ऐश्वर्य बहुमुखी क्याम्पसद्वारा विश्व रेडक्रस दिवसको अवसरमा रक्तदान कार्यक्रम

धनगढी । ऐश्वर्य बहुमुखी क्याम्पसद्वारा विश्व रेडक्रस दिवसको अवसरमा रक्तदान कार्यक्रम सम्पन्न गरिएको छ। क्याम्पसको बिबिएस विभागको नियमित कार्यक्रम अन्तर्गत आयोजना गरिएको उक्त कार्यक्रममा ५० पिन्ट रगत संकलन भएको जनाइएको छ।

क्याम्पसमा रहेको हेल्थ युनिट तथा नेपाल रेडक्रस सोसाईटी अन्तर्गतको रक्त सञ्चार सेवा केन्द्रको सहयोगमा कार्यक्रम सञ्चालन गरिएको हो। कार्यक्रममा विद्यार्थी, शिक्षक तथा कर्मचारीहरूको उत्साहजनक सहभागिता रहेको थियो।

क्याम्पसले प्रत्येक विभागमार्फत वार्षिक क्यालेन्डर निर्माण गरी विभिन्न रचनात्मक तथा अतिरिक्त क्रियाकलाप सञ्चालन गर्दै आएको जनाएको छ। सामाजिक उत्तरदायित्व तथा मानवीय सेवाको भावनालाई प्रवर्द्धन गर्ने उद्देश्यले रक्तदान कार्यक्रम आयोजना गरिएको क्याम्पस प्रशासनले जनाएको छ।

कार्यक्रममा सहभागीहरूले रक्तदान जीवनदान भएकाले यस्ता कार्यक्रमले समाजमा सकारात्मक सन्देश प्रवाह गर्ने विश्वास व्यक्त गरेका थिए।