कवि आचार्यको अंग्रेजी कविता संग्रहको विमोचन
ड्यालस (अमेरिका) । कवि एवं साहित्यकार वैकुण्ठराज आचार्यको नविनतम कृति ‘द व्युटीफूल ग्रे हेयर’ आइतबार टेक्ससको युलेसमा विमोचन गरिएको छ ।
आचार्यद्वारा लिखित यो कृतिमा अंग्रेजी भाषामा लेखिएका १५ वटा कविताहरु समेटिएका छन् । नेपाली सांस्कृतिक तथा आध्यात्मिक केन्द्र (पशुपतिनाथ मन्दिर तथा बुद्ध बिहार) मा आयोजित कार्यक्रमबीच सहभागी सबैले पुस्तकको कभर खोलेर कृतिको अनावरण गरेका थिए ।
कार्यक्रममा कृतिका लेखक आचार्यले आफूले देखेको, भोगेको र अनुभव गरेका सानासाना विषयहरुलाई लिएर अंग्रेजीमा कविता संग्रह निकालेको उल्लेख गरे ।
पेशाले ईन्जिनियर आचार्य लामो समयदेखि अमेरिकामा रहेर साहित्य सिर्जनामा संलग्न छन् । बिभिन्न सामाजीक कार्यमा समेत कृयाशील आचार्यले यस अघि न्यास्रो जन्मभूमिको, आज फेरि, द लस्ट पेबल जस्ता कृति प्रकाशित गरिसकेका छन् ।
कार्यक्रममा समिक्षक तथा इन्जिनियरिङ्ग साहित्यीक समाजका पूर्ब अध्यक्ष विजयराज भट्टराईले स्मृति, प्रेम, वियोग, अभाव, एकान्त, आत्मखोज, जीवन दर्शन, अस्तित्ववोध जस्ता विषयहरुमा रहेर रचिएका कविताहरु कृतिमा रहेको र तिनले पाठकहरुलाई रुवाउने उल्लेख गरे ।
अर्का समिक्षक विनोद रिजालले आफूसँग कवि आचार्यको सामिप्यताका बारेमा चर्चा गर्दै हरेक कविताले मार्मिकता बोकेको बताए । वास्तवमा मानिसले पुस्तक पढ्ने होइन, पुस्तकले मानिसलाई पढिरहेको हुन्छ उनले भने ।
काठमाडौं स्थित त्रिभुवन विश्वविद्यालय अंग्रेजी साहित्य विभागका प्राध्यापक महेश पौडेलले नेपालमा अंग्रेजी साहित्यका पुस्तकहरु निकै कम चर्चा, कम बिक्री हुने गरेको उल्लेख गर्दै आचार्यको आँट र साहसको प्रशंसा गरेका थिए ।
त्यस अवसरमा नेपाल पत्रकार महासंघका पूर्ब अध्यक्ष विपुल पोखरेल, नेपाली समाज टेक्ससका अध्यक्ष विजय भुसालले समेत साहित्यको क्षेत्रमा आचार्यले गरेको योगदानको चर्चा गरेका थिए ।
ट्रेन्डिङ
सम्बन्धित
