Month: February 2026

काठमाण्डौ- प्रतिनिधिसभा चुनावको मतपत्र छपाइ अन्तिम चरणमा पुगेकोे छ । जनक शिक्षा सामग्री केन्द्र लिमिटेडले छपाइ बाँकी रहेको ५ लाख मतपत्र आज दिनभरमा छपाइ सम्पन्न हुने जनाएको छ ।

केन्द्रका कार्यकारी प्रबन्ध सञ्चालक यदुनाथ पौडेलले मतपत्र छपाइ आज सम्पन्न हुने जानकारी दिँदै बागमती प्रदेशका लागि बाँकी ५ लाख मतपत्र आजै बेलुकीसम्म सम्पन्न हने बताए । उनले प्रत्यक्ष तर्फका २ करोड ३ लाख मतपत्र छपाइ गर्नुपर्नेमा बाँकी रहेको ५ लाख मतपत्र छपाइ आज दिनभरमा सक्ने बताए ।

भोलिसम्ममा सबै मतपत्र प्याकिङ सके बाँकी जिल्लामा ढुवानी हुने पौडेलले बताए । दैनिक १३ देखि १५ लाख मतपत्र छपाइ गरी लक्ष्यभन्दा अगाडि नै मतपत्र छपाइ गरिएको बताउँदै केन्द्रले छपाइ सम्पन्न गरेको १० लाख नमूना मतपत्र, निर्वाचन आयोगले विभिन्न ठाउँमा पुर्याइसकेको छ, भने २ करोड आठ लाख ३० हजार समानुपातिकतर्फको मतपत्र छपाइ गरी प्याकिङ सम्पन्न गरी जिल्ला जिल्ला पठाउने कार्य भइरहेको छ ।

केन्द्रका प्रबन्ध सञ्चालक पौडेलले कर्णाली र सुदूरपश्चिममा सबै मतपत्र पुगिसकेको र बाँकी क्षेत्रमा पनि १२ गतेसम्म पुर्याउने लक्ष्यका साथ काम भइरहेको जानकारी दिए ।

 

काठमाडौं । राष्ट्रिय स्वतन्त्र पार्टी (रास्वपा) ले ७ फागुनमा नागरिक करारको नाममा घोषणापत्र जारी गर्ने भएको छ । २१ फागुनमा हुने निर्वाचनका लागि रास्वपाले मुख्य गरी सुशासनलाई प्राथमिकता दिँदै चुनावमा नागरिक करार ल्याउन लागेको हो ।

उपसभापति स्वर्णिम वाग्लेले नागरिक करारका संक्षिप्त विषयवस्तु सार्वजनिक गर्दै सुशासन सदाचार र असल शासन, मध्यम वर्गीय विस्तार, काम, काम, काम, कनेक्टिभिटीजस्ता विषयलाई प्राथमिकताम राखेको जनाएका छन् ।

‘भ्रष्टाचारविरोधी महाअभियान’मार्फत विश्वसनीय, सदाचारी राज्य निर्माण गर्दै, सरकारी सेवाहरूको सर्वव्यापी डिजिटल डेलिभरीसहित भ्रष्टाचार सूचकांकमा भारी सुधार गर्ने प्रतिबद्धता छ । दलीयकरणको अन्त्य र २०४६ देखिकै सम्पत्ति छानबिन गर्न उच्चायोग गठन गर्न प्रस्ताव गरिएको छ ।

औसत वार्षिक प्रतिव्यक्ति आय ३ हजार डलर नघाउन कुल गार्हस्थ्य उत्पादनको आकार १०० अर्ब डलर (प्रचलित मूल्यमा) पुर्‍याउने घोष्णा रास्वपाको छ ।

शतप्रतिशत बीमा गरिएको गुणस्तरीय स्वास्थ्य सेवा दिने उसको प्रतिबद्धता छ । सार्वजनिक शिक्षाको आमूल सुधार गर्ने, जन्मदेखि मृत्युसम्म आवश्यकतामा आधारित ‘एकीकृत सामाजिक सुरक्षा’को ग्यारेन्टी गर्ने भनिएको छ ।

आधुनिक बैंकिङसहित वित्तीय सेवाहरूमा सबै नागरिकको पहुँचलगायत सख्त नियमनभित्रको सहकारी र लघु वित्त, मिटर ब्याज शोषणको अन्त्य गरिने रास्वपाको छ । रास्वपाले १२ लाख नयाँ रोजगारी सिर्जना गर्ने दाबी गरेको छ । रोजगारीको लागि आईटी, निर्माण, पर्यटन, कृषि, खनिज, उद्योग र सेवा व्यापारलाई माध्यम बनाउने उसको घोषणा छ ।

कनेक्टिभिटीतर्फ अपर्याप्त एवं असुरक्षित सडकको कमजोरीको विकल्पमा ३० हजार किलोमिटर राष्ट्रिय राजमार्ग निर्माण गर्ने रास्वपाको प्रतिबद्धता छ ।

प्रतिस्पर्धी अर्थतन्त्रका लागि गुणस्तरीय सडक र हवाई सञ्जाल आवश्यक भएको रास्वपाको भनाइ छ । भरोसायोग्य उजी ग्रीड र सबै बस्तीमा तीव्र गतिको सुलभ इन्टरनेट विस्तारको वाचा रास्वपाको घोषणापत्रमा आउँदै छ । १५ हजार मेगावाट विद्युत् जडित क्षमता, ३० हजार किमि राष्ट्रिय राजमार्ग निर्माण र १० वटा राष्ट्रिय महत्त्वका ‘सिग्नेचर आयोजना’ सम्पन्न गर्ने प्रतिबद्धता रास्ववपवाको आउँदै छ ।

विदेशमा बस्ने नेपालीहरूलाई अनलाइन मताधिकार, वंशजको नागरिकताको निरन्तरता, सार्वभौम डायस्पोरा फन्डको कार्यान्वयन, सुरक्षित लगानी र सम्मानित देश फिर्तीको वातावरण, मर्यादित वैदेशिक रोजगारीको नारा रास्वपाको करारपत्रमा उल्लेख छन् ।

‘तपाईंहरूले हामीलाई एकल बहुमत दिलाएको अवस्थामा पनि करारबमोजिमका सर्तहरू डेलिभरीसहित ५ वर्षभित्र बुझाउन नसकी तपाईं नागरिकलाई मर्का पर्न गएमा, संविधान, मौजुदा कानुन र सामाजिक करार अनुसार हाम्रो ‘राजनैतिक नैतिकता र पद’बाट अर्कोपटकको निर्वाचनमा सजाय दिई असुलउपर गरी लिनुहोला,’ वाग्लेले शेयर गरेको करारपत्रको संक्षिप्त अंशमा उल्लेख छ, ‘यसमा हाम्रो पार्टीको सम्पूर्ण सदस्यहरूको मञ्जुरी छ । यो करारमा उल्लेख गरेको व्यहोरा साँचो हो, झुटा ठहरे सहुँला बुझाऊँला । काबुबाहिरको परिस्थितिबाहेक हामी पूरा गर्न नसकिने वाचा बाँड्दैनौँ, बरु तपाईंहरूको राजनीतिक विश्वासको ऋणको करार गर्छौं ।’

मुम्बई: नेपाललाई पराजित गर्दै वेस्ट इन्डिज ट्वान्टी–२० विश्वकप क्रिकेटको ‘सुपर एट’ मा प्रवेश गरेको छ । नेपालले दिएको १ सय ३४ रनको लक्ष्य वेस्ट इन्डिजले मुम्बईको वानखडे रंगशालामा १५.२ ओभरमै पूरा गरेको थियो ।

वेस्ट इन्डिजका ओपनर ब्याटर ब्रान्डन किंग २२ रन बनाई आउट भए । नन्दन यादवको बलमा कुशल भुर्तेलले मिडअनमा उनको क्याच लिएका थिए । किंग र कप्तान साई होपले ६ ओभरभित्र पहिलो विकेटका लागि ४३ रनको साझेदारी गरेका थिए । त्यसपछि होप र हेटमायरले ४१ बलमा अर्धशतकीय साझेदारी पूरा गरेका थिए, जसमा हेटमायरको योगदान ३७ रनको थियो । त्यसपछि भने होप आक्रामक बनेका थिए ।

यी दुई ब्याटरले दोस्रो विकेटमा कुल ५९ बल खेली ९१ रनको साझेदारी गरे । होप ६१ र हेटमायर ४६ रन बनाई अविजित रहे । होपले ४४ बल खेलि ५ चौका र ३ छक्का तथा हेटमायरले ३२ बल खेली ४ चौका र २ छक्का प्रहार गरे ।

वेस्ट इन्डिजले लगातार तेस्रो खेल जित्दै अर्को चरणमा स्थान पक्का गरेको हो । नेपालले भने लगातार तेस्रो खेलमा पराजय भोगेको हो । नेपालले मंगलबार स्कटल्यान्डसँग समूहचरणको अन्तिम खेल खेल्ने छ ।

 

यसअघि टस हारेपछि ब्याटिङको निम्तो पाएको नेपालले निर्धारित २० ओभरमा ८ विकेट गुमाई १ सय ३३ रन बनाएको थियो । दीपेन्द्रसिंह ऐरीको ५८ रन बनाएपछि मात्र नेपालले हेर्नलायक स्कोर बनाएको हो । नेपाली खेलाडीको ट्वान्टी–२० विश्वकपमा यो केवल दोस्रो अर्धशतक हो र उच्च स्कोर पनि हो ।सुवास खकुरेलले २०१४ को विश्वकपमा अफगानिस्तानविरुद्ध यसअघि ५६ रन बनाएका थिए ।

नेपालले पहिलो ओभरमै विकेट गुमाएको थियो । अकेल हुसैनले कुशल भुर्तेललाई पाँचौँ बलमा बोल्ड गरेका थिए ।

कप्तान रोहित पौडेल ७ बलमा ५ रनमात्र बनाई म्याथ्यु फोर्डको बलमा एलबीडब्लू आउट भए । त्यसपछि जेसन होल्डरले शेख दाजुभाइ आसिफ र आरिफलाई आउट गरे ।

दुई चौका प्रहार गरी १० बलमा ११ रन बनाएका आसिफ फाइनललेगमा क्याच दिन पुगे । आरिफ पनि २ रनमा मिडविकेटमा क्याच भए । नेपालले पावर प्लेको पहिलो ६ ओभरमा २२ रनमात्र बनाउन सकेको थियो र ३ विकेट गुमाएको थियो । त्यसपछिको ४ ओभरमा नेपालले २० रन जोडेको थियो ।

लोकेश बमले १३ रन बनाए । १५ बल खेली २ चौका प्रहार गरेका उनी सामर जोसेफको लेग साइडमा गएको बलमा विकेटकिपरलाई क्याच दिन पुगे । दीपेन्द्र र गुलशन झाले छैटौं विकेटमा २६ बलमा २७ रनको साझेदारी गरे । एक छक्का प्रहार गरेका गुलशनलाई रोस्टन चेजले बोल्ड गरिदिए ।

दीपेन्द्र र सोमपाल कामीले सातौं विकेटमा २६ बलमा ५४ रनको साझेदारी गरे । नेपाली इनिङ्सको यो सबैभन्दा ठूलो साझेदारी थियो । होल्डरले फालेको १८ औं ओभरमा नेपालले १६ रन जोडेको थियो । त्यसमा सोमपालले होल्डरलाई लगातार ३ चौका प्रहार गरे । दीपेन्द्रले २ छक्का प्रहार गरेपछि नेपालले १९ ओभरमा कुल १८ रन जोडेको थियो ।

दीपेन्द्र अन्तिम ओभरमा होल्डरको बलमा लङअफमा क्याच दिन पुगे । उनले ४७ बल खेली समान ३ चौका र छक्का प्रहार गरे । सोमपाल १५ बलमा २६ रन बनाई अविजित रहे । उनले ४ चौका प्रहार गरे । करण केसी १ रन बनाई अन्तिम बलमा आउट भए ।

वेस्ट इन्डिजबाट होल्डरले ४ विकेट लिए । उनले ४ ओभरमा २७ रन खर्चे । फोर्डले ४ ओभरमा १ मेडन राख्दै १० रनमात्र खर्चेर १ विकेट लिए । फोर्डसँगै हुसैन, जोसेफ र चेजले १–१ विकेट लिएका हुन् ।

सोमपाल प्रतियोगितामा पहिलो खेल खेल्दै तेस्रो पटक विश्वकपमा खेल्ने नेपालको पहिलो खेलाडी बने । नेपालले यसअघि २०१४ र २०१६ को विश्वकपमा पनि सोमपालले खेलेका थिए ।

नेपालले सेप्टेम्बरमा यूएईको शारजहाँमा वेस्ट इन्डिजसँगको तीन खेलको ट्वान्टी–२० अन्तर्राष्ट्रिय शृंखला एतिहासिक रुपमा २–१ ले जितेको थियो । त्यो टोलीका केवल दुई खेलाडी हुसेन र होल्डरमात्र अहिलेको वेस्ट इन्डिजको टोलीमा रहेका छन् । वेस्ट इन्डिजले धेरै नयाँ खेलाडीलाई मौका दिँदा हुसेनले शारजहाँमा क्यारेबियन टोलीको नेतृत्व गरेका थिए ।

काठ्माण्डौ- प्रधानमन्त्री सुशिला कार्कीले महाशिवरात्रिको अवसरमा सम्पूर्ण नेपालीमा शुभकामना व्यक्त गरेकी छन्। आज परेको महाशिवरात्रिका अवसरमा शुभकामना दिदैं उनले आदियोगी भगवान् शिवको आराधनामा समर्पित रहने दिनका रूपमा बयान गरेकी छन्।

‘शिव चेतना, संयम, करुणा र सहअस्तित्वका प्रतीक हुन्, शिव र शक्ति तथा प्रकृतिको अद्वैत सम्बन्धले मानवलाई प्रकृतिसँग सहअस्तित्वमा बाँच्न प्रेरित गर्छ।’ उनले लेखेकी छन्।

प्रधानमन्त्री कार्कीले महाशिवरात्रि शान्ति, सद्भाव र समृद्धिको पर्व बन्ने विश्वास समेत गरेकी छन्।

महाशिवरात्रि फागुन कृष्ण चतुर्दशीका दिन मनाइने हिन्दू धर्मावलम्बीको प्रमुख पर्व हो। यसलाई ‘शिवको महान् रात्रि’ पनि भनिन्छ।

पौराणिक मान्यता अनुसार आजको दिन भगवान् शिव    निराकारबाट साकार रूपमा अवतरित भएका थिए भन्ने मान्यता राखिदैं आएको छ। साथै  शिव–पार्वतीको विवाह पनि यही रात सम्पन्न भएको विश्वास हिन्दू धर्ममा गरिँदै आएको छ।

धार्मिक विश्वासका आधारमा आजको दिन व्रत बस्ने, रातभर जाग्राम गर्ने र शिवलिङ्गमा पूजा–अर्चना तथा दुग्ध अभिषेक गर्ने प्रचलन  छ।  शिवतत्वसँग सम्बन्धित यस पर्वले अज्ञानताको अन्धकारबाट मुक्ति, सुखशान्ति र समृद्धि प्राप्त हुने जनविश्वास  छ।