Month: November 2025

काठमाडौं । सर्वोच्च अदालतले प्रहरीको हिरासतमा रहेका मेडिकल व्यवसायी दुर्गा प्रसाईंलाई अदालतमा उपस्थित गराउन आदेश दिएको छ ।

केही दिनअघि मध्यराति प्रसाईंलाई प्रहरीले पक्राउ गरेको थियो । पक्राउविरुद्ध परेको बन्दी प्रत्यक्षीकरणको निवेदनमाथि बिहीबार सुनुवाइ गर्दै सर्वाेच्च अदालतले प्रसाईंलाई अदालतमा उपस्थित गराउन आदेश दिएको हो । प्रहरीले जिल्ला प्रशासन कार्यालयबाट म्याद लिएर उनलाई हिरासतमा राखेको छ ।

आफ्ना बाबुलाई गैरकानूनी थुनामा राखिएको भन्दै प्रसाईंका छोराले दिएको बन्दी प्रत्यक्षीकरण रिटमाथि सुनुवाइ गर्दै न्यायाधीश मेघराज पोखरेलको एकल इजलासले प्रसाईंलाई थुन्नुको कारण पेश गर्न र सर्वोच्च अदालतमा उपस्थित गराउन आदेश दिएको हो ।

काठमाडौं । अख्तियार दुरुपयोग अनुसन्धान आयोगले बाजुराको स्वास्थ्य कार्यालयका तत्कालीन निमित्त प्रमुख अशोककुमार सिंहसहित ६ जनाविरुद्ध भ्रष्टाचार मुद्दा दायर गरेको छ । उनीहरूले १५ लाख आठ हजार ५५७ रुपैयाँ भ्रष्टाचार गरेको अभियोगमा अख्तियारले बिहीबार (मंसिर ४) विशेष अदालतमा मुद्दा दायर गरेको हो ।

अख्तियारले मुद्दा दायर गरेका अरू व्यक्तिमा स्वास्थ्य कार्यालय बाजुराका शिक्षा विकास तथा समन्वय इकाइका तत्कालीन इन्जिनियर सुनेशकुमार चौरसिया, तत्कालीन सबइन्जिनियर नरेश रावत, प्रसूति केन्द्र भवन निर्माण उपभोक्ता समितिका अध्यक्ष पारस रोकाया, सचिव मुना रोकाया र कोषाध्यक्ष खडक ऐडी छन् ।

बाजुराको हिमाली गाउँपालिका–६ स्थित प्रसूति केन्द्र भवन निर्माण कार्य लागत अनुमानानुसार नगरी बढी भुक्तानी गरेर रकम हिनामिना गरेको भन्ने उजुरीपछि अख्तियारले उनीहरूमाथि अनुसन्धान अघि बढाएको थियो ।

उनीहरूले १५ लाख आठ हजार ५५७ रुपैयाँ भ्रष्टाचार गरेको पाइएको अख्तियारद्वारा बिहीबार जारी विज्ञप्तिमा उल्लेख छ । दायर मुद्दामा उनीहरूसँग १५ लाख आठ हजार ५५७ रुपैयाँ बिगो मागदाबी गरिएको छ ।

काठमाडौं । प्रधानमन्त्री सुशीला कार्कीले राष्ट्रिय सुरक्षा परिषद् बैठक बोलाएकी छिन् ।

बिहीबार दिउँसो साढे २ बजे सिंहदरबारस्थित सुरक्षा परिषद्को सचिवालयमा बैठक बस्न लागिएको हो ।

बाराको सिमरामा उत्पन्न भएको परिस्थितिबारे छलफल गर्न बैठक बोलाइएको जनाइएको छ । यसअघि हिजो साँझ पनि गृह मन्त्रालयमा सुरक्षा परिषद्को बैठक बसेको थियो ।

सिमरामा बुधबार जेनजी युवाहरूले विमानस्थलमा तोडफोड गरेका थिए । एमाले नेताहरू जाने भएपछि विरोधमा उत्रिएका युवाहरूले सडकमा आगजनी समेत गरेपछि अवस्था तनावग्रस्त बनेको थियो ।

बुधबार साँझ ८ बजेसम्म कर्फ्यू लगाइएको थियो । आज पुन: अवस्था तनावग्रस्त बनेपछि त्यहाँ कर्फ्यू लगाइएको छ । उक्त घटनाबारे ध्यानाकर्षण गराउँदै शान्ति सुरक्षा मजबुत बनाउन राष्ट्रिय मानव अधिकार आयोगले ध्यानाकर्षण गराएको छ ।

काठमाडौँ । पछिल्लो समयमा अनलाइनबाट ठगी हुने क्रम बढेको भन्दै नेपाल प्रहरीले त्यसबाट जोगिन सात बुँदे अनुरोध जारी गरेको छ । जिल्ला प्रहरी परिसर काठमाडौँले एक सार्वजनिक सूचना जारी गरेर अनलाइन ठगीबाट जोगिन सात बुँदे अनुरोध जारी गरेको हो ।

परिसरका प्रवक्ता पवनकुमार भट्टराईले नागरिक प्रलोभनमा परेर रकम ठगीमा पर्ने गरेका दैनिकजसो घटना आइरहेकाले सचेतनाका लागि सूचना जारी गरिएको बताए । उनका अनुसार सामाजिक सञ्जाल फेसबुक, इमो, ह्वाटस्एप, भाइबर, इन्स्ट्राग्रामलगायत माध्यामबाट ‘तपाईंलाई चिठ्ठा परेको छ, उक्त रकम प्राप्त गर्न केही रकम (राजस्व) तिर्नुपर्छ’ भनी रकम पठाउन लगाउँदै ठगी गर्नसक्ने भएकाले त्यसतर्फ सचेत हुन अनुरोध गरिएको छ ।

सार्वजनिक सूचनामा अनलाइनबाट सामान खरिद गरी रकम भुक्तानी तिर्दा आधिकारिक बिक्रेता यकीन गरी मात्र तिर्न र नगद दिँदा पनि सुरक्षित हुन अनुरोध गरिएको छ । प्रवक्ता भट्टराईले भने, “अपरिचित व्यक्ति वा नम्बरबाट श्रव्यदृश्य सन्देश (भिडियोकल) गरी उक्त कल रेकर्ड गरेर भिडियोलाई अश्लिल बनाएर ‘ब्ल्याकमेल’ गर्ने र पैसा माग्ने जोखिम बढेकाले, त्यसतर्फ पनि सावधान हुनुस् ।”
उनका अनुसार आफ्ना साथीभाइहरू तथा आफन्तले विभिन्न सामाजिक सञ्जालबाट समस्या देखाइ आर्थिक सहयोग मागेमा प्रत्यक्ष सम्पर्क गरी यकीन गरेर मात्रै सहयोग गर्न अनुरोध गरिएको छ । उक्त समयमा खाता ‘ह्याक’ हुनसक्ने भएकाले सचेत हुनुपर्ने जरुरी रहेको उनले बताए । सामाजिक सञ्जाल तथा अन्य अनलाइन माध्याममा सस्तो दरमा सामान देखाएर अग्रिम (एड्भान्स) रकम पठाउन लगाई ठगी हुनसक्ने भएकाले पनि त्यसतर्फ ख्याल गर्न सूचनामार्फत अनुरोध गरिएको छ ।

त्यस्तै अपरिचित वा नयाँ सामाजिक सञ्जालका कुनै पनि ‘लिङ्क’ नखोल्न अनुरोध गर्दै प्रहरीले आफ्नो ‘ओटिपी कोड’ अरुलाई नदिन, आफ्नो मोबाइलको ‘स्क्रिन’ कसैलाई नदिन, सामाजिक सञ्जालमा आफ्ना महत्त्वपूर्ण जानकारी नराख्न, आफ्नो ‘पासवर्ड’लगायत नीजि विवरण साथीभाइ वा नजिकैका आफन्तलाई पनि नदिन अनुरोध गरेको छ ।

काठमाडौँ । मंगलबार बसेको मन्त्रिपरिषद्ले गरेका निर्णय सार्वजनिक गरिएको छ । बुधबार सञ्चार मन्त्रालयमा आयोजित पत्रकार सम्मेलनमा सरकारका प्रवक्ता समेत रहेका सूचना तथा सञ्चार प्रविधिमन्त्री जगदीश खरेलले मन्त्रिपरिषद्ले गरेका २५ निर्णय सार्वजनिक गरेका हुन् ।

निर्णयअनुसार सहिद धर्मभक्त मानव अङ्ग प्रत्यारोपण केन्द्रको कार्यकारी निर्देशकमा डा कल्पना कुमारी श्रेष्ठलाई तोकिएको छ । यस्तै नयाँ व्यवस्था नहुँदासम्म नेपाल एयरलाइन्सको कार्यकारी सञ्चालकमा अमृतमान श्रेष्ठलाई नियुक्त गर्ने, नेपाली सेनाका दुई तथा महासेनानीलाई सहायक रथीमा बढुवा गर्ने, सशस्त्र प्रहरी नियमावली स्वीकृति गर्ने, राष्ट्रपतिसमक्ष अध्यादेश स्वीकृति गर्ने निर्णय भएको खरेलले बताए ।

काठमाडौं । स्थानीय प्रशासनले लगाएको कर्फ्यू आदेश उल्लङ्घन गर्दै युवाहरूले बाराको सिमरामा प्रदर्शन गरेका छन् ।

नेकपा एमालेका नेता–कार्यकर्ता र जेनजी युवाबीचको तनावपछि उत्पन्न हुन सक्ने जोखिम मध्यनजर गर्दै जिल्ला प्रशासन कार्यालय बाराले कर्फ्यू आदेश जारी गरेको छ ।

तर, सिमराको मुख्य बजार क्षेत्रमै ठूलो संख्यामा उपस्थित भएर युवाहरू नारावाजीसहित प्रदर्शन गरिरहेका छन् ।

सुरक्षाकर्मीहरूले माइकिङ गर्दै युवाहरूलाई आआफ्ना घर फर्कन भनिरहेका छन् ।

स्थानीय प्रशासनले गण्डक नहरदेखि पथलैया सडकखण्डको दायाँ–बायाँ ५०० मिटर र सिमरा विमानस्थलको वरिपरि ५०० मिटरसम्म बुधबार दिउँसो १२:३० बजेदेखि राति ८ बजेसम्म कुनै पनि प्रकारको भेला, जुलस, प्रदर्शन, सभा, बैठक, घेराउ लगायतका कार्यक्रम गर्न प्रतिबन्ध लगाएको छ ।

बुधबार बिहानै बाराको मुख्य बजार क्षेत्रमा एमाले कार्यकर्ताले जेनजी अगुवा सम्राट उपाध्ययमाथि हातपात गरेपछि सुरु भएको झडपले विमानस्थल क्षेत्र तनावग्रस्त बनेको थियो।

एमालेले बाराको परवानीपुरमा बुधबार मधेश प्रदेशस्तरीय युवा भेला आयोजना गरेको थियो । त्यसलाई सम्बोधन गर्दै काठमाडौंबाट एमाले उपाध्यक्ष शंकर पोखरेल, पोलिट्ब्युरो सदस्य महेश बस्नेतलगायतका नेता सिमरा आउँदै थिए ।

सो कार्यक्रमलाई लक्षित गर्दै जेनजी अगुवा उपाध्यायले मंगलबार बेलुकी सामाजिक सञ्जालमार्फत् एमालेको कार्यक्रम असफल पार्ने गरी शान्तिपूर्ण विरोध प्रदर्शनको आह्वान गरेका थिए ।

सोही विषयलाई लिएर बुधबार बिहान सिमरा चोकमा एमाले नेता–कार्यकर्ताले उपाध्यायमाथि हातपात गरेका थिए। त्यस पछि आक्रोशित युवाहरू एमाले नेताहरूलाई पछ्याउँदै विमानस्थल  पुगेपछि तनावको अवस्था उत्पन्न भएको थियो ।

काठमाडौंबाट आउन लागेका एमाले महासचिव पोखरेल, पोलिट्ब्युरो सदस्य बस्नेत लगायतलाई स्वागत गर्न बाराका एमाले नेताहरू तथा पूर्वसांसदहरू अच्युत मैनाली, किशान श्रेष्ठ, ज्वाला साह लगायत विमानस्थल पुगेका थिए ।

नेताहरू विमानस्थल भित्र पसेका बेला जेनजी युवाहरूले विमानस्थलको मुख्यगेट ढालिदिएका थिए । उनीहरूले विमानस्थलभित्र ढुंगा तथा सिसाका बोतल प्रहार गर्दै निरन्तर नारावाजी गरेपछि प्रहरीले अश्रुग्यास र लाठीचार्ज गरेको थियो ।

त्यसक्रममा प्रहरी र जेनजी युवाबीच झडप भएको थियो ।

सिमरा विमानस्थल क्षेत्रमा तनाव बढेपछि बुधबार सिमराका लागि निर्धारित सबै उडान रद्द भएका छन् । स्थानीय प्रशासनले  सिमरा एर्पोटमा मध्याह्नदेखि साँझ ८ बजेसम्म कर्फ्यू जारी गरेसँगै उडानहरू प्रभावित भएका हुन्।

सिमराका लागि बुद्ध एयरको आज एक मात्र उडान भएको थियो। त्यो उडानमा नेकपा एमालेका नेताहरू जाने तयारी भएपछि जेनजीहरुले सिमरा एर्पोटमा प्रर्दशन गरेसँगै विमानस्थल तनावग्रस्थ भएको थियो ।

जेनजी विद्रोहपछि काठमाडौंबाट सिमराका लागि हुने सबै उडानहरू रद्द गरिएका हुन् । विमानस्थलमा उडान बन्दसँगै सुरक्षा संवेदनशीलता बढेपछि कर्फ्यू  जारी गरेको बाराका प्रमुख जिल्ला अधिकारी धर्मेन्द्रकुमार मिश्रले बताए ।

कैलाली- अनौपचारिक क्षेत्र सेवा केन्द्र इन्सेकको २९ औँ साधारणसभा कात्तिक २८ गते काठमाडौँमा सम्पन्न भएको छ । साधारणसभाले आगामी तीन वर्षका लागी विजयराज  गौतमको अध्यक्षतामा सात सदस्यीय कार्यसमिति  निर्वाचित गरेको छ ।  केही दिनपछि हुने नवनिर्वाचित कार्यसमितिको बैठकले पदाधिकारीको टुंगो लगाउने इन्सेकले जनाएको छ । यस्तै यस साधारणसभाले सरकार समक्ष पाँच वुदे समसामयिक प्रस्ताव पारित समेत गरेको छ ।

प्रस्तावहरु
१.  गत भदौ २३ र २४ गते नव युवापुस्ताले गरेको प्रदर्शनका क्रममा भएको मानवीय क्षति प्रति यो साधारणसभा दुुःख  व्यक्त गर्दछ । प्रदर्शनका क्रममा भएको मानवीय क्षति, आगजनी तथा लुटपाटका घटनाको निष्पक्ष छानविन गरी संलग्नहरू कानुनी दायराभन्दा बाहिर नहुने सुनिश्चचतताका लागि नेपाल सरकारसँग आग्रह गर्दछौँ । भदौ २३ र २४ गतेको घटनापछि सरकारले गठन गरेको छानविन आयोगले गरिरहेका कार्यहरुले यसको निष्पक्षतामाथि प्रश्न उठेकाले पूर्वाग्रहविना कार्य सम्पादनका लागि साधारणसभा माग गर्दछ ।

२. अन्तरिम सरकारले २०८२ फागुन २१ गतेका लागि घोषणा गरेको प्रतिनिधिसभाको निर्वाचन भयरहित वातावरणमा सम्पन्न गर्ने अवस्था सृजना गर्न नेपाल सरकारसँग यो साधारण सभा आग्रह गर्दछ । घोषित निर्वाचन सफलतापूर्वक सम्पन्न हुनसके मात्रै हालको संवैधानिक संकटबाट देशले मुक्ति पाउने र नवयुवा पुस्ताले उठाएका सुशासनका माग पुरा हुनसक्ने भएकाले निर्वाचनतर्फ ध्यान केन्द्रित गर्न सम्पूर्ण राजनीतिक दललाई आग्रह गर्दछौँ ।

३. भदौ २४ गते नेपालका कारागारबाट फरार भएका करिब पाँचहजार कैदी बन्दी तथा लुटिएका हतियारले सामाजिक अमन चयन तथा आगामी निर्वाचनका लागि खतरा उत्पन्न हुने भएकाले कैदी बन्दी नियन्तरणका लागि विशेष अभियान सञ्चालन गर्नर लुटिएका हतियार फिर्ता ल्याउन आवश्यक संयन्त्र परिचालन गर्न नेपाल सरकारसँग माग गर्दछौँ ।

४. सशस्त्र द्वन्द्धपीडितको न्याय परिपूरणका सवाल विगत १९ वर्षदेखि समाधान हुन सकेको छैन । पीडितको सहमति, संवाद र सहकार्यमा संक्रमणकालीन न्यायको सवाललाई टुंगो लगाउन आवश्यक पहलकदमी लिन यो साधारण सभा नेपाल सरकारको ध्यानाकर्षण गर्दछ ।

५. लोकतन्त्रमा नागरिक संवादको मुख्य आधार नागरिक संस्था हुन् । नेपालका नागरिक संस्था तथा तिनका गतिविधिप्रति बढेको आक्रमणको साधारणसभा गम्भीर सरोकार व्यक्त गर्दछ । नागरिक समाज र नागरिक संस्थाको गतिविधि कमजोर हुँदा लोकतन्त्रलाई संस्थागत गर्न कठिनाइ हुने कुरालाई ध्यानमा राख्न साधारण सभा सरोकारवाला सबैको ध्यानाकर्षण गर्दछ ।