कैलाली जिल्ला कारागारमा कैदीबन्दी बीच झडप 

कैलाली  । कैलाली जिल्ला कारागारभित्र कैदीबन्दीहरूबीच झडप भएको छ ।  प्रहरीका अनुसार कारागारका नाइके खगेन्द्र बोगटीलाई कुटपिट गरिएको छ । बोगटीमाथि भूपेन्द्र बडुवाल हत्या प्रकरणमा पुर्पक्षका लागि थुनामा रहेका कपिल श्रेष्ठको समूहले कुटपिट गरेको हो ।

सूचना पाएपछि जिल्ला प्रहरी कार्यालय कैलालीका प्रमुख एसपी बाल नरसिंह राणा र प्रमुख जिल्ला अधिकारी गोगनबहादुर हमाल कारागार पुगेका थिए । कुटपिट पछि बोगटीलाई उपचारका लागि  सेती प्रादेशिक अस्पताल लगिएको थियो । ठुलो चोटपटक नभएकाले सामान्य उपचारपछि उनलाई फिर्ता ल्याइसकेको  राणले बताए ।

घटनाबारे बुझ्न खोज्दा एसपी राणले घटना सामान्य भएकाले ठुलो मुद्धा नबनाउन आग्रह गरे । उनले भने ‘मान्छेहरू भएको ठाउँमा यस्तो त भइहाल्छ । हामी अनुसन्धान गरिरहेका छौ । यो बिग इस्यु हो जस्तो लाग्दैन मलाई ।’

घटनाको विस्तृत विवरण अहिलेसम्म सार्वजनिक गरिएको छैन। झगडा कसले सुरु गर्‍यो र किन भयो भन्ने विषयमा अनुसन्धान भइरहेको प्रहरीले जनाएको छ।कैलाली कारागारमा पटक पटक यस्ता घटना हुने गरेका छन् । केही दिन अघि मात्रै डडेलधुराको भागेश्वर गाउँपालिका–५ का २८ वर्षीय हरिशसिंह पालीको शङ्कास्पद मृत्यु भएको थियो ।