Month: August 2025

कञ्चनपुर– कञ्चनपुरकै बेलडाँडी गाउँपालिका–२ सिहपालकी १८ वर्षीया सम्झना भट्टको मृत्यु प्रकरणको अनुसन्धानका लागि तीन जनाई पक्राउ गरेको प्रहरीले चौथो पात्र समेत नियन्त्रणमा लिएको छ।

गएको आइतबार साँझ झुन्डिएको अवस्थामा उनको शव घरमै फेला परेको थियो। सो विषयमा अनुसन्धानका लागि कैलालीको धनगढी विमानस्थलबाट बेलडाँडीकी पूजा भट्टलाई पक्राउ गरेको हो।

माइती पक्षले दिएको किटानी जाहेरीका आधारमा उनलाई पक्राउ गरिएको हो। यसअघि मृतक युवतीका श्रीमान् पवन भट्ट, ससुरा हरिदत्त भट्ट, सासू किरण भट्टलाई प्रहरीले पक्राउ गरेको थियो।

मृतक युवतीका माइती पक्षले प्रहरीसमक्ष बुझाएको एउटा अडियोमा सम्झनाको हत्या गर्न पूजाले भाइ पवनलाई आदेश दिएको पाइएको बताइन्छ।

‘सम्झनालाई मारे पनि पाँच वर्ष त सजाय हुने हो, भाइ मार्दे’ भन्ने शब्द प्रयोग गरिएको दाबी प्रहरी स्रोतले गरेको छ।

प्रनाउ बोहोराले उक्त अडियोको विषयमा पनि छानबिन भइरहेको बताए। शुक्रबार पवनकी दिदी पूजालाई पनि नियन्त्रणमा लिएर आत्महत्या गर्न दुरुत्साहन दिन नहुने शीर्षकमा मुद्दा दर्ता गरी अनुसन्धान अगाडि बढाइएको डीएसपी बोहोराले जानकारी दिए।

घटनाको अनुसन्धान गरी दोषीउपर कारबाहीको माग गर्दै मृतकका माइती पक्षले शव उठाउन मानेका थिएनन्। मृतकको शव महाकाली प्रादेशिक अस्पतालमा राखिएको थियो।

घटनामा संलग्न रहेको आरोपमा मृतकका माइती पक्षले चार जनामाथि किटानी जाहेरी दिएका छन्।

पूजालाई पक्राउ नगरुन्जेल शव नउठाउने अडानमा माइती पक्ष थिए। शुक्रबार पूजा पक्राउ परेपछि सम्झनाका माइती पक्षले शवको दाहसंस्कार गरेका छन्। साउन १८ गते बिहान बेलडाँडी गाउँपालिका–२ स्थित सिंह पालटोलमा घरभित्र झुन्डिएको अवस्थामा सम्झना मृत फेला परेकी थिइन्।

पति पवनले सम्झनालाई मानसिकलगायतका यातना दिएको आरोप लगाइएको छ। प्रेम विवाह भए पनि यस प्रकरणले हत्यासम्मको खेल भएको सम्झनाका माइतीको दाबी रहेको थियो।

काठ्माण्डौँ- नेशनल प्याब्सनलगायत चार संघ सस्थाले  शिक्षा ऐनमा समुचित व्यवस्था गर्नुपर्ने माग राखेका छन् । हिसान, नेशनल प्याब्सन, एन प्याब्सन र प्याब्सनले संयुक्त रूपमा विज्ञप्ति जारी गर्दै साउन २८ गतेसम्मको अल्टिमेटम दिँदै माग अघि सारेका हुन् ।

आइतबार पत्रकार सम्मेलन गर्दै संघले शैक्षिक सरोकारवालाका विषयहरू विद्यमान कानुनी व्यवस्था र कानुनबमोजिम स्थापना भई सञ्चालन भएका संस्थाहरूको स्थायित्वलाई समेत मध्यनजर गरी कुनै पूर्वाग्रह नराखी निर्माणाधीन शिक्षा ऐनमा समुचित व्यवस्था गर्नुपर्ने माग राखेका हुन् ।

राज्यले गर्न नसक्ने काम निजी क्षेत्रबाट प्रवाह गराउन खोज्नु अत्यन्तै अव्यवहारिक र राज्यलाई अनुत्तरदायी बनाउने प्रयास भएको उनीहरूको भनाई छ ।

ती संस्थाहरूले निजी विद्यालयहरूलाई क्रमशः गैर नाफामूलक बनाइनेछ भन्ने वाक्यांश हटाइनु पर्ने, पूर्ण छात्रवृत्ति भन्ने शब्द हटाइनुपर्ने, हाल अभ्यासमा रहेको जम्मा विद्यार्थी सङ्ख्याको दश प्रतिशत छात्रवृत्ति दिने प्रावधानलाई निरन्तरता दिइनुपर्ने, छात्रवृत्ति अन्तर्गत भर्ना शुल्क, वार्षिक शुल्क र मासिक पढाइ शुल्क कायम हुनुपर्ने माग अघि सारेका छन् ।

विधेयकमा संशोधन नगरिए आगामी श्रावण २९ गतेदेखि आन्दोलन गर्न बाध्य हुने समेत उनीहरूले चेतावनी दिएका छन् ।

काठमाडौं । राष्ट्रिय मानव अधिकार आयोगले कैलालीमा कैदीहरुबीच झडप भएपछि जिल्ला कारागार प्रशासनलाई १५ दिनभित्र स्पष्ट विवरण पेस गर्न निर्देशन दिएको छ।

सुदूरपश्चिम प्रदेशस्थित राष्ट्रिय मानव अधिकार आयोग, धनगढी कार्यालयले आज जिल्ला कारागारलाई पत्र पठाउँदै प्रशासनलाई १५ दिनभित्र स्पष्ट विवरण पेस गर्न निर्देशन दिएको हो।

साथै, कैदीबन्दीको अधिकारको संरक्षण, व्यवस्थापन सुधार र आन्तरिक सुरक्षाका लागि गरिएको प्रशासनिक तथा समन्वयात्मक पहलहरूको प्रतिवेदन माग गरिएको छ।

कार्यालयले जिल्ला कारागार, कैलालीमा रहेका करिब ५९० जना कैदीबन्दीहरूको संयुक्त निवेदनपछि कारागारभित्रको अवस्था र मानव अधिकार उल्लंघनका घटनाप्रति गम्भीर ध्यानाकर्षण गराएको छ।

आयोगमा प्राप्त निवेदनमा कैदीबन्दीहरूले कारागार प्रशासनसँगको असहज सम्बन्ध, आन्तरिक व्यवस्थापनमा पारदर्शिताको अभाव, गैरकानुनी आर्थिक लेनदेन, लागुऔषध तस्करी, बाह्य व्यक्तिहरूसँग अवैध सम्पर्क गराउने, मनमुटाव र मुठभेडको अवस्था सिर्जना गराउने प्रयास, चौकीदाररनाइकेको छनौटमा अनियमिता, र रातारात कैदी स्थानान्तरणजस्ता गम्भीर आरोपहरू उल्लेख गरेका छन्।

निवेदनमा विशेष गरी असार ३० को राति १० बजेतिर दुई वटा सरकारी सवारीसाधनसहित प्रशासन र प्रहरी टोलीको उपस्थितिमा स्थानान्तरणको प्रयास गरिएको घटनालाई उदाहरणस्वरूप उल्लेख गरिएको छ, जसलाई कैदीबन्दीहरूले धम्कीको रुपमा व्याख्या गरेका छन्।

कैलाली- कैलाली जिल्ला कारागारमा शुक्रबार मध्यरातमा भएको झडप र एक कैदीको मृत्युपछि उत्पन्न तनावग्रस्त स्थितिलाई लिएर केन्द्र र प्रदेश सरकार गम्भीर बनेको छ।

घटनाको समीक्षा र आगामी रणनीति तय गर्न नेपाल सरकारका गृहमन्त्री रमेश लेखक र सुदूरपश्चिम प्रदेशका मुख्यमन्त्री कमलबहादुर शाहबीच शनिबार आकस्मिक भेटघाट भएको छ।

भेटमा कारागारभित्रको भयावह अवस्था, सुरक्षा व्यवस्थापनमा भएको गम्भीर चूक, प्रदेशको समग्र शान्ति सुरक्षा र विपद् व्यवस्थापनका विषयमा महत्त्वपूर्ण छलफल भएको जनाइएको छ।

शुक्रबार मध्यरातमा ‘नन्दु सरकार’ भनेर चिनिने नवीन रावलको समूहले अर्काे समूहका कैदीहरू सुतिरहेको ब्लकमा पर्खाल फोडेर पसी खुकुरी, रड र चक्कुले अन्धाधुन्ध आक्रमण गरेको थियो।

उक्त सांघातिक हमलामा ४० वर्षीय कैदी भरत चौधरीको मृत्यु भएको छ भने करिब ४९ जना घाइते भएका छन्। घटनाको मूल जड ‘नन्दु सरकार’ र जयन्द्र शाह समूहबीच लामो समयदेखि चल्दै आएको गुण्डागर्दी र दुस्मनी हो। जुन २०७८ मा भएको भूपेन्द्र बडूवाल हत्याकाण्डसँग समेत जोडिएको छ।

कारागार प्रशासन र जिल्ला सुरक्षा संयन्त्रको गम्भीर लापरबाहीका कारण घटना भएको स्पष्ट देखिन्छ। आक्रमण हुनुभन्दा एक दिनअघि बिहीबार मात्रै दुई समूहबीच झडप हुँदा पाँच जना घाइते भएका थिए।

पटक-पटक तनाव हुँदा र सम्भावित हिंसाको सूचना पाउँदासमेत प्रशासनले सतर्कता अपनाएको देखिएन, जसको परिणाम स्वरूप कारागारभित्रै रक्तपातको स्थिति बन्यो।

शुक्रबार रातिको घटनापछि कैलाली कारागार कैदीबन्दीको नियन्त्रणमा छ। उनीहरूले भित्रबाट गेटमा ताला लगाएर सुरक्षाकर्मीलाई प्रवेश गर्न दिएका छैनन्।

कैलाली- कैलाली असार २८ गते कैलाली जिल्ला कारागारमा कैदीहरूबीच हिंसात्मक झडप हुँदा नाइके खगेन्द्र बोगटी गम्भीर घाइते भएका थिए। त्यसै दिन सिडिओ र एसपीकै अगाडि कैदीहरूले जेलर वसन्त खत्रीविरुद्ध नाराबाजी गर्दै कारागारभित्रको मनोमानी अन्त्य गर्न माग गरेका थिए ।

त्यो घटनाको चर्चा सेलाउन नपाउँदै बिहीबार फेरी झडप भयो । त्यसमा ६ जना घाइते भए । ती मध्ये एक जना अझै अस्पतालमै छन् ।
पटक पटक हुने आक्रमण पछि कैलालीका प्रमुख जिल्ला अधिकारी गोगन हमालले कारागारमा सहज बनाउने बताएका थिए ।

शुक्रवार सञ्चारकर्मीहरूसँग प्रजिअ हमालले कैलाली कारागारको समस्या हल भइसकेको प्रतिक्रिया दिएका थिए । ‘कैदीका लिडरलाई बोलाएर सम्झाएका छौँ । अब त्यस्तो समस्या आउँदैन भनेर प्रतिबद्धता गराएका छौँ’ घटनापछि शुक्रवार मेलमिलाप गराउन गएका प्रमुख जिल्ला अधिकारी हमालले पत्रकारहरूलाई भनेका थिए ।

उनले शुक्रवारदेखि नै सुरक्षा रणनीति बनाउने बताए । ‘आजदेखि सुरक्षा रणनीति परिवर्तन गरेका छौँ । पुराना सुरक्षाकर्मीलाई हटाएर नयाँ सुरक्षाकर्मीलाई व्यवस्थापन गरिएको छ ’उनले भनेका थिए ।

कारागारमै पुगेर सुरक्षा बलियो बनाएको बताएको ८ घण्टा नपुग्दै कारागारमा ठुलो कुटपिट भएको हो । ‘हामीलाई घटना हुने भन्नेबारे पहिल्यै थाहा थियो । त्यहाँ विवाद भइरहेको थियो । हामीले प्रहरी प्रशासनलाई पनि भनेका थियौँ तर, कसैले चासो दिनुभएन’ शनिवार अस्पताल बाहिर भेटिएका घाइतेका एक आफन्तले भने ‘प्रहरीले प्रशासनले पहिल्यै चासो राखेको भए, यस्तो घटना हुने थिएन ।’

२२ गते भएको झडप पछि प्रमुख जिल्ला अधिकारीले कारागारमै गएर विवाद मिलाएको बताएका थिए ।‘कारागारमा भएको समस्या समाधान गर्ने प्रमुख जिल्ला अधिकारीज्यूले मिलाउनु भएको थियो तर त्यसको भोली पल्टै अर्को ठुलो घटना भयो ’ स्रोतले भन्यो ‘प्रमुख जिल्ला अधिकारी ज्यूले गम्भीरता देखाउनु भएको भए यस्तो अवस्था सृजना नहुन सक्थ्यो । ’

अधिकृत स्तरका कर्मचारी प्रमुख रहने कारागार अहिले खबरदारले नेतृत्व गरिरहेका गरिरहेका छन् ।कारागारको जिम्मेवारी पाएका खरदार रामकुमार चौधरीले प्रमुख जिल्ला अधिकारी अघिल्लो दिन आएर मेलमिलाप गराएको तर, मध्यरातमा आक्रमण भएको बताए ।

अहिलेसम्म १ जनाको मृत्यु भएको छ भने ४७ जना घाइते भएका छन् । घाइते परिवारहरूले उपचारमा चित्त बुझाएका छैनन् ।कैलाली कारागारको क्षमता १५० कैदीबन्दी भए पनि हाल करिब ७०० कैदीबन्दी छन् । अहिले पनि फेरी घटना हुनसक्ने भन्दै घाइते परिवार तथा कारागारमा रहेका अन्य कैदी बन्दीका परिवारले चिन्ता व्यक्त गरेका छन् ।

घटनापछि राष्ट्रिय मानव अधिकार आयोग सुदूरपश्चिम कार्यालय प्रमुख प्रकाशदत्त भट्टको नेतृत्वमा टोली पनि कारागार पुगेको छ । आयोगले घाइतेको अवस्था र अधिकार सुनिश्चितताबारे तथ्य सङ्कलन गरिरहेको जनाएको छ ।

कैलाली । एक जनाको मृत्यु हुनेगरि झडप भएको कैलाली कारागारको घटनास्थल अहिलेसम्म पनि कैदी बन्दीको कब्जामा रहेको छ ।

कैलाली कारागारमा बिहान प्रमुख जिल्ला अधिकारी गोगन हमालसहितको टोली पुगेको थियो । कारागार प्रशासन सम्म पुगेको जिल्ला सुरक्षा समितिको टोली कैदी बन्दीले घटनास्थलसम्म जान नदिएपछि फर्किएको थियो ।

चारैबाट सुरक्षा निकायका प्रमुखहरूसहित गएको टोली घटनास्थलमा जान नसकेपछि जिल्ला प्रशासन कार्यालयमा आएर सुरक्षा समितिको बैठकले छानबिन समिति बनाउने निर्णय गरेको थियो ।

कैदीबन्दीहरुले भित्रबाट ताला लगाएर थुनुवा कक्षको मूल गेटमा ग्याँस सिलिन्डर राखेका छन् । कोही भित्र प्रवेश गरे सिलिन्डर पड्काएर आगो लगाइदिने चेतावनी दिएका छन् । अहिले राष्ट्रिय मानवअधिकार आयोगको टोली पनि त्यहाँ पुगेको छ । तर, घटनास्थल सम्म पुग्ने अवस्था देखिएको छैन ।

‘हामी अहिले घाइतेहरूको उपचारमा लागिरहेका छौँ घटनास्थलमा जान सकिएको छैन’ जिल्ला प्रशासन कार्यालय कैलालीका सूचना अधिकारी शिवराज जोशीले भने । हिजो राति भएको झडपमा १ जनाको मृत्यु हुनुका साथै ४७ जना घाइते भएका छन् । घटनास्थलमा प्रहरी र मानवअधिकारको टोलीसमेत पुग्न नसक्दा त्यहाँको वास्तविक अवस्था अझै सार्वजनिक हुन सकेको छैन ।

अहिलेसम्म पनि घाइतेका आफन्तहरूले घाइतेलाई भेट्न नदिएको भन्दै आक्रोश व्यक्त गरेका छन् ।