एमालेको दोस्रो विधान महाधिवेशन : सबै तयारी पूरा, अध्यक्ष ओलीले उद्घाटन गर्ने

ललितपुर- नेपाल कम्युनिष्ट पार्टी (एमाले)को दोस्रो विधान महाधिवेशन आगामी भदौ २० देखि २२ गतेसम्म ललितपुरको गोदावरीस्थित सनराइज हलमा हुने भएको छ ।

एमालेले मंगलबार पत्रकार सम्मेलनमार्फत् यसबारे विस्तृत जानकारी दिएको हो। एमालेले यस महाधिवेशनलाई ऐतिहासिक, भव्य र सफल बनाउन आवश्यक तयारी पूरा भइसकेको जनाएको छ।

पार्टी अध्यक्ष एवम् प्रधानमन्त्री केपी शर्मा ओलीले भदौ २० गते बिहान ११ बजे विशेष सत्रमार्फत महाधिवेशनको उद्घाटन गर्नेछन्। उनी अहिले चीन भ्रमणमा छन् । ओली नेपाल आइपुगेलगत्तै विधान महाधिवेशनमा लाग्नेछन् ।

२,०२६ प्रतिनिधि, ३५९ पर्यवेक्षक सहभागी

महाधिवेशनमा देशभरका २,०२६ जना प्रतिनिधि सहभागी हुनेछन् । ३५९ जना पर्यवेक्षक र विभिन्न अतिथिहरू समेत उपस्थित हुनेछन्। पार्टीका अनुसार सहभागीहरूको कुल संख्या करिब २ हजार ३८५ रहनेछ।

निर्णय र छलफल

पार्टीले महाधिवेशनमा ‘निर्णायक राष्ट्रिय शक्ति निर्माण, सुखी नेपाली समृद्ध नेपाल’ भन्ने नाराका साथ महत्वपूर्ण छलफल हुने जनाएको छ।

यस क्रममा पार्टी अध्यक्ष ओलीले राजनीतिक प्रतिवेदन, उपाध्यक्ष विष्णुप्रसाद पौडेलले विधान संशोधन प्रस्ताव र महासचिव शंकर पोखरेलले संगठनात्मक प्रस्ताव पेश गर्नेछन्।

राजनीतिक प्रतिवेदनमार्फत विकसित राष्ट्रिय तथा अन्तर्राष्ट्रिय परिस्थिति, पार्टीको कार्यदिशा, बहुदलीय जनवादको नीतिनुसार समाजवाद निर्माणमा जनताका अपेक्षा, पार्टी नेतृत्वको भूमिका र रणनीति स्पष्ट गरिनेछ।

विधान संशोधनमार्फत् ७० वर्षभन्दा माथिका व्यक्तिलाई पार्टी कार्यकारिणीमा नराख्ने व्यवस्था, जिल्ला कमिटीलाई कार्यकारी रुपमा सञ्चालन गर्ने व्यवस्था, २५ सदस्यीय केन्द्रीय समिति, १५ जना स्थायी पोलिटब्युरो सदस्य र महिलाको अनिवार्य सहभागिताबारे प्रस्ताव गरिनेछ।

व्यवस्थापन र तयारी

महाधिवेशनलाई सफल बनाउन विभिन्न उपसमिति बनाइएको छ। आवास व्यवस्थापनमा इन्जिनियर लालकाजी पोखरेल, जनसम्पर्क व्यवस्थापनमा भानु भक्त ढकाल, स्वास्थ्य व्यवस्थापनमा कृष्णगोपाल श्रेष्ठ, प्रचार व्यवस्थापनमा राजेन्द्र गौतम, यातायात व्यवस्थापनमा विनोद श्रेष्ठ, सांस्कृतिक कार्यक्रम र फाँटफाँटका लागि हरेराम राईलगायतलाई जिम्मेवारी तोकिएको छ।

अपेक्षा

उद्घाटन सत्रमा अध्यक्ष ओलीले प्रस्तुत गर्ने राजनीतिक प्रतिवेदनले मुलुकको राष्ट्रियता, सार्वभौमिकता र जनताको अपेक्षालाई केन्द्रमा राख्ने पार्टीको नीति प्रष्ट्याउनेछ।

उपाध्यक्ष पौडेलले प्रस्तुत गर्ने विधान संशोधन प्रस्तावले पार्टीलाई आधुनिक, उत्तरदायी र जनताको नजिक बनाउने अपेक्षा गरिएको छ।

पार्टी प्रवक्ता राजेन्द्र गौतमले पत्रकार सम्मेलनमा भने, ‘यो ऐतिहासिक महाधिवेशन पार्टीलाई सुदृढ पार्ने मात्र नभई मुलुककै भविष्य निर्माणमा महत्त्वपूर्ण योगदान पुर्‍याउनेछ। पत्रकार साथीहरूको भूमिका पनि यसलाई प्रभावकारी बनाउन अतुलनीय रहनेछ।’

एमालेले यस महाधिवेशनलाई पार्टीको ऐतिहासिक मोडको रूपमा लिएको जनाएको छ। राजनीतिक, संगठनात्मक र विधानसम्बन्धी महत्वपूर्ण निर्णयहरू हुने भएकाले यसले आगामी दिनमा पार्टीको कार्यशैली, नेतृत्व संरचना र नीतिगत दिशामा ठूलो प्रभाव पार्ने गौतमले बताए ।