कुशलको शतकमा नेपालले दियो मलेसियालाई २७६ रनको लक्ष्य

काठमाडौं । ओपनर कुशल भुर्तेलको शतकप्रेरित नेपालले एसियन गेम्स पुरुष क्रिकेट छनोटअन्तर्गत समूह चरणको अन्तिम खेलमा मलेसियासामु २७६ रनको लक्ष्य प्रस्तुत गरेको छ । बिहीबार सिंगापुर नेसनल क्रिकेट ग्राउन्डमा टस हारेर ब्याटिङ गरेको नेपालले निर्धारित २० ओभरमा सात विकेट गुमाएर २७५ रन बनाएको हो ।

कुशलले १२६ रनको उत्कृष्ट इनिङ खेले । ५४ बलको सामना गरेका उनले १४ चौका र आठ छक्का प्रहार गरे ।

ट्वान्टी–२० अन्तर्राष्ट्रियमा कुशलको यो लगातार दोस्रो तथा समग्रमा तेस्रो शतक हो । उनले यही प्रतियोगितामा चीनविरुद्ध पनि शतक प्रहार गरेका थिए । योसँगै उनी टी–२० अन्तर्राष्ट्रियमा लगातार दुई शतक बनाउने पहिलो नेपाली तथा समग्रमा १०औँ खेलाडी बनेका छन् ।

आसिफ शेखले ६८ रनको इनिङ खेले । उनले २४ बलमा सात छक्का र पाँच चौका प्रहार गरे । दीपेन्द्रसिंह ऐरीले ३१, सन्दीप जोराले १५ र लोकेश बमले १० रन जोडे ।

कुशलले पहिलो विकेटका निम्ति आसिफ शेखसँग १३४ र तेस्रो विकेटका लागि दीपेन्द्रसँग ५१ रनको साझेदारी गरेका थिए ।

मलेसियाका वीरनदीप सिंहले तीनm विजय उन्नी र कप्तान सयद अजिजले दुई/दुई विकेट लिए ।

यो खेलबाट समूह ‘ए’को विजेता र उपविजेताको टुंगो लाग्नेछ । खेल जित्ने टोली समूह विजेता हुनेछ । पराजित हुने टोली उपविजेता बन्नेछ ।

पहिलो खेलमा दुवै टोलीले चीनलाई हराएका थिए । नेपालले २२१ रनले पराजित गरेको थियो । मलेसिया नौ विकेटले विजयी भएको थियो । नेपाल र मलेसिया दुवैले एसियन गेम्समा स्थान पक्का गरिसकेका छन् ।

नेपाल र मलेसियाबीच हालसम्म १० ट्वान्टी–२० अन्तर्राष्ट्रिय क्रिकेट खेल भएका छन् । यसमध्ये नेपालले नौ जित र एक हारको नतिजा निकालेको छ ।