‘लालीबजार’ प्रकरणमा उच्च अदालत पाटनले माग्यो सक्कल फाइल
काठमाडौं । उच्च अदालत पाटनले चलचित्र ‘लालीबजार’लाई सार्वजनिक प्रदर्शन गर्न दिनेगरी भएको निर्णयसहितको सक्कल फाइल झिकाएको छ । न्यायाधीशद्वय गीताप्रसाद तिम्सिना र दीपक खनालको संयुक्त इजलालसले मंगलबार (आज) सञ्चार मन्त्रालयलगायत निकायका नाममा उक्त आदेश दिएको हो ।
‘लालीबजार’लाई प्रदर्शन गर्न अनुमति दिन निर्णयसहितको फाइल इजलास देखाइ फिर्ता लैजानेगरी उच्च सरकारी वकिल कार्यालयलाई समेत आदेश दिएको छ ।
उक्त चलचित्र प्रदर्शन रोक्न वैशाख १५ गते जारी भएको अल्पकालीन अन्तरिम आदेशलाई निरन्तरता दिँदै बुधबार (भोलि)का लागि दुवै पक्षलाई डाकिएको छ । भोलि चलचित्र प्रदर्शन रोक्न यसअघि जारी भएको अन्तरिम आदेशले निरन्तरता पाउने वा नपाउने विषयको टुंगो लाग्नेछ ।
यसअघि, चलचित्र ‘लालीबजार’को प्रदर्शन तत्कालका लागि रोक्न उच्च अदालत पाटनले अल्पकालीन अन्तरिम आदेश दिएको थियो । अदालतले यही वैशाख २२ सम्म चलचित्र प्रदर्शन रोक्न भनेको थियो ।
न्यायाधीश प्रकाश ढुंगानाको एकल इजलासले वैशाख १५ गते प्रदर्शन रोक्न सञ्चार तथा सूचना प्रविधि मन्त्रालयलगायत निकायका नाममा अल्पकालीन अन्तरिम आदेश दिएको थियो ।
चलचित्रका कतिपय शब्दहरूमा आपत्ति जनाउँदै बादी समुदायको तर्फबाट रोशनी नेपालीले रिट दिएकी थिइन् । वैशाख १४ गते दिएको उक्त रिटमा अदालतले अल्पकालीन अन्तरिम आदेश दिएको थियो ।
उक्त प्रकरणमा मन्त्रालयसहितका निकायलाई १५ दिनभित्र कारणसहितको लिखित जवाफ पेस गर्न समेत आदेश दिएको थियो ।
यम थापा निर्देशित चलचित्र ‘लालीबजार’ यही वैशाख १८ देखि प्रदर्शनको तयारीमा थियो । तर, अदालतको आदेशसँगै यो प्रदर्शन रोकिएको छ ।
चलचित्र ‘लालीबजार’मा स्वस्तिमा खड्का, रवीन्द्रसिंह बानियाँ, समाइरा थापा, मुकुन्दकुमार श्रेष्ठ, अभय बराल, प्रेम पाण्डे, आशा पौडेललगायतको अभिनय छ ।
चलचित्रमा कार्यकारी निर्माता प्रदीप भट्टराई छन् । म्याक्स दीपेश खत्री र रवीन्द्रसिंह बानियाँ निर्माता छन् ।
यो चलचित्रले बादी समुदायका महिलाको कथा उठान गरेको छ । बादी महिलाको कथा उठान गरेको यो चलचित्रको पक्ष र विपक्षमा स्वयं बादी समुदाय देखिएको छ ।
ट्रेन्डिङ
सम्बन्धित
