डा. गोविन्द केसी आजबाट अनसन बस्दै, यस्ता छन् मागहरु

कैलाली । चिकित्सा शिक्षा र स्वास्थ्य क्षेत्रको सुधारका लागि आवाज उठाउँदै आएका अभियन्ता डा. गोविन्द केसी बिहीबार देखि कैलालीको धनगढीमा २४ औँ सत्याग्रह सुरु गर्ने भएका छन्। सरकारले विगतका सम्झौता र आफ्ना मागहरूप्रति  बेवास्ता गरेको भन्दै डा. केसीले धनगढीस्थित कृष्ण मन्दिरको धर्मशालामा दिउँसो ३ बजेदेखि अनसन बताएका छन्।

यसअघि साउन ५ गतेसम्मको समयसीमा दिँदा पनि माग सम्बोधनमा सरकारले कुनै चासो नदेखाएपछि सत्याग्रह सुरु गर्नुपरेको डा. केसीका सहयोगी डा. अमृत जैसीले जानकारी दिए। सत्याग्रहबारे बुधबार जारी गरिएको विज्ञप्तिमा डा। केसीले सरकारको संवेदनहीनताका कारण उत्पन्न हुन सक्ने जुनसुकै जटिल परिस्थितिको  जिम्मेवारी वर्तमान सरकारले लिनुपर्ने स्पष्ट पारेका छन्। नागरिकको स्वास्थ्य अधिकार र गुणस्तरीय चिकित्सा शिक्षाका लागि आफू पुनः सत्याग्रहमा उत्रिन बाध्य भएको उनको भनाइ छ।

यस्ता छन् मागहरु
यसपटकको अनसनमा डा। केसीले विशेष गरी नियुक्तिमा हुने राजनीतिक हस्तक्षेप र स्वार्थको द्वन्द्वलाई मुख्य मुद्दा बनाएका छन्। उनले दशरथ चन्द मेडिकल विश्वविद्यालय र चिकित्सा शिक्षा आयोगमा स्थापित नियम विपरीत गरिएका गैरकानुनी र स्वार्थपूर्ण नियुक्तिहरू तत्काल खारेज गर्दै ऐनका विवादित प्रावधानहरू संशोधन गर्न माग गरेका छन् ।

यस्तै, चिकित्सा शिक्षा आयोगमार्फत विद्यार्थीको छात्रवृत्ति कटौती गर्ने र मापदण्ड नपुगेका निजी कलेजहरूमा सिट वृद्धि गर्ने प्रस्तावलाई समेत तत्काल रोक्नुपर्ने उनको अडान छ। आफ्नो सत्याग्रहका क्रममा  राष्ट्रिय चिकित्सा शिक्षा ऐन, २०७५ को भावना अनुरूप चिकित्सा शिक्षालाई पूर्ण रूपमा गैरनाफामूलक बनाउनुपर्ने र विगतमा सरकारले गरेका लिखित सहमतिहरू इमानदारीपूर्वक कार्यान्वयन गर्नुपर्ने उनको माग छ ।

विशेष गरी सुदूरपश्चिम र सीमावर्ती क्षेत्रका नागरिकहरू स्वास्थ्य, शिक्षा र रोजगारीका लागि छिमेकी मुलुक भारतमा निर्भर हुनुपर्ने बाध्यताको अन्त्य गर्दै स्वदेशमै गुणस्तरीय पूर्वाधार र सेवा विस्तार गरी नागरिकको राष्ट्रिय आत्मसम्मानको रक्षा गर्न उनले सरकारको ध्यानाकर्षण गराएका छन्।

यसका साथै, डा. केसीले सुशासन र न्यायको पक्षमा उभिने क्रममा २०८२ भदौमा भएका जघन्य हत्या र लुटपाटका दोषीहरूलाई कडा कारबाही गर्नुपर्ने माग पनि अघि सारेका छन्। उनले २०४६ सालदेखि हालसम्म उच्च पदमा रहेका राजनीतिज्ञ र पदाधिकारीहरूबाट भएका भ्रष्टाचार तथा अपराधहरूको निष्पक्ष छानबिन गरी दोषीमाथि कारबाही हुनुपर्ने माग पनि उठाएका छन् ।