‘पाँच पाण्डव’मा ‘बले’को ठाउँमा सुशील सिटौला

काठमाडौं । चलचित्र ‘पाँच पाण्डव’मा कलाकार सुशील सिटौलाको प्रवेश भएको छ । छायांकन भइरहेको चलचित्रमा कलाकार सिटौला अन्तिम समयमा प्रवेश गरेका हुन् ।

“सुशील सिटौला) मुख्य भूमिकामध्ये एकमा अनुबन्ध हुनु भएको छ । पाँच पाण्डवमध्ये एकको भूमिकामा काम गर्नु हुनेछ,” चलचित्रका प्रस्तुतकर्ता नवीन श्रेष्ठले भने, “हामीले खोजेस्तै अब्बल कलाकार हाम्रो चलचित्रमा भित्र्याएका छौँ ।”

सुशील सागर लम्साल ‘बले’को ठाउँमा ‘पाँच पाण्डव’मा प्रवेश गरेका हुन् । एक युवतीले बलात्कारको आरोप लगाएपछि उनी ‘पाँच पाण्डव’बाट अलग भएको खबर आएको थियो । प्रहरीले नियन्त्रणमा लिएका सागर हाजिरी जमानीमा रिहा भइसकेका छन् ।

वसन्त निरौलाले निर्देशन गरिरहेको चलचित्रमा चलचित्रमा हरिवंश आचार्य, जितु नेपाल, आर्यन सिग्देल, महेश त्रिपाठी, सुशील सिटौला, दीपाश्री निरौला, सरिता गिरी, बिनोद न्यौपाने, रमा थपलिया, प्रशान्त ताम्राकार, इभा गिरीलगायतको अभिनय छ ।

चलचित्र ‘पाँच पाण्डव’ ‘सोसल ड्रामा’ भएको लेखक सुशील पौडेलले बताएका छन् । यो चलचित्रले महाभारतका पाँच पाण्डवका चरित्र र बिम्बलाई प्रयोग गर्दै समकालीन नेपाली समाजको कथा प्रस्तुत गर्नेछ ।

कथा, पटकथा तथा संवाद सुशील पौडेलको रहेको यो चलचित्रलाई श्याम तामाङले खिचिरहेका छन् ।