ लाख २५ हजार ७३७ मत खसेको निर्वाचन कार्यालयले जनाएको छ । अहिले पनि मतदान स्थलमा मतदाताहरू लाइनमा रहेका छन् ।

प्रतिनिधिसभा निर्वाचनमा मोरङ ४ बजे सम्ममा ५२ प्रतिशत मत खसेको छ ।  जिल्ला प्रशासन कार्यालय मोरङका अनुसार दिउँसो ४ बजेसम्म जम्मा ५१ं।९४ प्रतिशत मत खसेको हो ।

मोरङमा ७ लाख ८३ हजार ५० जना मतदाता रहेकोमा हालसम्म ४ लाख ६ हजार ७१५ जनाले मतदान गरेका हुन् । जिल्लाभरका कुल ८८८ मतदान केन्द्रहरू छन् । मतदानको साँझ ५ बजेसम्मका लागि तोकिएको छ ।

सुनसरीमा भने अहिलेसम्म ५५ प्रतिशत मत खसेको छ प्रमुख जिल्ला अधिकारी बासुदेव घिमिरेले बताए ।

धनगढी- सुदूरपश्चिम प्रदेशका मुख्यमन्त्री कमलबहादुर शाहले वाकरको सहारामा आफ्नो मतदान केन्द्रमा पुगेर मतदान गर्नु भएको छ । उनले आफ्नो निर्वाचन क्षेत्र अन्तर्गत कैलाली क्षेत्र नम्बर २, लम्किचुहा नगरपालिका–१ को कालिका माध्यमिक विद्यालयस्थित मतदान केन्द्रमा पुगेर दिउँसो ३ बजेर  २५ मिनेटमा मतदान गरेका हुन्।

मतदानपछि सञ्चारकर्मीसँग प्रतिक्रिया दिँदै मुख्यमन्त्री शाहले प्रतिनिधि सभाको निर्वाचन शान्तिपूर्ण वातावरणमा सम्पन्न हुने क्रममा रहेको भन्दै खुसी व्यक्त गरे । उनले निर्वाचनलाई सफल बनाउन खटिनुभएका सम्पूर्ण कर्मचारी, सुरक्षा निकाय तथा आम मतदाताहरूलाई शुभकामना तथा धन्यवाद व्यक्त गरे ।

त्यसैगरी, भ्रष्टाचार न्यूनीकरण र सुशासनको माग गर्दै भदौ २३ र २४ गते भएको जेन्जी आन्दोलनका क्रममा सहादत प्राप्त गर्ने सम्पूर्ण सहिदप्रति उनले श्रद्धाञ्जली अर्पण गरे ।

मुख्यमन्त्री शाहले शहिदहरूको रगत र बलिदानअनुसार देशमा लोकतन्त्रको स्थायित्व कायम हुने, संविधानको प्रभावकारी कार्यान्वयन हुने तथा लोकतान्त्रिक प्रणाली अझ सुदृढ बन्ने विश्वास व्यक्त गरे ।

काठमाडौं : प्रतिनिधिसभा सदस्य निर्वाचनमा आज जारी  मतदानमा करिब ८५ लाख मत खसेको छ । बिहीबार दिउँसो ३ः४५ बजेसम्म ८४ लाख ६० हजार ६७७ मत खसेको हो ।

यो तथ्याङ्कअनुसार देशभर हाल्लसम्म ४५ प्रतिशत मत खसेको हो । सुरक्षा निकायको तथ्याङ्कअनुसार सबैभन्दा कम मधेश प्रदेशमा मत खसेको छ । मधेशमा ३७ प्रतिशत मात्रै मत खसेको छ ।

मधेशमा १३ लाख ५२ हजार ५०४ मत खसेको तथ्याङ्कमा उल्लेख छ । यस्तै सबैभन्दा धेरै मत भने उपत्यकामा खसेको छ । तथ्याङ्कअनुसार यहाँ ५४ प्रतिशत मत खसेको हो । उपत्यकामा ६ लाख ३५ हजार ४२८ मत हालसम्म खसेको हो । यस्तै गण्डकी र कर्णालीमा समान ४८ प्रतिशत मत खसेको छ । बागमती र लुम्बिनीमा समान ४७, कोशीमा ४६ तथा सुदूरपश्चिममा ३९ प्रतिशत मत खसेको छ ।

दार्चुला- दार्चुलामा ३५.१५ प्रतिशत मत खसेको छ। प्रतिनिधिसभाको एउटामात्रै निर्वाचन क्षेत्र रहेको जिल्लामा कुल मतदाताको ३५.१५ प्रतिशत मत खसेको मुख्य निर्वाचन अधिकृतको कार्यालयले जानकारी दिएको छ।

जिल्लाका मतदान केन्द्रमा बिहानैदेखि मतदान प्रक्रिया अहिले पनि शान्तिपूर्ण रूपमा भइरहेको छ। दार्चुलामा दिउँसो २ बजेसम्म १५ हजार ४१४ महिला र १७ हजार २५९ जना पुरुष गरी जम्मा ३२ हजार ६७३ जना मतदाताले मतदान गरेका छन्।

जिल्लामा दुईवटा अस्थायीसहित ११२ वटा मतदानस्थल र १३४ वटा मतदान केन्द्रबाट मतदान जारी रहेको छ। मतदान साँझ ५ बजेसम्म हुनेछ। जिल्लाको कुल मतदातासंख्या ९२ हजार ९४८ जना रहेको छ ।

अर्घाखाँची : अर्घाखाँचीको सन्धिखर्क नगरपालिका-४ मा रहेको मतदान केन्द्रमा मतदान रोकिएको छ।

मतदानका लागि प्रयोग भएका केही मतपत्रहरूमा मतदान अधिकृतको हस्ताक्षर नभएको भेटिएपछि विवाद सिर्जना भएको हो।