साहित्यकार खड्काको ‘नक्सामा नभएको देश’ लोकार्पण

माहे(सेसेल्स)। साहित्यकार तथा अन्तर्राष्ट्रिय नेपाली साहित्य समाज (अनेसास) केन्द्रीय उपाध्यक्ष गणेश खड्काद्वारा लिखित नियात्रा–निबन्धसंग्रह ‘नक्सामा नभएको देश’ लोकार्पण गरिएको छ ।

पूर्वी अफ्रिकी मुलुक सेसेल्सको राजधानी माहे आइल्याण्डस्थित भिक्टोरियामा आयोजित कार्यक्रममा लोकार्पण गरिएको हो ।

लोकार्पण कार्यक्रमका एनआरएनए अफ्रिका क्षेत्रीय संयोजक मनोज विकले नेपालीहरुको जानकारीमा निकै कम आएको र नक्शामा समेत नभएको देश सेसेल्स भ्रमणका क्रममा भोगेका र अनुभव गरेका विषयलाई खड्काले कलात्मक ढंगले लेखेर पुस्तकको रुप दिएको बताए । नेपाली साहित्यमा खड्काले यो पुस्तक प्रकाशन गरेर गुन लगाएका छन्, उनले थपे, यो केववल एउटा पुस्तक मात्र होईन् । एक ऐतिहासिक दस्तावेज हो । हरेक नेपालीले यसलाई सिरानीमा राख्नुपर्छ ।’

पुस्तकका स्रष्टा गणेश खड्काले ‘नक्सामा नभएको देश’ लेख्न आफूलाई निकै मिहिनेत र दुःख समेत गर्नुपरेको बताए । ‘आफू सेसेल्स भन्ने देशमा जागीर खान जान लागेको कुरा गर्दा कसैले नपत्याएको, यो सन्सारमा सेसेल्स भन्ने देश पनि छ र भनी सोधेको, यतिसम्म कि नक्सामा खोज्दा समेत सेसेल्स नामक देश नभेटेपछि यसको बारेमा खोज, अनुसन्धान गरेर केही त लेख्नैपर्छ भनेर लागिपरेको र त्यसैको उपज आज ‘नक्सामा नभएको देश’ पुस्तक प्रकाशन गर्न सफल भएको हो,’ उनले भने ।

एनआरएनए सेसेल्स र अनेसास अफ्रिका महादेशीय च्याप्टरको संयुक्त आयोजनामा भएको उक्त कार्यक्रममा च्याप्टरका सदस्य कवि महेन्द्र भट्टराईले विमोचित पुस्तक ‘नक्सामा नभएको देश’को समीक्षात्मक परिचर्चा गरेका थिए ।

एनआरएनए सेसेल्सका उपाध्यक्ष प्रेमबहादुर चन्दको सभापतित्वमा सम्पन्न कार्यक्रममा अफ्रिका क्षेत्रीय महिला संयोजक खेसेना लिङ्देन विशेष अतिथि रहेकी थिईन् ।

अनेसास अफ्रिका च्याप्टरका महासचिव कवि आरसी राई र सदस्य कवि गायत्री कुलुङले सहजीकरण गरेको लोकार्पण कार्यक्रममा एनआरएनए सेसेल्सकी महिला उपाध्यक्ष पवित्रा भट्टराईले स्वागत मन्तव्य व्यक्त गरेकी थिईन्