कञ्चनपुरको बेलौरीमा अवैध साल काठसहित एक जना नियन्त्रणमा

कञ्चनपुर: कञ्चनपुरको बेलौरी नगरपालिका–१० सडकघाटबाट प्रहरीले अवैध साल काठ बरामद गरेको छ।
सोही स्थानका दीपेन्द्र चौधरीले आफ्नै घरको कोठाभित्र अवैध काठ लुकाएर राखेको भन्ने गोप्य सूचनाका आधारमा इलाका प्रहरी कार्यालय बेलडाँडी, कञ्चनपुरबाट खटिएको प्रहरी टोलीले मंगलबार बिहान खानतलासी गरेको थियो।
खानतलासीका क्रममा घरको कोठाभित्र लुकाइछिपाइ राखिएको साल जातको ६४।६७ क्युफिट काठ फेला परेको प्रहरीले जनाएको छ। बरामद काठको अन्दाजी मूल्य ८० हजार ८३७ रुपैयाँ रहेको छ।
प्रहरीले अवैध काठसहित सम्बन्धित व्यक्तिलाई नियन्त्रणमा लिई आवश्यक कारबाहीका लागि कुण्डा सब–डिभिजन वन कार्यालय, कञ्चनपुरको जिम्मा लगाएको जनाएको छ।