कैलालीमा तालिमरत सशस्त्र प्रहरी प्रशिक्षार्थीको मृत्यु, अचानक बिरामी परेपछि ज्यान गयो

धनगढीः कैलाली मा सशस्त्र प्रहरीका एक प्रशिक्षार्थी जवानको मृत्यु भएको छ। सशस्त्र प्रहरी बल नेपाल अन्तर्गत बडिमालिका जवान तालिम शिक्षालय बनबेहडा मा तालिमरत महेश महताको उपचारका क्रममा सोमबार बिहान निधन भएको हो।

शिक्षालयका अनुसार आइतबार राति करिब साढे १ बजेतिर टाउको र छाती दुख्न थालेपछि उनलाई उपचारका लागि अत्तरिया स्थित सशस्त्र प्रहरीको फिल्ड अस्पताल लगिएको थियो। त्यहाँ उपचार सम्भव नभएपछि थप उपचारका लागि अत्तरिया अस्पताल पुर्‍याइएको थियो।

उपचारकै क्रममा बिहान साढे ४ बजेतिर उनी बेहोस भएका थिए भने चिकित्सकले करिब सवा ५ बजे मृत घोषणा गरेका थिए।

दार्चुला को नौगाड गाउँपालिका–१ घर भएका महता फागुनदेखि उक्त शिक्षालयमा प्रशिक्षार्थी जवानका रूपमा तालिम लिइरहेका थिए। सशस्त्र प्रहरीले उनी यसअघि पूर्ण रूपमा स्वस्थ रहेको र अचानक बिरामी परेको जनाएको छ।

हाल उनका बुवा दार्चुलाबाट आउँदै छन्। परिवारका सदस्य पुगेपछि मात्र शव परीक्षणलगायत प्रक्रिया अघि बढाइने जनाइएको छ। महताको शव परीक्षणका लागि सेती प्रादेशिक अस्पताल मा राखिएको छ।