Month: April 2026

बाजुरा । बाजुराको बाजुगाड खोलामा नयाँ पक्की पुल निर्माण भए पनि स्थानीयवासीको आवतजावतको समस्या भने समाधान हुन सकेको छैन । बुढीगङ्गा नगरपालिका–४ र खप्तड छेडेदह गाउँपालिका–३ को बिचमा पर्ने बाजुगाड खोलामा पुल बने पनि दुवैतर्फको ‘साइट’ (एप्रोच सडक र दायाँबायाँको संरचना) निर्माण नहुँदा पुल प्रयोगविहीन बनेको हो ।

विसं २०७२ मा अछामको साउँद एड्भेन्चर जेभीले दुई करोड रुपियाँको लागतमा ४५ मिटर लामो सो पुल निर्माणको जिम्मा लिएको थियो । सम्झौता अनुसार उक्त पुल २०७६ असारसम्ममा सम्पन्न हुनुपर्ने थियो । तर, निर्माण कम्पनीको ढिलासुस्तीका कारण २०८२ पुसमा मात्र पुलको मुख्य संरचना निर्माण कार्य सकिएको छ ।

पुलको काम सकिए पनि दुवैतर्फका पहुँच मार्ग र संरक्षणका कार्य अझै बाँकी रहेकाले स्थानीयवासीले अहिले पनि पहिलेकै जस्तो खोला तर्नुपर्ने बाध्यता रहेको छ । बुढीगङ्गा–४, बानेगाउँकी गोमती कटुवाल भन्नुहुन्छ, “गाउँमा धेरै योजना आउँछन्, ठेकेदारले केही काम गरे जस्तो गर्छन् र हराउँछन् । जसका कारण हामीले सधैँ सास्ती खेप्नुपरेको छ ।”

यता, साउँद एड्भेन्चर जेभीका प्रोप्राइटर ईश्वर साउँदले आफूले जिम्मा लिएको ४५ मिटर पुलको काम सम्पन्न गरिसकेकाले अब आफ्नो जिम्मेवारी नरहेको दाबी गर्नुभयो । उहाँले भन्नुभयो, “प्राविधिक गडबडीका कारण केही समय ढिला भए पनि मैले पुलको काम पूरा गरेर सम्बन्धित निकायलाई बुझाइसकेको छु, बाँकी साइडको काम मेरो जिम्मेवारीमा पर्दैन ।”

पूर्वाधार विकास कार्यालय साँफेबगर, अछामका कार्यालय प्रमुख जङ्ग थापाले पुलको मुख्य काम सकिए पनि दुवैतर्फका साइड निर्माण बाँकी रहेको स्वीकार गर्नुभयो । “गत वर्ष एकातर्फको साइड निर्माण गरिएको थियो, अहिले अर्कोतर्फको काम गर्ने तयारीमा छौँ,” उहाँले भन्नुभयो, “साइड निर्माणका लागि अर्को ठेकेदार कम्पनीसँग सम्झौता भइसकेकाले केही समयपछि पुल पूर्णरूपमा सञ्चालनमा आउने छ ।”

धनगढीः सुदूरपश्चिम प्रदेशसभा सदस्य प्रकाशबहादुर देउवाले अमेरिकाबाटै सभामुख भीमबहादुर भण्डारीलाई पत्र पठाउँदै आफू अझै केही समय प्रदेशसभा बैठकमा उपस्थित हुन नसक्ने जानकारी दिएका छन्।

कैलाली क्षेत्र नम्बर ५ (२) बाट निर्वाचित देउवा नेपाली काँग्रेसका पूर्वसभापति शेरबहादुर देउवाका भतिजा हुन्। उनी भौतिक पूर्वाधार विकास मन्त्रीसमेत भइसकेका छन् र जेन्जी आन्दोलनपछि अमेरिका गएका थिए।

पत्रमा उनले २०८२ भदौ २८ गते व्यक्तिगत कामका लागि अमेरिका गएको र त्यसपछि देखिएको स्वास्थ्य समस्याका कारण चिकित्सकको सल्लाहअनुसार उपचार तथा विश्राममा बस्नुपरेको उल्लेख गरेका छन्। यही कारणले सो अवधिमा बसेका प्रदेशसभा बैठकहरूमा सहभागी हुन नसकेको र आगामी २०८२ चैत्र २४ गते बस्ने बैठकमा पनि उपस्थित हुन नसक्ने जानकारी गराएका छन्।

संविधानअनुसार सभामुखलाई जानकारी नगराई लगातार १० बैठकमा अनुपस्थित रहे पद गुम्न सक्ने व्यवस्था छ। यद्यपि, देउवाले केही बैठकमा अनुपस्थित भएपछि सभामुखलाई पत्रमार्फत जानकारी गराएका हुन्।

प्रदेशसभा सचिवालयले उनी सम्पर्कमा नरहेको भन्दै सेवा–सुविधा समेत रोकेको छ। प्रदेश सभा सचिवालयले सभामुखलाई सम्बोधन गरिएको पत्र प्राप्त भएको पुष्टि गरेको छ।

धनगढी /कैलालीको गेटास्थित सहिद दशरथ चन्द स्वास्थ्य विज्ञान विश्वविद्यालयले आगामी शैक्षिक सत्रदेखि चिकित्सा शिक्षाको पठनपाठन सुरु गर्ने तयारी गरेको छ । यसका लागि विश्वविद्यालयले आवश्यक शैक्षिक जनशक्ति पदपूर्ति प्रक्रिया अघि बढाउनुका साथै चिकित्सा शिक्षा आयोगसँग अनुमति मागेको जनाएको छ ।

विश्वविद्यालयका रजिस्ट्रार डा। खेमराज जोशीका अनुसार एमबिबिएस, बिएस्सी नर्सिङ, बिएस्सी एमएलटी र बी अप्टोमेट्री कार्यक्रम सञ्चालन गर्ने तयारी भइरहेको छ । आवश्यक जनशक्ति व्यवस्थापनका लागि विश्वविद्यालयले करार सेवामा २६ जना प्राध्यापक र ५१ जना उपप्राध्यापक पदका लागि दरखास्त आह्वान गरिसकेको छ भने आगामी महिनादेखि छनोट प्रक्रिया सुरु गरिने बताइएको छ ।

हाल गेटामा सञ्चालनमा रहेको ५० शैयाको अस्पताललाई स्तरोन्नति गरी ३०० शैयाको शिक्षण अस्पताल बनाउने प्रस्ताव पनि अघि सारिएको छ । यसका लागि फिजियोलोजी, प्याथोलोजी, इएनटी, जनरल सर्जरी, एनेस्थेसियोलोजी, इन्टरनल मेडिसिन, अप्थाल्मोलोजी, मेडिकल एजुकेसन तथा फार्माकोलोजी लगायतका विषयमा जनशक्ति पदपूर्ति प्रक्रिया अघि बढाइएको छ । अस्पताल तथा शैक्षिक कार्यक्रम सञ्चालनका लागि विश्वविद्यालयले आगामी आर्थिक वर्षका लागि २ अर्ब ५८ करोड रुपैयाँ बजेट माग गरेको छ । उक्त प्रस्ताव प्रधानमन्त्री तथा मन्त्रिपरिषद् कार्यालय हुँदै अर्थ मन्त्रालयमा पुगेको जनाइएको छ ।

यसैबीच, सुदूरपश्चिमबाट निर्वाचित सांसदहरूले विश्वविद्यालय सञ्चालनको माग गर्दै प्रधानमन्त्री तथा अर्थमन्त्रीसँग छलफल गरेका छन् । गत साता भएको छलफलमा प्रधानमन्त्रीले गेटा विश्वविद्यालय सञ्चालनलाई प्राथमिकतामा राखेर अघि बढ्ने प्रतिबद्धता जनाएका छन् ।

काठमाडौं । जारी प्रधानमन्त्री कप प्रतियोगितामा सशस्त्र प्रहरी बल (एपीएफ)ले सूदुरपश्चिम प्रदेशलाई २६० रनको लक्ष्य दिएको छ।

टस हारेर पहिला ब्याटिङको निम्तो पाएको एपिएफले  निर्धारित ५० ओरभमा ९ विकेट गुमाएर २५९ रन बनायो।

एपिएफको लागि सन्दीप जोराले सर्वाधिक ५५ रन बनाए। ४५ बलको सामना गरेका उनले ९ चौका र १ छक्का प्रहार गरेका हुन्। ओपनर आशिफ शेख एक रनमा आउट हुँदा कप्तान रोहित कुमार पौडेल ११ रनमा पेभिलियन फर्किएका थिए।

सूदरको लागि शेर मल्लले ३ विकेट लिए भने विकास आग्री र अशोक धामीले समान २र२ विकेट लिए।