पूर्ण बहादुरको सारङ्गीको १० दिनको ग्रसकलेक्सन १७ करोड ९८ लाख रुपैया

काठमाडौं, २६ कात्तिक ।
नेपाली चलचित्र ‘पूर्ण बहादुरको सारङ्गी’ले नेपाली चलचित्रको क्षेत्रमा एक साथ थुप्रै रेकर्डहरु कायम गरेको छ । चलचित्र ‘पूर्ण बहादुरको सारङ्गी’ले एकै दिनमा तीन करोड ८९ लाख ग्रसकलेक्सन गरेको छ ।

योसंगै ‘पूर्ण बहादुरको सारङ्गी’ले नेपाली चलचित्रको इतिहासमा एकै दिनमा सबैभन्दा धेरै कमाउने रेकर्ड बनाएको छ । एकै दिन यति धेरै ग्रसकलेक्सन गर्ने यो पहिलो चलचित्र हो ।

शनिबार यो चलचित्रले तीन करोड ८९ लाख ग्रसकलेक्सन गरेको छ । शुक्रबार दुई करोड ९९ लाख ग्रसकलेक्सन गरेको निर्माणपक्षले जनाएको छ । लक्ष्मीपूजाको दिन रिलिज भएको यो चलचित्रले १० दिनमा १७ करोड ९८ लाख ग्रसकलेक्सन गरेको छ । यसका आधारमा यो चलचित्रले अहिलेसम्मकै सर्बाधिक कमाई गर्ने चलचित्रको रेकर्ड कायम गर्ने देखिएको छ ।

यसअघि एकैदिनमा धेरै कमाउने चलचित्र ‘कबड्डी–४’ थियो, जसले पहिलो दिनमा २ करोड ९० लाख ग्रस कमाएको थियो । यसपछि ‘भष्मे डन’ले पहिलो दिन दुई करोड २५ लाख कलेक्सन गरेको थियो ।

यो चलचित्रले सर्वाधिक धेरै शो पाउने चलचित्रको पनि रेकर्ड बनाएको छ । एकै दिन यो चलचित्रले ९८ हलमा ४६५ भन्दा धेरै शो पाएको थियो ।

सरोज पौडेलले निर्देशन गरेको चलचित्रमा विजय बराल, प्रकाश सपूत, मुकुन भुसाल, अञ्जना बराइलीलगायत कलाकारको मुख्य भूमिका छ ।

चलचित्रमा संवाद महेश दवाडीले लेखेका छन् । सेभेन सिस सिनेमा र बासुरी फिल्मसको प्रस्तुति रहेको सिनेमाका निर्माता विनोद पौडेल र प्याट्रिक सुवेदी हुन् ।

कार्यकारी निर्मातामा रमेश चौलागाईं, हरि श्रेष्ठ र रमेश ढकाल छन् । गन्धर्व समुदायका बाबु र छोराको ‍सम्बन्धको कथा रहेको यो चलचित्रले छोराको प्रगतिका लागि बाबुले गरेको संघर्ष देखाएको छ । ।