लिग २ः नेपालद्वारा ओमानसामु २५७ रनको लक्ष्य प्रस्तुत

आसिफ शेख र अर्जुन कुमालले दोस्रो विकेटका लागि सतकीय साझेदारी गरेपछि आइसिसी पुरुष क्रिकेट विश्वकप लिग २ अन्तर्गत ओमानविरुद्धको खेलमा नेपालले २५७ रनको लक्ष्य प्रस्तुत गरेको छ।

कीर्तिपुरस्थित त्रिवि क्रिकेट मैदानमा टस जितेर पहिला ब्याटिङ गरेको नेपालले निर्धारित ओभर सकिन एक बल बाँकी हुँदा सबै विकेट गुमाएर २५६ रनको योगफल तयार पारेको हो। ओपनर बिनोद भण्डारीलाई शुन्य रनमा गुमाएको नेपालका लागि आसिफ र अर्जुनले दोस्रो विकेटका लागि १२३ रनको साझेदारी गरेका हुन्। आसिफ ९४ र अर्जुन ४८ रनमा आउट भए।

विष्फोटक ब्याटिङ गरेका आरिफ शेखले २४ बलमा ४३ रनको पारी खेले। उनले चार छक्का र एक चौका प्रहार गरे।

कप्तान रोहित पौडेल पनि ९ रनमा आउट भएपछि दाबबमा आएको नेपालका लागि उपकप्तान दीपेन्द्र सिंह ऐरी र गुल्शन झाले ३२ रनको साझेदारी गर्दैै आशा जगाएका थिए। ऐरी ३३ र झा १७ रनमा आउट भए। करण केसी पहिलो बलमा पबेलियन फर्कँदा नन्दन यादव २ र सन्दीप लामिछाने एक रनमा आउट भए। नटआउट रहेका ललित राजवंशीले खातै खोलेनन्।

ओमानका लागि नदीम खानले ३ तथा हसन शाह र शकील अहमदले समान २ तथा आर्यन र जितेन रामानन्दीले समान एक विकेट लिए।

नेपाल, ओमान र युएई सहभागी जारी सिरिजमा नेपाल र युएईले दुई दुई खेलमा जित हासिल गरेका छन्। नेपालले युएईसँगको दुबै खेलमा जित हासिल गरेको छ भने युएईले ओमानलाई दुबै खेलमा हराएका छ। ओमानले आफ्नो पहिलो खेलमा नेपाललाई हराएको थियो। नेपाल र ओमानबीच जारी खेल यो सिरिजको अन्तिम खेल हो।

ओमान ३१ अंकमा तालिकाको तेस्रो स्थानमा छ भने सातौं स्थानमा रहेको नेपालको १६ अंक छ। तालिकाको पुछारमा रहेको युएईको १४ अंक छ।