आईसीसी महिला च्यालेन्ज ट्रफी : लगातार दोस्रो हारपछि नेपालको जित

काठमाडौं । लगातार दोस्रो हारपछि नेपालले अन्तर्राष्ट्रिय क्रिकेट काउन्सिल (आईसीसी) महिला च्यालेन्ज ट्रफीमा घरेलु टोली रुवान्डाविरुद्ध ३८ रनको जित निकालेको छ ।

जारी प्रतियोगितामा नेपालले रुवान्डालाई दोस्रोपटक हराएको हो । पहिलो खेलमा पनि नेपाल दुई विकेटले विजयी भएको थियो ।

प्रतियोगितामा नेपालको यो तेस्रो जित हो । जितसँगै नेपाल ६ अंकका साथ तेस्रो स्थानमा छ । नेपालले ६ खेल खेल्दा समान तीन जित र हारको नतिजा निकालेको छ ।

मंगलबार गाहांगा अन्तर्राष्ट्रिय क्रिकेट रंगशालामा नेपालले प्रस्तुत गरेको १०४ रनको लक्ष्य पछ्याएको रुवान्डाले १७.४ ओभरमा सबै विकेट गुमाएर ६४ रन मात्र बनाउन सक्यो ।

रुवान्डाकी कप्तान मेरी बिमेनिमानाले सर्वाधिक १९ रन बनाइन् । जियोभानिस युवासेले १२ रन जोडिन् । अरू ब्याटरले दोहोरो अंकमा रन बनाउन सकेनन् ।

नेपालकी मनीषा उपाध्यायले सर्वाधिक तीन विकेट लिइन् । चार ओभर बलिङ गर्दै एक मेडन फ्याँकेकी उनले १० रन खर्चिइन् । कविता कुँवर, रचना चौधरी र रिया शर्माले समान दुई विकेट लिए ।

त्यसअघि, टस जितेर ब्याटिङ रोजेको नेपालले रुवान्डाविरुद्ध निर्धारित २० ओभरमा सात विकेट गुमाएर १०३ रन बनाएको थियो ।

नेपालकी कप्तान इन्दु वर्माले अविजित ३३ रन बनाइन् । कविता कुँवरले २४, रुविना क्षेत्रीले ११ रन जोडिन् । अरू ब्याटरले दोहोरो अंकमा रन बनाउन सकेनन् ।

रुवान्डाका हेनरिएट इसिम्वेले सर्वाधिक तीन विकेट लिइन् । मेरी बिमेनिमानाले दुई, बेलिसे मुरेक्टेट र रोजिन इरेराले समान एक विकेट लिए ।

तेस्रो हार व्यहारेको रुवान्डाको सात खेलबाट आठ अंक छ । हारका बाबजुद टोली दोस्रो स्थानमा छ ।