५१औँ दिनमा ‘लालीबजार’, कति कमायो ?

काठमाडौं । चलचित्र ‘लालिबजार’ प्रदर्शनको ५१औँ दिनमा प्रवेश गरेको छ । वैशाख २५ गतेदेखि प्रदर्शनमा आएको ‘लालीबजार’ले आज (शनिबार) प्रदर्शनको ५१औँ दिन पूरा गरेको हो ।

‘लालीबजार’ले क्यूफएक्स अन्तर्गत भक्तपुर, सिभिल मल, सिटी स्क्वायर, कमलपोखरीको बिग मुभिज, सुन्धाराको सीडीसी सिनेमाज, सितापाइलाको सिके सिमाज, न्युरोडको रञ्जना सिनेप्लेक्स, फ्रेन्ड्स सिनेमाज बुटवल र इलाम, नेपालगञ्जको सिने रोयल प्रदर्शनको ५१ औँ दिन पूरा गरेको छ ।

कार्यकारी निर्माता तथा पटकथाकार प्रदीप भट्टराईले चलचित्रको पाएको सफलतालाई दर्शकसँग साट्न दिनभर विभिन्न हलमा पुगेर दर्शक भेट गर्ने बताए ।

यस वर्ष हालसम्म प्रदर्शनमा आएका नेपाली फिल्महरूमध्ये ‘लालीबजार’ व्यावसायिक रूपमा सबैभन्दा सफल फिल्ममध्ये एक बनेको छ । घरेलु बक्सअफिसमा ९ करोड रुपैयाँभन्दा बढी ग्रसकलेक्सन गरिसकेको फिल्मको यात्रा अहिले १० करोड क्लबतर्फ उन्मुख छ ।

चलचित्रको निर्देशन यम थापाले गरेका हुन् । स्वस्तिमा खड्का, रविन्द्रसिंह बानियाँ, समाइरा थापा, मुकुन्दकुमार श्रेष्ठ, अभय बराल, प्रेम पाण्डेलगायतको अभिनय छ ।