संसदीय समितिको सभापतिमा रास्वपाका सांसदहरुले गराए मनोनयन दर्ता

काठमाडौँ । राष्ट्रिय स्वतन्त्र पार्टी (रास्वपा) का सांसदहरूले प्रतिनिधिसभाका विभिन्न विषयगत समिति र दुईवटा संयुक्त समितिको सभापति पदका लागि बिहीबार संघीय संसद् सचिवालयमा उम्मेदवारी दर्ता गराएका छन्।

कुल १२ वटा समितिमध्ये रास्वपाले ११ वटा समितिको नेतृत्वका लागि आफ्ना उम्मेदवारहरू अघि सारेको छ भने सार्वजनिक लेखा समितिमा प्रमुख प्रतिपक्षी दल नेपाली कांग्रेसलाई समर्थन गर्ने निर्णय गरेको छ।

सोही निर्णयअनुसार प्रतिनिधिसभाको कानुन, न्याय तथा मानवअधिकार समितिमा समीक्षा बास्कोटा, कृषि, सहकारी तथा प्राकृतिक स्रोत समितिमा अशोककुमार चौधरी, पूर्वाधार विकास समितिमा आशिष गजुरेल र महिला तथा सामाजिक मामिला समितिमा आकृति अवस्थीले उम्मेदवारी दर्ता गराएका छन्।

त्यसैगरी राज्य व्यवस्था तथा सुशासन समितिमा हरि ढकाल, शिक्षा, स्वास्थ्य तथा सूचना प्रविधि समितिमा ओजश्वी शेरचन, अर्थ समितिमा कृष्णहरि बुढाथोकी, उद्योग वाणिज्य र श्रम तथा उपभोक्ता हित समितिमा रहबर अन्सारी र अन्तर्राष्ट्रिय सम्बन्ध तथा पर्यटन समितिमा सुम्नीमा उदासले मनोनयन दर्ता गराएका छन्।

संयुक्त समितितर्फ संसदीय सुनुवाइ समितिको सभापतिमा बोधनारायण श्रेष्ठ र राज्यका निर्देशक सिद्धान्त, नीति र दायित्वको कार्यान्वयन अनुगमन तथा मूल्यांकन समितिमा गणेश कार्कीले उम्मेदवारी दिएका छन्।

रास्वपा संसदीय दलको बैठकले यी उम्मेदवारहरूको नाम टुङ्गो लगाएको हो भने समितिमा रहने सदस्यहरूको चयन यसअघि नै भइसकेको छ।