Author: The Everest Post

कैलाली । सुदूरपश्चिम प्रदेश सरकारको उद्योग, पर्यटन, वन तथा वातावरण मन्त्रालयको जिम्मेवारी प्रदेश सभा सदस्य शिवराज भट्टलाई दिइएको छ। मुख्यमन्त्री कमल बहादुर शाहले भट्टलाई मन्त्रीमा नियुक्त गरेका हुन्।

प्रदेश प्रमुख नाजिर मियाले आइतबार नवनियुक्त मन्त्री भट्टलाई पद तथा गोपनीयताको सपथ गराएका छन्। भट्ट बैतडीबाट निर्वाचित प्रदेश सभा सदस्य हुन्।

यसअघि उक्त मन्त्रालय नागरिक उन्मुक्ति पार्टी (नाउपा)का प्रदेश सभा सदस्य रामेश्वर चौधरीको जिम्मेवारीमा थियो। तर लेनदेनसम्बन्धी अडियो सार्वजनिक भएपछि गत असारमा मुख्यमन्त्री शाहले उनलाई पदमुक्त गरेका थिए। त्यसपछि मन्त्रालयको जिम्मेवारी मुख्यमन्त्री शाहले नै सम्हाल्दै आएका थिए।

भट्ट मन्त्री नियुक्त भएसँगै लामो समयदेखि नेतृत्वविहीन रहेको उद्योग, पर्यटन, वन तथा वातावरण मन्त्रालयले अब नयाँ नेतृत्व पाएको छ।

धनगढी / आगामी शैक्षिक सत्र २०८३ सुरु हुनुअघि नै विद्यार्थीलाई समयमै पाठ्यपुस्तक उपलब्ध गराउने उद्देश्यले सुदूरपश्चिम प्रदेशभर पाठ्यपुस्तक वितरण कार्य तीव्र बनाइएको छ। जनक शिक्षा सामग्री केन्द्र लिमिटेड प्रादेशिक कार्यालय धनगढीले दुर्गम जिल्लालाई प्राथमिकतामा राख्दै धमाधम पुस्तक ढुवानी तथा बिक्री वितरण गरिरहेको जनाएको छ।

केन्द्रका अनुसार सुदूरपश्चिमका हिमाली तथा दुर्गम जिल्ला बाजुरा र दार्चुलामा आवश्यक सबै पाठ्यपुस्तक पुर्‍याइसकिएको छ। त्यस्तै बझाङ, अछाम, बैतडी र डोटीमा समेत पुस्तक पठाइसकिएको र ती जिल्लामा वितरण प्रक्रिया जारी रहेको छ। डडेल्धुरामा पठाउने तयारी अन्तिम चरणमा पुगेको छ भने कैलाली र कञ्चनपुरजस्ता सहज जिल्लामा पनि समयमै पाठ्यपुस्तक उपलब्ध गराउने गरी व्यवस्थापन मिलाइएको जनाइएको छ।

प्रादेशिक कार्यालय प्रमुख निर्मलकुमार यादवका अनुसार हालसम्म करिब ४ लाख थान पाठ्यपुस्तक बिक्री वितरण भइसकेको छ। “हामीले चैत १६ गतेदेखि औपचारिक रूपमा वितरण सुरु गरेका हौँ। अहिले दुर्गम क्षेत्रमा ढुवानीलाई तीव्रता दिएका छौँ, ताकि शैक्षिक सत्र सुरु हुनुअघि नै सबै जिल्लामा पुस्तक पुगोस,” उनले भने।

उनका अनुसार केन्द्रले प्रदेशभरिका स्थानीय पुस्तक बिक्रेतामार्फत पाठ्यपुस्तक बिक्री वितरण गरिरहेको छ। यसले स्थानीय स्तरमै सहज रूपमा विद्यार्थीले पुस्तक प्राप्त गर्न सक्ने वातावरण बनेको छ। चैत ३० गतेभित्र सुदूरपश्चिमका सबै नौ जिल्लामा पाठ्यपुस्तक पुर्‍याउने लक्ष्य रहेको उनले स्पष्ट पारे।

केन्द्रले आगामी शैक्षिक सत्रका लागि सुदूरपश्चिम प्रदेशभर करिब साढे १६ लाख थान पाठ्यपुस्तक बिक्री वितरण गर्ने लक्ष्य लिएको छ। जनक शिक्षाले कक्षा ३, ५ तथा कक्षा ६ देखि १२ सम्मका पाठ्यपुस्तक उत्पादन तथा वितरण गर्दै आएको छ। चालु शैक्षिक सत्रमा मात्र केन्द्रले यस प्रदेशमा कक्षा ३ देखि १२ सम्मका १६ लाख २९ हजार २६३ थान पाठ्यपुस्तक बिक्री वितरण गरेको थियो। जसबाट २१ करोड ९३ लाख ७३ हजार ४९४ रुपैयाँ बराबरको कारोबार भएको कार्यालयले जनाएको छ। यसले प्रदेशमा पाठ्यपुस्तकको माग उच्च रहेको पनि देखाउँछ।

पहिलो चरणअन्तर्गत चैत ३० गतेभित्रै सबै जिल्लामा आवश्यक पाठ्यपुस्तक पुर्‍याउने गरी काम भइरहेको केन्द्रले जनाएको छ। यदि कुनै जिल्लामा मागअनुसार पुस्तक अपुग भएमा तुरुन्तै दोस्रो चरणमा थप पुस्तक पठाइने व्यवस्था मिलाइएको छ। “हाम्रो प्रयास शैक्षिक सत्र सुरु हुनुअघि नै सबै विद्यार्थीको हातमा पाठ्यपुस्तक पुगोस भन्ने हो,” प्रमुख यादवले भने, “हालसम्म कुनै ठूलो अभाव देखिएको छैन, त्यसैले समयमै वितरण सम्पन्न हुनेमा हामी विश्वस्त छौँ।” यस वर्ष समयमै पाठ्यपुस्तक वितरण हुने अपेक्षासँगै विद्यार्थी, अभिभावक तथा विद्यालय व्यवस्थापन समितिमा उत्साह थपिएको छ। विगतमा देखिने ढिलाइ र अभावको समस्या न्यून हुने विश्वास गरिएको छ।

बैतडी​​​​​​​- बैतडीको दोगडाकेदार गाउँपालिका–१, रिम का १६ वर्षीय हरिस भुलको उपचारका लागि साउदीबाट आर्थिक सहयोग जुटाइएको छ। गम्भीर रोगसँग संघर्ष गरिरहेका भुललाई राहत पुर्‍याउने उद्देश्यले साउदी अरबमा क्रियाशील नेपाली साझा मञ्चले सहयोग अभियान सञ्चालन गरेको हो।

पारिवारिक आर्थिक अवस्था कमजोर रहेका भुल विगत केही समयदेखि खुट्टामा देखिएको जटिल समस्याका कारण उपचाररत छन्। हाल उनको उपचार बीपी कोइराला मेमोरियल क्यान्सर अस्पताल मा भइरहेको छ। चिकित्सकहरूले उनको अवस्थालाई जटिल रहेको उल्लेख गर्दै आवश्यक परे शल्यक्रिया गरी खुट्टा काट्नुपर्ने सम्भावना रहेको बताएका छन्।

उपचार खर्च जुटाउन कठिनाइ भएपछि मञ्चले सहयोग संकलन अभियान अघि बढाएको थियो। उक्त अभियानबाट नगद तथा बैंकमार्फत गरी कुल ७० हजार ४६९ रुपैयाँ संकलन भएको जानकारी दिइएको छ। संकलित रकममध्ये मञ्चमार्फत उठेको नगद सहयोग चितवनस्थित अस्पतालमै पुगेर पीडित परिवारलाई हस्तान्तरण गरिएको मञ्चले जनाएको छ। सहयोग हस्तान्तरण कार्यक्रममा बिरामीका अभिभावक तथा आफन्तको उपस्थिति रहेको थियो।मानवीय भावनाबाट प्रेरित भई सहयोग गर्ने सबैप्रति मञ्चले आभार व्यक्त गरेको छ।

साथै, आगामी दिनमा पनि यस्ता सामाजिक अभियानलाई निरन्तरता दिने प्रतिबद्धता जनाउँदै पीडित किशोरको शीघ्र स्वास्थ्य लाभको कामना गरिएको छ।

काठमाडौँ । सुदूरपश्चिम प्रदेशले जारी पीएम कपमा बागमती प्रदेशलाई फराकिलो अन्तरले पराजित गरेको छ ।

आइतबार सम्पन्न खेलमा सुदूरपश्चिमले बागमतीलाई १६३ रन अन्तरले पराजित गरेको हो ।

सुदूरपश्चिमले दिएको २१० रनको लक्ष्य पछाएको बागमती ११.२ ओभरमा ४६ रन बनाएर अल आउट भएको थियो ।

बागमतीका लागि सुभ कंसाकारले ३२ रन बनाए भने अन्य ब्याट्सम्यानले दोहोरो अंकमा रन बनाउन सकेनन । बागमतीको ब्याटिंग लाइन ध्वस्त गर्नेक्रममा सुदूरपश्चिमका हेमन्त धामीले ७ विकेट लिएका थिए भने शेर मल्लले ३ विकेट लिएका थिए ।

यसअघि टस हारेर पहिला ब्याटिंग गरेको सुदूरपश्चिमले ४२.१ ओभरमा अल आउट हुदै २०९ रन बनाएको थियो । सुदूरपश्चिमका नारायण जोशीले सर्बाधिक ७५ रन बनाएका थिए भने दिपक बोहोराले ४० र अभिषेक पलले ३९ रन बनाएका थिए ।

यो जितपछि सुदूरपश्चिमको ६ खेलमा १० अंक भएको छ र शिर्ष स्थानमा उक्लिएको छ । त्यस्तै बागमती प्रदेशले भने ६ खेलमा चौथो हार बेहोरेको छ ।

कञ्चनपुर- कञ्चनपुरको शुक्लाफाँटा राष्ट्रिय निकुञ्जमा बाघ गणना सम्पन्न भएको छ ।

राष्ट्रिय बाघ सर्वेक्षण कार्यक्रमअन्तर्गत शुक्लाफाँटा-लालझाडी-जोगबुढा कम्प्लेक्समा बाघ गणनाको काम सम्पन्न भएको निकुञ्जका संरक्षण अधिकृत पुरुषोत्तम वाग्लेले जानकारी दिए ।

गत फागुन अन्तिम सातादेखि ‘क्यामेरा ट्र्यापिङ’ विधिबाट सुरु गरिएको राष्ट्रिय बाघ गणनाको फिल्डको काम सकिएर क्यामेरा सङ्कलन भइरहेको हो । ‘शुक्लाफाँटा र डिभिजन वनअन्तर्गत राखिएका क्यामेराहरु सङ्कलन भइसकेका छन्,’ उनले भने, ‘सङ्कलन भएका क्यामेराका तस्बिरहरुको विश्लेषण गरेर बाघको सङ्ख्या पत्ता लगाइन्छ ।’

यहाँ प्रत्येक ४ वर्षमा बाघ गणना हुँदै आएको छ । बाघ गणनाका लागि ७७ जनाको प्राविधिक टोलीसहित ५२० स्वचालित क्यामेरा जडान गरिएका थिए ।  सन् २०२२ को राष्ट्रिय गणनाअनुसार निकुञ्जमा ३६ वटा बाघ थिए ।

निकुञ्ज कार्यालयले हरेक वर्ष बाघको आन्तरिक सर्वेक्षण गर्ने गर्दछ । निकुञ्जको आन्तरिक सर्वेक्षणअनुसार यहाँ ४३ वटा बाघ छन् । यस पटकको राष्ट्रिय गणनामा पनि सोही सङ्ख्यामा बाघको सङ्ख्या हुन सक्ने अनुमान संरक्षण अधिकृतहरुको छ । ‘निकुञ्जको आन्तरिक सर्वेक्षणमा ४३ वटा बाघ छन्, एकै वर्षमा धेरै सङ्ख्या नबढेका हुनसक्छन्,’ संरक्षण अधिकृत वाग्लेले भने, ‘यसपटकको राष्ट्रिय गणनामा पनि त्यही सङ्ख्या हुनसक्छ ।’

काठमाडौं । सरकारले आगामी शैक्षिकसत्र वैशाख १५ बाट सुरु हुने घोषणा गरेको छ ।

आइतबार (चैत २२) बसेको मन्त्रिपरिषदको बैठकले आगामी शैक्षिक सत्र वैशाख १५ गतेबाट लागू हुने निर्णय गरेको शिक्षामन्त्री तथा सरकारका प्रवक्ता सस्मित पोखरेलले जानकारी दिए ।