लिपुलेकबारे असहमति राखेर मात्रै पुग्दैन, वार्ता गर्नुपर्छ : सांसद

काठ्माण्डौ । सांसदहरूले लिपुलेकबारे सरकारले कूटनीतिक नोट पठाएर मात्रै नपुग्ने टिप्पणी गरेका छन् । बिहीबार प्रतिनिधिसभाअन्तर्गतको अन्तर्राष्ट्रिय सम्बन्ध तथा पर्यटन समितिको बैठकमा विपक्षी सांसदहरूले भूमि फिर्ताका लागि कूटनीतिक पहल गर्नुपर्ने बताए ।

“असहमतिले मात्रै पर्याप्त हुँदैन । जुन भू–भाग मिचेका छन् । फिर्ता लिन कूटनीतिक प्रयास गर्नुपर्छ,” नेपाली कम्युनिस्ट पार्टीका सांसद प्रमेश हमालले भने ।

उनले विगतका सरकारले पनि पटक–पटक कुरा अघि बढाएका स्मरण गरे । राजनीतिक दलसँग सहमति गरेर वार्तामार्फत समस्या समाधान गर्न उनको सुझाव छ ।

सांसद गणेश विश्वकर्माले असंग्न परराष्ट्र नीतिमा अडिग रहनुपर्ने धारणा राखे । “लिपुलेक कालापानीको विषयमा कूटनीतिक नोट पठाएको भनिएको छ । कूटनीतिक नोट ध्यानाकर्षण मात्र हो । वार्तामार्फत समस्या  समाधान गर्नुपर्छ,” उनले भने ।

कांग्रेस सांसद सन्दीप रानाले पनि वार्ताबाटै समस्या समाधान गर्नुपर्नेमा जोड दिए । “लिपुलेकको बारेमा कूटनीतिक नोट पठाइएका छौँ । छिमेकी राष्ट्रले पर्याप्त चासो दिएको छैन । हामीले एक कदम अघि बढेर दुवै देशसँग टेबल टक गर्नुपर्छ,” रानाले भने ।

नेपाली भूमि लिपुलेक हुँदै आयोजना गर्ने भनिएको कैलाश मानसरोवर यात्राबारे सरकारले आफ्नो स्पष्ट अडान र सरोकार भारत–चीन दुवै पक्षलाई कूटनैतिक माध्यमबाट पुनः अवगत गराएको जनाएको थियो । परराष्ट्र मन्त्रालयले दुवै देशलाई ६ बुँदे कूटनीतिक नोट पठाएको थियो ।