कम्तीमा दुई वर्ष सकारात्मक सोचौँ : सभामुख अर्याल

काठमाडौं । प्रतिनिधिसभाका सभामुख डोलप्रसाद (डीपी) अर्यालले पूर्ण निष्पक्ष र तटस्थ रहेर काम गर्ने प्रतिबद्धता व्यक्त गरेका छन् ।

शपथग्रहणपछि सिंहदरबारस्थित कार्यकक्षमा पुगेर पदभार ग्रहण गर्दै उनले सभामुख पदको गरिमा, यसको तटस्थता र निष्पक्षतालाई गहिरोसँग बुझेको बताए । अहिलेको संसद २०८२ को विशेष निर्वाचनको म्यान्डेटबाट आएको उल्लेख गर्दै उनले यसपटकको सबैभन्दा बलियो प्रतिपक्ष जनता भएको बताए ।

सदन विशेष गरी प्रतिपक्षको हुनुपर्ने मान्यतामा आफू दृढ रहेको उनको भनाइ छ । प्रतिपक्षमा एकजना मात्र सदस्य भए पनि शक्तिशाली हुने भन्दै प्रतिपक्षको आवाजलाई सम्मानजनक ढंगले उठान र बैठान गर्न आफू लागिपर्ने बताए ।

“यसपटकको निर्वाचन विगत र भविष्यका निर्वाचनभन्दा फरक छ । म सभामुखको हैसियतमा रहँदा मलाई राम्रोसँग थाहा छ- यसपटकको बलियो प्रतिपक्ष नागरिक नै हुन्,” अर्यालले भने ।

अर्यालले समाजमा सकारात्मक ऊर्जा फैलाउनुपर्ने पनि बताए । समाज निर्माणका लागि यो अनिवार्य रहेको उनको भनाइ छ । “वर्षौंदेखि हामीले मिडियामा सकारात्मक समाचार पढ्न पाएका छैनौँ,” अर्यालले भने, “संसारभर रहेका नेपाली र मिडियाका साथीहरूलाई मेरो अनुरोध छ- कम्तीमा दुई वर्ष सकारात्मक बोलौँ, सकारात्मक सोचौँ र सकारात्मक लेखौँ ।”

प्रतिनिधिसभाको मुख्य काम कानुन बनाउनु रहेको उल्लेख गर्दै अर्यालले सरकारलाई नीति–नियम बनाउन सहयोग गर्ने र कानुन निर्माणमा अग्रसर हुने उल्लेख गरे । “विश्वमा ध्वस्त भएका संरचनाहरू छिट्टै उठेका इतिहास छन् । हामी पनि छिट्टै संरचना बनाउन सक्छौँ । तर, मुख्य कुरा कानुन र नीति हो,” अर्यालले भने ।

विगतका जस्ता घटनाहरू नदोहोरिउन् भन्नेतर्फ आफ्नो ध्यान केन्द्रित हुने उनले बताए ।

“हामी राष्ट्र र जनताका लागि काम गर्दैछौँ भने त्यसमा विरोध गर्नुपर्ने कारण नै हुँदैन । त्यसैले समन्वयमा गाह्रो होला जस्तो मलाई लाग्दैन,” उनले भने ।

आफ्नो अनुभव र कार्यशैलीबाट सदनमा देखिने गरी परिवर्तन ल्याउने उनको भनाइ छ । तर, त्यसका लागि केही समय पर्खिन उनले आग्रह गरे । न्युज एजेन्सी नेपाल