आज देशका धेरै ठाउँमा वर्षाको सम्भावना

काठमाडौं । मंगलबार साँझबाट सक्रिय बनेको मौसमी प्रणालीका कारण आज बुधबार देशका धेरै ठाउँमा वर्षा हुने भएको छ। जल तथा मौसम विज्ञान विभागका अनुसार हाल नेपालमा पश्चिमी न्यूनचापीय प्रणाली र स्थानीय वायुको प्रभाव छ। यही प्रणालीका पहाडी र हिमाली भूभागमा हल्का वर्षा भइरहेको छ।

बुधबार भने गण्डकी, लुम्बिनी, कर्णाली र सुदूरपश्चिमका धेरै स्थान तथा कोशी र बागमतीका पहाडी र हिमाली भूभागका केही स्थानमा वर्षाको सम्भावना रहेको मौसमविद् रोजन लामिछानेले बताए। त्यस्तै, मधेश प्रदेशलगायत कोशी र बागमतीका तराई भूभागका थोरै स्थानमा मेघगर्जन, चट्याङ, हावाहुरी र असिनासहित मध्यम वर्षाको सम्भावना छ। गण्डकी, लुम्बिनी, कर्णाली र सुदूरपश्चिमका पहाडी र हिमाली भूभागको एक-दुई स्थानमा भने भारी वर्षाको आकलन पनि गरिएको छ। ‘मधेश, लुम्बिनी, गण्डकी, बागमती र कोशीका पहाडी र तराई भूभागमा केही स्थानमा हावाहुरीको पनि सम्भावना छ,’ मौसमविद् लामिछानेले बताए। बुधबार राति यो प्रणालीले पूर्व र मध्य नेपालमा पनि वर्षा गराउने देखिन्छ।

विभागका अनुसार राति कोशी, मधेश, लुम्बिनी, कर्णाली र सुदूरपश्चिम पहाडी र हिमाली भूभागको धेरै स्थान तथा तराई भूभागका थोरै स्थानमा मध्यम वर्षाको सम्भावना छ। बिहीबार भने यो प्रणाली कमजोर हुने आकलन गरिएको छ। तर, कोशी प्रदेशलगायत देशका पहाडी तथा हिमाली भूभागका केही स्थान तथा मधेशका एक-दुई स्थानमा भने मध्यम वर्षा हुने आकलन छ।