मध्य र पश्चिम नेपालमा भारी वर्षाको सम्भावना, सतर्क रहन आग्रह
३१ असार २०८३ १३:०७
काठमाडौं– आगामी केही दिन मध्य र पश्चिम नेपालमा वर्षाको क्रम बढ्दै जाने जल तथा मौसम विज्ञान विभागले जनाएको छ ।
मौसमविद् सञ्जीव अधिकारीका अनुसार बुधबार वर्षा केही कम भए पनि बिहीबारदेखि मध्य र पश्चिम क्षेत्रमा वर्षा बढ्ने सम्भावना छ ।
हाल देशभर मनसुनी वायुको प्रभाव कायम रहेको र मनसुनको न्यूनचापीय रेखा पश्चिमतर्फ उत्तर सरेकाले वर्षाको गतिविधि बढ्ने अनुमान गरिएको हो ।
विभागका अनुसार पछिल्लो १२ घण्टामा बझाङमा सबैभन्दा बढी ५४।८ मिलिमिटर वर्षा मापन भएको छ ।
कोशी, बागमती, गण्डकी र लुम्बिनी प्रदेशका पहाडी तथा केही तराई क्षेत्रमा वर्षाको सम्भावना रहे पनि मधेस प्रदेशमा तुलनात्मक रूपमा कम वर्षा हुने अनुमान छ ।
भारी वर्षा हुन सक्ने क्षेत्रमा नदी–खोला, पहिरो जोखिमयुक्त र कमजोर भू–बनोट भएका स्थानमा आवश्यक सतर्कता अपनाउन विभागले आग्रह गरेको छ ।
ट्रेन्डिङ
ताजा समाचार
सम्बन्धित
