Month: April 2026

काठमाडौं : प्रतिनिधिसभाका स्वतन्त्र सांसद महाबीर पुनले सदनमा आफ्नो भूमिका पक्ष–विपक्षमा नभई निष्पक्ष हुने बताएका छन् । बिहीबारबाट सुरु भएको प्रतिनिधिसभाको पहिलो वैठकलाई सम्बोधन गर्दै प्रतिनिधिसभा सदस्य पुनले आफू अचम्मको सांसद सदनमा आइपुगेको बताएका छन् ।

उनले आफ्नो बोल्ने, काम गर्ने तरिका नै फरक भएकाले सबैसँग मिल्न नसक्ने बताए । उनले आफू आउनै नपर्ने मान्छे सदनमा आइपुगेको पनि बताएका छन् । उनले आफू अमेरिकामा पढेर २०४९ साल भदौं महिनामा आएको बताउँदै त्यसयता एउटा झोला बोकेर स्वयमसेवाको रुपमा काम गरिरहेको बताए।

उनले आफू राजनीतिकर्मी नभएकाले सदनमा पनि समाजसेवीकै रुपमा भूमिका निर्वाह गर्ने बताए । समाजसेवी भएकै कारण प्रतिनिधिसभामा उम्मेदवार हुने रहर नभएको बताउँदै भदौ २३, २४ को आन्दोलनपछि जेनजी युवाहरुले नै बोलाएर शिक्षा तथा विज्ञानमन्त्री बनाई दिएको पनि बताए । सो बेला आफू ताप्लेजुङको गाउँ गाउँमा किताव बेचिरहेको समेत बताए । उनले चार महिना मन्त्री हुँदा शिक्षा क्षेत्रको राजनीतिकरण, विकृतिहरु देखेर ती हटाएर विद्यालय र विश्वविद्यालयहरुमा विशुद्ध अध्ययनको वातावरण बनाउन प्रयास गरेको बताए ।

काठमाडौं : प्रतिनिधि सभाको आज बसेको पहिलो बैठकमा विभिन्न तीनवटा अध्यादेश पेश भएको छ।

मतदाता नामावली (पहिलो संशोधन) अध्यादेश २०८२, प्रतिनिधि सभा सदस्य निर्वाचन (पहिलो संशोधन) अध्यादेश २०८२ र नेपाल विशेष सेवा (दोस्रो संशोधन) अध्यादेश २०८२ पेश भएको हो।

गृहमन्त्री सुधन गुरुङले तीनवटै अध्यादेश संसदमा पेस गरे।

नेपाली कम्युनिष्ट पार्टी (नेकपा) का तर्फबाट निर्वाचित सांसद वर्षमान पुनले आफ्नो पार्टीले सदनमा आलोचनात्मक प्रतिपक्षको भूमिका निर्वाह गर्ने बताएका छन्।

प्रतिनिधिसभाको पहिलो अधिवेशनमा आज (बिहीबार) दलीय आधारमा मन्तव्य राख्दै उनले देश र जनताको पक्षमा आफ्नो पार्टीले सरकारलाई रचनात्मक सहयोग गर्ने प्रतिबद्धता व्यक्त गरे।

‘राष्ट्र निर्माण, सामाजिक न्याय, रुपान्तरणलगायत जनहित र सकारात्मक विषयमा सरकारलाई सहयोग गर्न तयार छौँ’, सांसद पुनले भने, ‘गणतन्त्र, लोकतन्त्र, सङ्घीयता र समावेशीतालगायत राजनीतिक उपलब्धिलाई अझ उन्नत बनाउँदै लैजानेमा सहकार्य र समन्वय गर्नेछौँ।’

उनले आफ्नो पार्टी लोकतान्त्रिक आचरण, व्यवहार र पद्धतिमा विश्वास राख्ने उल्लेख गर्दै नवयुवा पुस्ताले उठाएका विषयलाई सम्बोधन गर्नेतर्फ सरकारको ध्यान जानुपर्नेमा जोड दिए। तत्कालीन नेकपा (माओवादी)ले २०६४ र नेपाल कम्युनिष्ट पार्टी (नेकपा)ले २०७४ सालमा प्राप्त गरेको जनमत अहिले राष्ट्रिय स्वतन्त्र पार्टी (रास्वपा)ले प्राप्त गरेको उल्लेख गर्दै उनले माओवादी र नेकपाको कमीकमजोरीबाट पाठ सिकेर आगामी यात्रा तय गर्न सुझाव दिए।

राप्रपाका प्रमुख समेतक ज्ञानेन्द्र शाहीले प्रदेश संरचना खारेज गर्न वर्तमान सरकारलाई दुई तिहाइ बहुमत पुर्‍याउन आफ्नो दल तयार रहेको बताएका छन् । बिहीबारको प्रतिनिधिसभाको बैठकलाई सम्बोधन गर्दै शाहीले अनावश्यक प्रदेश संरचना सञ्चालनका लागि वार्षिक १ खर्ब रकम खर्च भइरहेको बताएका हुन् ।

‘देशमा ८८४ जना सांसद छौं । प्रदेश संरचना पाल्न १ खर्ब खर्च हुने अवस्था छ । राजनीतिक दलका कार्यकर्ता सेटल्मेन्ट गर्न ल्याइएको प्रदेश संरचना यही संसद्‌बाट यही सरकारले खारेज गर्छ भने दुई तिहाइ बहुमत पुर्‍याउन १८४ चाहिन्छ १८७ हामी पुर्‍याउँछौं,’ उनले भने ।

काठमाडौं । राष्ट्रिय प्रजातन्त्र पार्टी (राप्रपा) संसदीय दलका नेता ज्ञानबहादुर (ज्ञानेन्द्र) शाहीले भदौ २३ र २४ गतेको ‘जेनजी’ आन्दोलनको निष्पक्ष छानबिन गर्न माग गरेका छन् । बिहीबार (चैत १९) बसेको प्रतिनिधिसभाको पहिलो बैठकमा दलीय आधारमा धारणा राख्ने क्रममा उनले यस्तो बताएका हुन् ।

“जेनजी आन्दोलनमा ७६ जना युवाहरूले आफ्नो जीवन बलिदान गरे । २५ सयभन्दा बढी युवाहरू घाइते भए । अपांग भए । राष्ट्रसेवक प्रहरीको घाँटी रेटीरेटी क्रूरतापूर्वक हत्या भयो । निष्पक्ष छानबिन भएर कारबाही होस्, म यो सरकारलाई यो अपिल गर्न चाहन्छु,” शाहीले थपे ।

तत्कालीन सरकारको घमण्डले देश नै अशान्तिको ज्वालामा होमिएको उनले टिप्पणी गरे । “अघिल्लो सरकारको घमण्डले सरकार मात्रै ढलेन, देश नै अशान्तिको ज्वालामा होमियो । सिंहदरबार जले, भौतिक संरचनाहरू ढले । संसद् भवन समेत जल्यो,” उनले भने ।

उनले अगाडि भने, “आज एउटा बैठक कक्षलाई संसद् भवन मानेर कार्य सञ्चालन गरेका छौँ । यो अहिलेको सरकारलाई हेक्का रहोस् ।”

काठमाडौं । श्रम संस्कृति पार्टीका अध्यक्ष हर्क साम्पाङले एमसीसी खारेजीको प्रस्ताव गरेका छन् ।

उनले प्रतिनिधिसभाको बैठकमा सम्बोधन गर्दै यस्तो बताएका हुन्।

उनले राखेका धारणा बुँदागत रुपमा

-मनको विचारभन्दा पनि जनताले के का लागि यहाँ पठाएका हुन् भनेर बुँदागत रुपमा बाचन गरेर सुनाउन चाहन्छु ।

-हामी सबै देश बनाउन भनेर आएका हौँ । सबैभन्दा पहिला आफैँले आफैँलाई बदलौँ

-पहिलो बैठक १२ मिनेट ४६ सेकेन्ड र आजको बैठक १६ मिनेट ५५ सेकेन्ड ढिला भयो । प्रत्येक मिनेटको महत्व सदनले बुझोस् र हामी सबैले बुझौँ ।

-विभेदको अन्त्य गर्ने भन्ने सत्तापक्ष र प्रतिपक्षलाई समयमै विभेद गरिएको छ ।

-हामीलाई आफ्ना क्षेत्रका माग राख्न प्रशस्तै समय दिनुपर्छ ।

-म आफ्नो मनको कथा गाउन चाहन्न ।

-पृथ्वी रहुन्जेल देश रहनुपर्छ । स्वाधिनता, भूराजनीतिक सन्तुलन बचाइराख्न, एमसीसी खारेज गर्नुपर्छ ।

-छिमेकीले गरेका गतिविधिमा सरकारले निगरानी राख्नुपर्छ । सिमानाको रक्षामा नेपाल सेना खटाउनुपर्छ ।

– प्रत्यक्ष निर्वाचित हुनेगरी नीति तथा कार्यक्रम अघि बढोस्

– डिस्कोर्ड चलाएर स्कुल ड्रेसमा बालबालिका बोलाउने, २३ गतेको घटना घटाउने, भदौ २४ गते सरकारी भवन जलाउने मान्छेलाई पनि कारबाहीमा ल्याउन आयोग गठन गर्नका लागि हामी माग गर्दछौँ ।

-सबैभन्दा पहिला अघिल्लो सरकारमा रहेका सबै मन्त्री र सांसदको सम्पत्ति छानबिन हुनुपर्छ । हामीबाट सुरु हुनुपर्छ । हामीले नियम बनाउने हो भने हामीबाटै सुरु गर्नुपर्छ ।

-शिक्षालाई उत्पादन र आविष्कारसँग जोड्नुपर्छ । त्यसतर्फ सरकारले ध्यान दिओस् । हप्तामा तीन दिन थ्योरी पढ्ने बाँकी उत्पादनसँग जोडिने शिक्षा हुनुपर्छ

-खेतीको समस्या हल नगरी अन्य समस्या हल गर्न सक्दैनौँ ।

-एक पालिकामा एउटा उद्योग र एक घरमा एक रोजगार हुनुपर्छ । बन्द गरिएका उद्योग खोल्ने र नयाँ खोल्ने नीति हुनुपर्छ ।

-प्राकृतिक स्रोत र साधनको सदुपयोग गर्न पाउनेगरी नियम कानुन बनाउनुपर्छ ।

-देशभरि शान्ति सुव्यवस्था हुनुपर्छ । खानेपानी, स्वास्थ्य सेवामा ध्यान दिनुपर्छ ।

-सरकारले हतारमा निर्णय गर्नुहुँदैन । प्रतिपक्षलाई पनि विश्वासमा लिएर निर्णय गर्नुपर्छ । वृद्धभत्ता, विद्यार्थी संगठन सम्बन्धमा गरिएका निर्णय फिर्ता हुनुपर्छ । जनताको घर भत्काउने काम बन्द गरिनुपर्छ ।
उपत्यका बाहिर पनि नेपाल छ भन्ने बुझ्नुपर्छ ।

सम्पत्ति शुद्धीकरण अनुसन्धानमा रहेका व्यवसायी दीपक भट्टलाई प्रहरीले पक्राउ गरेको छ।

प्रहरीको केन्द्रीय अन्सन्धान ब्युरो (सीआईबी)ले व्यवसायी भट्टलाई काठमाडाै‍काे नक्साल गैरीधाराबाट पक्राउ गरेको प्रहरी वरिष्ठ उपरीक्षक शिवकुमार श्रेष्ठले जानकारी दिए।

भट्टमाथि सम्पत्ति शुद्धीकरण अनुसन्धान विभागले अनुसन्धान सुरु गरेको छ। भट्टको राहदानी कालोसूचीमा राख्न सोमबार सम्पत्ति शुद्धीकरणले अध्यागमनलाई पत्र पठाएको थियो। सो पत्रका आधारमा भट्टको राहदानी कालोसूचीमा राखिएको थियो। ्भ

ट्टमाथि विभिन्न ठुला ठेक्का र खरिदमा चलखेल गर्ने गरेको आरोप छ।  नागरिकन्युज

काठमाडौं : नेपाली कांग्रेसका नेता भिष्मराज आङदेम्बेले अहिलेको संसदले नागरिकमा नयाँ आशा जगाउन सक्नु पर्ने बताएका छन् । प्रतिनिधिसभाको बिहीबारबाट सुरु भएको वैठकलाई सम्बोधन गर्दै नेता आङदेम्बेले प्रतिनिधिसभामा सहभागी सदस्यहरुको आवद्धता र राजनीतिक आस्था फरक–फरक भए पनि देश एउटै भएको बताए ।

उनले भने, ‘त्यसैले देश डुबे सँगै डुब्छौं, उठे सँगै अगाडि बढ्छौं ।’ उनले अब विगतका गल्तीहरुबाट पाठ सिक्दै यो संसदले सबै एक भएर देश विकासका लागि अगाडि बढ्ने संकल्प गर्नुपर्ने बताए ।  उनले कांग्रेसले नविनतामा निरन्तरताको मान्यता राख्ने भएकाले जेनजीको माग निष्कर्षमा पुर्‍याउन कांग्रेस खबरदारी गर्न प्रतिवद्ध रहेको बताए ।

नेकपा एमालेका सांसद रामबहादुर थापाले देश जलाउने खलपात्रलाई नायक बनाइएको दाबी गरेका छन् ।

बिहीबार प्रतिनिधिसभाको बैठकमा बोल्दै उनले जादुमयी विजयजस्तो देखिए पनि रास्वपाको जित स्वाभाविक नभएको बताएका हुन् ।

‘जादुमयी विजयको लागि बाह्य पक्ष, टीओबी एआई, अल्गोरिदम धेरैले काम गरे । देश जलाउने खलपात्रलाई नायक बनाइयो । उनीहरूले उनीहरूले निर्णायक भूमिका खेले,’ उनले भने, ‘रास्वपाको चामत्कारिक विजयले असाधारण प्रश्न उठाएको छ ।’

उनले कुन उद्देश्यले सिंहदबार, संसद भवन, सर्वोच्च, नेताको घर सुनियोजित ढंगले जलाइयो भन्दै प्रश्न गरेका छन् । हतियारधारी टिओबी जेन–जी विद्रोहमा उपस्थित भएको कुरालाई पनि उनले पनि शंकास्पद रूपमा उठाए । साथै, पूर्वप्रधानमन्त्री र गृहमन्त्रीलाई कुन उद्देश्यले पक्राउ गरियो भन्दै उनले प्रश्न उठाएका छन् ।

राष्ट्रिय स्वतन्त्र पार्टी (रास्वपा)का सभापति रवि लामिछानेले आफूहरूमाथि चौबिसै घण्टा निगरानी गर्न आग्रह गरेका छन् । प्रतिनिधि सभाको बैठकमा उनले विपक्षी दललाई लक्षित गर्दै आफूहरुलाई निरन्तर खबरदारी गर्न आग्रह गरे ।

सम्बोधनका क्रममा उनले भने, ‘प्रतिपक्षीमाथि मेरो अनुरोध छ, हामीमाथि चौबिसै घण्टा निगरानी राख्नुहोला ।’

सभापति लामिछानेले आफ्ना सांसदहरूलाई प्रश्न सोधेर आएको सम्झाउँदै जिम्मेवारी पनि उति नै रहने बताए । उनले भने, ‘जनताले हामीलाई दिएको विशाल बहुमतको इतिहास, यो पनि फेरि गुमेको अवसर भन्यौं भने हामी फेरि कलंकित हुनेछौं । हामीलाई त्यो मञ्जुर छैन । रास्वपाका साथीहरूलाई म यो सम्झाउँछु, हामी प्रश्न सोधेर आएका हौं । अहिले बस्ने ठाउँ फेरियो होला । आज पनि ती प्रश्नप्रति हाम्रो नैतिक जिम्मेवारी उति नै छ ।’

राष्ट्रिय स्वतन्त्र पार्टी (रास्वपा) का सभापति रवि लामिछानेले आफूहरू सिंहदरबार चलाउन नभई बदल्न आएको बताएका छन्।

बिहीबार संसदको पहिलो बैठकलाई सम्बोधन गर्दै उनले वर्तमान सरकारलाई प्राप्त झन्डै दुई तिहाइको मतादेशको ऋण काम गरेरै तिर्ने दाबी गरेका छन्।

आफूहरूभन्दा पनि आफ्नो काम बोल्ने र त्यसको सुरुवात भइसकेको उनले सुनाए। अब देशको विकासले रफ्तार लिने उनको भनाइ छ।

प्राप्त विशाल जनमत खेर जान नदिने अठोट व्यक्त गर्दै उनले भने, ‘जनताले हामीलाई दिएको विशाल बहुमतको इतिहास यो पनि फेरि गुमेको अवसर भनेर लेखियो भने हामी कलंकित हुनेछौं। हामीलाई त्यो मन्जुर छैन।’ आफूहरूलाई समस्या देखाउन मात्र नभई त्यसको समाधान गर्न पनि आउने उनले बताए।

काठमाडौँ । राष्ट्रिय स्वतन्त्र पार्टी (रास्वपा) का सभापति रवि लामिछानेले आफ्नो पार्टीले पाएको जनमत सरकार चलाउनका लागि मात्र नभई व्यवस्था र कार्यशैली बदल्नका लागि भएको बताएका छन्।

प्रतिनिधि सभाको पहिलो बैठकलाई बिहीबार सम्बोधन गर्दै उनले रास्वपाले प्राप्त गरेको मत जनताको आशा र आक्रोशको प्रतिविम्ब भएको बताए। उनले जिम्मेवार भएर जनमतको भावनाअनुसार अघि बढ्ने र जनताले परिवर्तनकै लागि रास्वपालाई रोजेकाले उक्त मतादेशको कदर गर्दै गुण तिर्ने प्रतिज्ञा समेत गरे।

सम्बोधनका क्रममा लामिछानेले पार्टी र सरकारले अब बोलेर भन्दा पनि काम गरेर जनतामाझ आफ्नो औचित्य प्रमाणित गर्नुपर्ने बेला आएको बताए। उनले भने, “हामीले पाएको मत समर्थनको मात्र होइन, परिवर्तनको मत हो। हामीलाई जनताले दिएको म्यान्डेट सिंहदरबार चलाउन होइन, सिंहदरबार बदल्न हो र हामीले त्यो बदल्न सुरु गरिसकेका छौँ।”

रास्वपाका हरेक सांसदले आफ्नो कामबाटै पार्टी र सरकारलाई प्रमाणित गर्नुपर्नेमा जोड दिँदै उनले अब सरकारका कामहरूले नै जनताका पक्षमा बोल्ने विश्वास व्यक्त गरे। सुशासनको सवालमा कुनै पनि किसिमको सम्झौता नगर्ने दृढता व्यक्त गर्दै उनले जनताको भरोसालाई टुट्न नदिने प्रतिबद्धता जनाए।

 

नेकपा एमालेले अध्यक्ष केपी शर्मा ओलीको रिहाइको माग गरेको छ।

प्रतिनिधि सभाको आजबाट सुरू भएलगत्तै बोल्दै एमाले सांसद गुरू बरालले अध्यक्ष ओली र पूर्वगृहमन्त्री रमेश लेखकको रिहाइको माग गरेका हुन्।

‘आज देशमा संविधानको बर्खिलाप गतिविधि भइरहेका छन्। फौजदारी अपराध संहिताको धारा ८१ र ८२ को गलत प्रयोग गरी हाम्रो अध्यक्ष केपी शर्मा ओली र पूर्वगृहमन्त्री रमेश लेखकलाई पक्राउ गरिएको छ,’ बरालले संसदमा भने, ‘उहाँहरूलाई अविलम्ब रिहा गरियोस्।’

उनले गौरिबहादुर कार्की आयोगको प्रतिवेदनले भदौ २३ बारे बोलेको तर २४ गतेको कुनै कुरा नउठाएको भन्दै अहिले सरकारले समिति बनाएर छानबिन गर्ने कुराप्रति पनि प्रश्न उठाए।

‘एउटै घटना दुईवटा आयोग बनाएर छानबिन गर्ने कुरा कति उचित हो?,’ उनको भनाइ थियो।

अध्यक्ष ओली पक्राउबारे एमालेले देशव्यापी शान्तिपूर्ण आन्दोलन गरेको तर सरकारले दमन गरेको बताए। प्रतिनिधि सभा सदस्य शाजिदा सिद्धिकि, विष्णुमाया विकलगायत एमालेका नेता–कार्यकर्तालाई घाइते बनाइएको भन्दै सरकारी दमनको पनि छानबिन गर्न गृहमन्त्री सुधन गुरूङ समक्ष माग गरे।

काठमाडौं – प्रतिनिधि सभाको पहिलो बैठकमा प्रधानमन्त्री बालेन्द्र शाहसहित मन्त्रिपरिषद्का सबै सदस्यहरू उपस्थित भएका छन्। बैठकमा सत्तापक्ष र प्रतिपक्षका शीर्ष नेताहरूको समेत उल्लेखनीय उपस्थिति देखिएको छ।

प्रधानमन्त्री शाहसँगै अर्थमन्त्री डा. स्वर्णिम वाग्ले, शिक्षामन्त्री सस्मित पोखरेल, परराष्ट्रमन्त्री शिशिर खनाल, उद्योगमन्त्री विराजभक्त श्रेष्ठ, संघीय मामिला तथा सामान्य प्रशासनमन्त्री प्रतिभा रावल, कानुनमन्त्री सोविता गौतम लगायत मन्त्रीहरू बैठकमा सहभागी भएका हुन्।

पहिलो बैठक भएकाले विभिन्न राजनीतिक दलका शीर्ष नेतृत्वको सक्रिय सहभागिता देखिएको छ।

काठमाडौँ । फागुन २१ गते सम्पन्न निर्वाचनबाट आएको प्रतिनिधिसभाको बैठक सुरु भएको छ ।

सिंहदरबारस्थित पुतली बगैचामा निर्माणाधिन संसद् भवनको बहुउद्देश्यीय हलमा बैठक सुरु भएको हो ।
प्रतिनिधि सभाका ज्येष्ठ सदस्य नेपाली कांग्रेसका सांसद् अजुननरसिंह केसीले बैठक सञ्चालन गरिरहेका छन् ।

पहिलो बैठकमा प्रतिनिधि सभामा प्रतिनिधित्व गर्ने दलका शीर्ष नेताले सम्बोधन गर्ने तय भएको छ । सरकारको सिफारिसमा राष्ट्रपति रामचन्द्र पौडेलले दिउँसो २ बजे बैठक आह्वान गरेका थिए ।

प्रतिनिधि सभाको आज (बिहीबार) बस्ने बैठकमा पूर्वप्रधानमन्त्री तथा नेपाली कम्युनिस्ट पार्टीका संयोजक पुष्पकमल दाहाल ‘प्रचण्ड’ले सम्बोधन नगर्ने भएका छन्।

पार्टीको तर्फबाट नेता वर्षमान पुनले मन्तब्य राख्न नाम टिपाएका संघीय संसद् सचिवालयले जनाएको छ।

सचिवालयका प्रवक्ता एकराम गिरीले नेकपाको तर्फबाट पुनले मन्तब्य राख्न नाम टिपाएका  जानकारी दिए। उनका अनुसार आजको बैठकमा राष्ट्रिय स्वतन्त्र पार्टीको तर्फबाट सभापति रवि लामिछाने, नेपाली कांग्रेसका सांसद भीष्मराज आङ्देम्बे एमालेबाट रामबहादुर थापा बादलले मन्तब्यको लागि नाम टिपाएका छन्। नागरिकन्युज