सत्यनारायण साफीलाई एमबीबीएस पढ्न पाँच वर्षसम्म मासिक १० हजार सहयोग

सिरहा : उद्योग वाणिज्य संघ लहानका अध्यक्ष विकास शारदाले बरियारपट्टी गाउँपालिका–२ श्रीपुरका सत्यनारायण साफीलाई पढाई अवधिभर एमबीबीएस पढ्न मासिक १० हजार दिने भएका छन्।

आज बिहानै साफीको घरमै पत्नी सीमा शारदा र साथीहरूसहित पुगेर सहयोग गर्ने जनाएका थिए। उनले सम्झौतापत्र नै बनाएर हस्तान्तरण गरेका छन्। यसरी उनको पढाइका लागि व्यक्तिगत रूपमा सहयोग गर्नेहरू ठूलो सहयोग हो। पाँच वर्षमा ६ लाख सहयोग पुग्नेछ।

‘आफूहरूले पहिले बहिनीलाई डाक्टर बनाउन पढाउने इच्छा थियो। त्यतिबेला आर्थिक अवस्था कमजोर भएर पढाउन सकिएन,’ अध्यक्ष शारदाले भने, ‘साफीले मधेसी दलित कोटाबाट मजदुरी गरेरै पूर्ण छात्रवृत्तिमा नाम निकालेपछि अहिले सहयोग गरेका छौँ।’

यसैगरी जिल्ला उद्योग वाणिज्य संघकै निर्वाचनका लागि उम्मेदवारी दिएका प्रदीप कुमार गुप्ताले आफ्नो प्यानलबाट २५ हजार र वाणिज्य संघकै वरिष्ठ उपाध्यक्ष सत्रुधन चौधरीले २५ हजार सहयोग गरेका छन्।

घरमै अध्ययन गरेर साफीले एमबीबीएस पढ्न नाम निकालेका हुन्। होस्टल, कापी/किताब, पोशाक, परीक्षा शुल्क लगायत खर्चका लागि अहिले चौतर्फी सहयोग जुटिरहेको छ।