सुदूरपश्चिममा ८७ प्रतिशत धान रोपाइँ सम्पन्न, कैलालीमा शतप्रतिशत

धनगढी : देशभर सबैभन्दा बढी धान रोपाइँ सुदूरपश्चिम प्रदेशमा सम्पन्न भएको छ। कृषि विभागका अनुसार हालसम्म सुदूरपश्चिममा ८७ प्रतिशत धान रोपाइँ सकिएको छ, जुन अन्य सबै प्रदेशभन्दा उच्च हो।

कृषि ज्ञान केन्द्र कैलालीका सूचना अधिकारी टेकबहादुर बिष्टका अनुसार कैलाली जिल्लामा असार २५ गते नै शतप्रतिशत धान रोपाइँ सम्पन्न भइसकेको छ। उनका अनुसार अनुकूल वर्षा र समयमै खेतमा पानी उपलब्ध भएकाले यस वर्ष रोपाइँ समयमै सकिएको हो।

कृषि निर्देशनालयका अनुसार सुदूरपश्चिमका तराई जिल्ला कैलाली र कञ्चनपुरका अधिकांश क्षेत्रमा धान रोपाइँ सम्पन्न भइसकेको छ। पहाडी जिल्लाका केही उच्च भेगमा भने रोपाइँका काम अन्तिम चरणमा रहेका छन्।

देशभर हालसम्म करिब ५० प्रतिशत धान रोपाइँ सम्पन्न भएको भए पनि सुदूरपश्चिम प्रदेश सबैभन्दा अगाडि रहेको कृषि विभागले जनाएको छ। विभागका अनुसार प्रदेशमा समयमै वर्षा भएकाले रोपाइँले गति लिएको हो।

सम्बन्धित निकायका अनुसार मौसम अनुकूल रहे र बाढी–पहिरोजस्ता प्राकृतिक विपद् नआए बाँकी रहेका क्षेत्रमा पनि चाँडै रोपाइँ सम्पन्न हुने अपेक्षा गरिएको छ।

सुदूरपश्चिमा यस वर्ष प्रि-मनसुनमा परेको पानीका कारण छिटो रोपाई भएको कृषि ज्ञान केन्द्र कैलालीका सूचना अधिकारी बिष्टले बताएका छन्।