बजेटका लागि छलफलमा अर्थ मन्त्रालय

काठमाडौं । आगामी आर्थिक वर्ष २०८२/८३ को बजेट निर्माणको पूर्वसन्ध्यामा अर्थ मन्त्रालयले नौजना विभागीय मन्त्रीहरूसँग मन्त्रालयगत बजेट छलफल गरेको छ ।

आगामी बजेटको खाका, नीति तथा कार्यक्रम, प्रस्तावित बजेट र स्रोत व्यवस्थापनका विषयमा परामर्शका लागि छलफल गरिएको अर्थ मन्त्रालयले जनाएको छ । मन्त्रालयको बजेट तथा कार्यक्रम महाशाखाका अनुसार बाँकी रहेका अन्य मन्त्रालयहरूसँगको बजेट छलफल मंगलबार पनि जारी रहनेछ ।

छलफलको सुरुआत गृह मन्त्रालयबाट गरिएको थियो । त्यसपछि क्रमशः श्रम, रोजगार तथा सामाजिक सुरक्षा, उद्योग, वाणिज्य तथा आपूर्ति, कानुन, न्याय तथा संसदीय मामिला, सञ्चार तथा सूचना प्रविधि, शिक्षा, विज्ञान तथा प्रविधि, युवा तथा खेलकुद, संघीय मामिला तथा सामान्य प्रशासन र भूमि व्यवस्था, सहकारी तथा गरिबी निवारण मन्त्रालयसँग बजेट केन्द्रित संवाद भएको छ ।