मोदीका तर्फबाट ओलीलाई भ्रमणकाे निम्तो दिन आउँदै भारतीय विदेश सचिव

काठ्माण्डौँ- प्रधानमन्त्री केपी शर्मा ओलीको भारत भ्रमणको आधिकारिक निम्तो दिन भारतीय विदेश सचिव विक्रम मिस्री नेपाल आउने भएका छन् । भदौको पहिलो साता विदेश सचिव मिस्री नेपाल आउने कार्यक्रम तय भएको परराष्ट्र मन्त्रालयले जनाएको छ ।

मिस्रीको आगमन भदौ अन्तिम साता तय भएको प्रधानमन्त्री ओलीको भ्रमणसँग सम्बन्धित रहेको स्रोतले बतायो। उनले भारतीय प्रधानमन्त्री नरेन्द्र मोदीका तर्फबाट आधिकारिक निम्ता ल्याएर आउन लागेको बताइएको छ ।

परराष्ट्र मन्त्रालयका प्रवक्ता लोकबहादुर पौडेल क्षेत्रीले भारतीय विदेश सचिव मिस्रीको नेपाल भ्रमण तय भएको पुष्टि गरे । उनले भने, ‘विदेश सचिव ज्यु नेपाल आउने कार्यक्रम तय भएको छ। विस्तृत विवरण पछि सार्वजनिक गर्छौँ ।’

पछिल्लो पटक ओली प्रधानमन्त्री भएपछि भारतले नरुचाएको टिप्पणी हुने गरेको छ । सोही कारण प्रधानमन्त्री नियुक्त भएको वर्ष दिन बित्दासमेत भारतले ओलीलाई भ्रमणको निम्तो दिएको थिएन ।

यस पटक भदौ अन्तिम साताका लागि भारतीय प्रधानमन्त्री मोदीले ओलीलाई भ्रमणका लागि निम्त्याएका छन् । तर परराष्ट्र मन्त्रालयले भ्रमण तालिका भने सार्वजनिक गरिसकेको छैन ।