गायिका सम्झना पाण्डेको ‘तिम्रो बारे’ गीतको म्युजिक भिडियो सार्वजनिक

कोलोराडो, १ जनवरी ।
गायिका सम्झना पाण्डेको ‘तिम्रो बारे’ गीतको म्युजिक भिडियो बुधवार सार्वजनिक भएको छ ।

अमेरिकाको कोलोराडोमा नर्सिङसंगै गायन क्षेत्रमा सक्रिय पाण्डेले आफ्नो अफिसियल युट्युव मार्फत नयाँ गीतको म्युजिक नयाँ वर्षको पूर्वसन्ध्यामा सार्वजनिक गरेकी हुन् । यो गीतमा गायक प्रताप दासले उनलाई साथ दिएका छन् ।

गीतमा एउटा प्रेमिल जोडीको कथा छ । प्रिय मान्छेको साथ जीवनमा कति महत्व राख्छ, गीतमा उसको महत्व बखान गरिएको  छ ।

कसैको अनुपस्थितिमा भीडमा एक्लो लाग्ने अवस्था नै त प्रेम हो । त्यसैले प्रेमी भन्छन्, तिम्रो बारे सोच्छु जब संसार बेग्लै लाग्छ, हुन्नौ जब भीडमै पनि आफू एक्लो लाग्छ ।

प्रेमिका यति भनेपछि मख्ख । प्रेमिका के कम । फुरुङ्ग हुदै भन्छिन्, तिम्रो साथ पाउदा ममा उमंग थपिन्छ, माग्नु पर्ने, पाउनु पर्ने कुरा नै सकिन्छ ।

आफूले रोजेको अनि खोजेको प्रियजन साथमा भए संसार बेग्लै लाग्ने भयो नै । त्यसपछि माग्नु र पाउनु पर्ने कुरा नै बाँकी रहने कुरा नै भएन् । आखिर सर्वस्व साथमा जो छ ।

र, स्वरमा स्वर मिलाएर दुबै भन्छन्, तिमी बिनाको जीतमा पनि हार भेटाउछु ।

गीतकार डीपी खनालको मिठो गीतलाई पाण्डेको सुरिलो स्वरले स्वरले कर्णप्रीय बनाएको छ । प्रतापले जसमा थपेका छन्, सुगन्ध । कल्याण सिंहको मधुर संगीतले संगीतका पारखीहरुलाई गीतको अन्तिमसम्म डो¥याईरहन्छ ।

प्रदीप जोशीको मिक्सिङ/मास्टरिङ अब्बल छ । म्युजिक भिडियोमा प्रियंका कार्की र विकास लामिछानेको अभिनय उत्कृष्ट छ ।
प्रिया कार्कीले श्रृङ्गारमा साथ दिएकी छन् । पोशाकमा आशिम रानाभाटको योगदान छ ।

म्युजिक भिडियोको नृत्य निर्देशन रोशन विश्वकर्माले गरेका हुन् । उत्सव दाहालले छायांकन गरेको म्युजिक भिडियोको सम्पादन विकास दाहालले गरेका हुन् । जसको निर्देशक राजेश पुमा राई हुन् ।