कास्की जिल्ला अदालत पुगेर रविले बुझे तारेख
काठ्माण्डौ- राष्ट्रिय स्वतन्त्र पार्टी (रास्वपा) का सभापति रवि लामिछानेले कास्की जिल्ला अदालत पुगेर बुधबार तारेख बुझेका छन्।
अदालतका सुचना अधिकारी रामबहादुर किसानका अनुसार लामिछानेले सहकारी ठगी, संगठित अपराध र सम्पत्ति शुद्धिकरण मुद्धाको तारेख बुझेका हुन् ।
नख्खु कारागारबाट रिहा भएपछि यसअघि पुस ९ गते लामिछाने कास्की जिल्ला अदालत हाजिर भएर तारेख बुझेका थिए।
लामिछानेले प्रस्ताव गरे अनुसार बिगो बराबर धरौटी बुझाएर रिहा गर्न उच्च अदालत बुटवलले आदेश दिएपछि उनी धरौटी तिरेर नख्खु कारागारबाट रिहा भएका थिए ।
जिल्ला सरकारी वकिलको कार्यालय कास्कीलेले लामिछानेसहित ६३ जनालाई विपक्षी बनाएर पोखराको सुर्यदर्शन बचत तथा ऋण सहकारी संस्थाको १ अर्ब ५१ करोड ठगी गरेको आरोपमा जिल्ला अदालतमा मुद्धा दायर गरेको थियो।
उक्त मुद्धा अदालतमा विचाराधीन छ।
सहकारी ठगी, संगठित अपराध र सम्पत्ति शुद्धिकरण मुद्धामा लामिछानेलाई कास्की प्रहरीले हिरासतमा राखेर अनुसन्धान गरेको थियो।
सरकारी वकिलले अदालतमा मुद्धा जाहेर गरेपछि जिल्ला अदालत कास्कीले थुनछेक आदेश जारी लामिछानेलाई धरौटीमा छाडेको थियो। त्यतिबेला लामिछानेले अदालतमा ६५ लाख रुपैया धरौटी राखेका थिए।
जिल्ला सरकारी वकिलको कार्यालय कास्कीले सूर्यदर्शन सहकारीको रकम अपलचनमा ३ करोड ३७ लाख ६५ हजार बिगो दाबी गर्दै मुद्दा दायर गरेको छ।
यस्तै, सम्पत्ति शुद्धीकरणतर्फ २७ करोड ८९ लाख ४४ हजार ७०५ रुपैयाँ रकम बिगो दाबी गरिएको छ ।
लामिछाने विरुद्ध पोखराको सुर्यदर्शन सहकारीमा सर्वसाधारणले राखेको बचत अवैध तरिकाले गोर्खा मिडिया नेटवर्क मार्फत ग्यालेक्सी टेलिभिजनमा लगेको आरोप छ।
ट्रेन्डिङ
सम्बन्धित
