दार्चुलाका सबै पालिकामा बजेट सार्वजनिक

दार्चुला- जिल्लाका नौ वटै स्थानीय तहले आगामी आर्थिक वर्ष २०८३/८४ को बजेट सार्वजनिक गरेका छन्। बुधबारसम्म नाै वटै स्थानीय तहको गाउँ तथा नगरसभामा आगामी आर्थिक वर्षको आयव्ययसहितको बजेट सार्वजनिक गरिएको हो ।

जिल्ला सदरमुकामस्थित महाकाली नगरपालिकाले आगामी आर्थिक वर्षका लागि ६९ करोड ७४ लाख १० हजारको बजेट सार्वजनिक गरेको छ । बुधबार उपप्रमुख दुर्गा खत्रीले बजेट प्रस्तुत गर्दै चालुतर्फ ६० करोड ७४ लाख १० हजार र पूजीगततर्फ ७ करोड ८० हजार र वित्तीय हस्तान्तरण ९६ लाख ३२ हजार बजेट विनियोजन गरिएको जनाए ।

यसअघि नगरसभामा पालिका प्रमुख नरसिंह चैसिरले नगरपालिकाको नीति तथा कार्यक्रम पेश गरेका थिए । नीति तथा कार्यक्रम पेश गर्दै उनले विगतमा नगरपालिकाले सञ्चालनमा ल्याएका कार्यक्रमलाई निरन्तरता दिएको उल्लेख गरेका थिए ।

शैल्यशिखर नगरपालिकाले ८१ करोड ३३ लाख १९ हजारको बजेट सार्वजनिक गरेको छ । उपप्रमुख शान्ति खडायतले बजेट प्रस्तुत गर्दै चालुतर्फ ४२ करोड ८३ लाख ७५ हजार र पूजीगततर्फ ३८ करोड  २९ लाख ४४ हजारको बजेट विनियोजन गरिएको जनाए । यसअघि नगरसभामा पालिका प्रमुख विजयसिंह धामीले पेश गरेको नीति तथा कार्यक्रममा विगतकै कार्यक्रमलाई निरन्तरता दिएको उल्लेख गरेका थिए ।

मालिकार्जुन गाउँपालिकाले आगामी आर्थिक वर्षका लागि ६८ करोड ६९ लाख ३४ हजारको बजेट सार्वजनिक गरेको छ । उपाध्यक्ष कल्यान सिंह धामीले चालुतर्फ ४९ करोड ९० लाख १७ हजार र पूजीगततर्फ १८ करोड ७९ लाख १७ हजार रुपैयाँ विनियोजन गरिएको जनाए । त्यसअघि गाउसभामा पालिका प्रमुख हिरासिंह धामीले गाउँपालिकाको नीति तथा कार्यक्रम पेश गरेका थिए ।

मार्मा गाउँपालिकाले आगामी आर्थिक वर्षका लागि ५१ करोड २३ लाख १२ हजारको बजेट सार्वजनिक गरेको छ । उपाध्यक्ष शर्मीला कुमारी चन्द सिंहले चालुतर्फ ३७ करोड ३५ लाख ५ हजार र पूजीगततर्फ १३ करोड ८८ लाख ७ हजार विनियोजन गरिएको जनाएका छन् । पालिका प्रमुख जमनसिंह धामीले नीति तथा कार्यक्रममा विगतमा सञ्चालनमा ल्याएका कार्यक्रमलाई निरन्तरता दिएको उल्लेख गरेका थिए ।

अपि हिमाल गाउँपालिकाले ४४ करोड ३५ लाख ४४ हजारको बजेट सार्वजनिक गरेको छ । उपाध्यक्ष देवकी बोहराले बजेट प्रस्तुत गर्दै चालुतर्फ २४ करोड ६२ लाख ८२ हजार र पूजीगततर्फ १८ करोड ६९ लाख ५९ हजार विनियोजन गरिएको बताइन् । पालिका प्रमुख भगतसिंह ठेकरे बोहराले विकास निर्माण तथा सेवा प्रवाहलाई प्रभावकारी बनाउने लक्ष्यसहित बजेट ल्याएको बताए ।

दुहुँ गाउँपालिकाले ३७ करोड ७० लाख ७४ हजार रुपैयाँको बजेट सार्वजनिक गरेको छ । उपाध्यक्ष शान्ति बमले चालुतर्फ २८ करोड ७ लाख ४२ हजार र पूजीगततर्फ ९ करोड ६३ लाख ३२ हजार रुपैयाँ विनियोजन गरिएको बताइन् ।

नौगाड गाउँपालिकाले ५२ करोड ७० लाख ९८ हजार रुपैयाँको बजेट सार्वजनिक गरेको छ । उपाध्यक्ष जगतसिंह ठगुन्नाले चालुतर्फ ३३ करोड ६० लाख २२ हजार र पूजीगत १९ करोड १० लाख ७६ हजारको बजेट सार्वजनिक गरेका हुन् । गाउँसभामा पालिका अध्यक्ष दलजितसिंह धामीले पेश गरेको नीति तथा कार्यक्रममा विकास निर्माण तथा सेवा प्रवाहलाई प्रभावकारी बनाउने लक्ष्य रहेको जनाएका थिए ।

ब्यास गाउँपालिकाले आगामी २०८३/८४ का लागि ५५ करोड ३४ हजार रुपैयाँको बजेट सार्वजनिक गरेको छ । पालिका अध्यक्ष मंगलसिंह धामीले पेश गरेको नीति तथा कार्यक्रममा विकास निर्माण तथा सेवा प्रवाहलाई प्रभावकारी बनाउने लक्ष्य रहेको उल्लेख गरे ।

लेकम गाउँपालिकाले ५३ करोड ९४ लाख ८३ हजारको बजेट सार्वजनिक गरेको छ । पालिका अध्यक्ष रामदत्त जोशीले विकास निर्माण तथा सेवा प्रवाहलाई प्रभावकारी बनाउने गरी बजेट ल्याइएको बताए ।