कञ्चनपुरमा ५८ प्रतिशत मतदान, आजै गणनाको तयारी

कञ्चनपुर- कञ्चनपुरमा ५८.६७ प्रतिशत मत खसेको जिल्ला निर्वाचन कार्यालय कञ्चनपुरले जनाएको छ।

जिल्ला निर्वाचन कार्यालय कञ्चनपुरका कार्यालय प्रमुख हरिशचन्द्र जोशीले प्रतिनिधीसभाका तीनवटै क्षेत्रमा गरेर ५८.६७ प्रतिशत मत खसेको जानकारी दिए। उनका अनुसार कूल तीन लाख १४ हजार २९२ मतदाता रहेको कञ्चनपुरमा एक लाख ८४ हजार ३१६ मत खसेको हो।

कञ्चनपुर क्षेत्र नम्बर १ मा  कुल १ लाख १ हजार ७२४ मतदाता मध्ये ६१ हजार ७४ ले मतदान गरेका छन्। जसमा ३३ हजार ४०३ महिला र २७ हजार ६७१ पुरुष छन्। त्यसैगरी क्षेत्र नम्बर २ मा एक लाख ९ हजार ५७४ कुल मतदातामध्ये ३६ हजार ३८६ महिला र २८ हजार ४९५ पुरुष गरी ६४ हजार ८८१ मत खसेको छ।

१ लाख ३ हजार ८७ मतदाता रहेको ५८ हजार ३६१ मत खसेको छ। जसमा ३२ हजार ७३० महिला र २५ हजार ६३१ पुरुष ले मतदान गरेका छन्। यसपटक पुरुषको तुलनामा महिला मतदाताको संख्या बढी छ। अहिले जिल्लाका १३२ मतदान केन्द्रबाट मतगणना स्थलसम्म मतपेटिका संकलनको काम भइरहेको छ। लगत्तै सर्वदलीय बैठक बसेर आजैदेखि मतगणना सुरु गर्ने आयोगको तयारी छ।