कोलोराडोमा रकी माउण्टेनको शुभकामना साँझ

कोलोराडो, ३० चैत ।
नयाँ वर्ष २०८३ को पूर्व सन्ध्यामा रकी माउन्टेन फ्रेन्डस् अफ नेपाल(आरएफएन)कोलोराडोको आयोजनामा शुभकामना साँझ भव्य रुपमा सम्पन्न भएको छ ।

शनिवार कोलोराडोस्थित नेपाली घरमा आयोजित शुभकामना साँझको प्रमुख अतिथि संस्थाका पूर्व अध्यक्ष बिनोद त्रिपाठी, विशिष्ट अतिथिद्वय संस्थाका पूर्व अध्यक्ष टीका पौडेल र अन्तराष्ट्रिय नेपाली साहित्य समाजका बोर्ड अफ ट्रष्टीका सभापति पदम विश्वकर्माले संयुक्त रूपमा पानसमा बत्ती बालेर कार्यक्रमको उद्घाटन गरे ।

संस्थाकी अध्यक्ष आकृती राइले स्वागत मन्तव्य व्यक्त गर्ने क्रममा सम्पूर्ण अतिथिहरुलाई नयाँ वर्षको शुभकामना दिईन् ।

कार्यक्रममा संस्थाका युवा संयोजक बिष्णु बिबेकको पुस्तक ‘घाट गाउँ’ को प्रमुख अतिथि बिनोद त्रिपाठी, विशिष्टि टीका अतिथि पौडेल, अनेसास बिओटी सभापति पदम विश्वकर्मा, वरिष्ठ समाजसेवी डा.विजयराज शर्मा, आरएमएफएनका अध्यक्ष राई र निवर्तमान अध्यक्ष अर्जुन बगालेले संयुक्त रुपमा विमोचन गरे ।

पुस्तकमाथि साहित्यकार विश्वकर्मा र संस्थाका निवर्तमान अध्यक्ष बगालेले टिप्पणी गरे ।

संस्थाकी अध्यक्ष आकृति राईको सभापतित्वमा सम्पन्न कार्यक्रमको सञ्चालन कल्चर सेक्रेटरी रेखा धौराली र युवा संयोजक बिष्णु बिबेकले गरेका थिए ।

पहिलो चरणको कार्यक्रममा सहयोग गर्नेहरुलाई आयोजकका तर्फबाट सम्मान गरिएको थियो ।
कार्यक्रमको दोस्रो चरणमा विभिन्न कलाकारहरुले गायन तथा नृत्य मार्फत सहभागीहरुलाई मन्त्रमुग्ध बनाए ।

लोकगायक धर्मेन्द्र सेवानको विशेष प्रस्तुती रहेको कार्यक्रममा गायिका संझना पाण्डे, रनिशराज मैनाली, जयराम लामिछाने गीत गाएका थिए । बाल कलाकारहरुले नृत्य मार्फत कार्यक्रमलाई थप सांगीतिक बनाए ।