फोनपेले सक्यो देशव्यापी वित्तीय साक्षरता अभियान

काठमाडौं । डिजिटल भुक्तानी सेवामा अग्रणी संस्था फोनपेले ‘ग्लोबल मनी वीक २०२६’ को अवसर पारेर देशव्यापी वित्तीय साक्षरता अभियान सफलतापूर्वक सम्पन्न गरेको छ ।

मार्च २३ देखि २९ सम्म सञ्चालन भएको उक्त अभियान ‘स्मार्ट मनी टक्स’ भन्ने मूल सन्देशमा केन्द्रित रहेको थियो ।

फोनपेले अभियानमार्फत युवापुस्तालाई जिम्मेवार वित्तीय व्यवहार, डिजिटल सुरक्षा तथा स्मार्ट आर्थिक निर्णयबारे सचेत बनाउने लक्ष्य राखेको जनाएको छ ।

कार्यक्रमअन्तर्गत विभिन्न शैक्षिक संस्थामा प्रत्यक्ष सहभागितामूलक गतिविधि सञ्चालन गरिएको थियो ।

कम्पनीका अनुसार देशका ४ प्रदेशका ६ सहरमा रहेका १२ कलेजमा १८ वटा सत्र सञ्चालन गरी एक हजार ९० भन्दा बढी विद्यार्थीलाई प्रत्यक्ष रूपमा लाभान्वित गरिएको छ ।

त्यसैगरी पाँच प्रदेशका नौ सहरमा २८ विद्यालयमार्फत चार हजार ९६१ भन्दा बढी विद्यार्थीहरूलाई कार्यक्रममार्फत सहभागी गराइएको थियो ।

कार्यक्रममा मनोरञ्जनात्मक खेल, प्रश्नोत्तर तथा नाटकजस्ता गतिविधिमार्फत विद्यार्थीहरूलाई खर्च व्यवस्थापन, बचत गर्ने बानी तथा सही वित्तीय जानकारीबारे शिक्षित गरिएको थियो । यस्ता क्रियाकलापले सिकाइलाई रोचक र प्रभावकारी बनाएको जनाइएको छ ।

यसै अभियानअन्तर्गत आयोजित विद्यार्थी अवलोकन कार्यक्रममा काठमाडौं उपत्यकाका ४० भन्दा बढी विद्यार्थीलाई फोनपे कार्यालयमा आमन्त्रण गर्दै अन्तरक्रियात्मक खेल तथा डिजिटल भुक्तानी र वित्तीय सुरक्षासम्बन्धी व्यवहारिक जानकारी प्रदान गरिएको थियो ।

डिजिटल माध्यमबाट पनि अभियानलाई विस्तार गर्दै छोटा नाट्य भिडियो, संवाद आधारित सामग्री, मनोरञ्जनात्मक सामग्री, प्रश्नोत्तर तथा ‘स्मार्ट मनी टिप्स’ मार्फत व्यापक जनचेतना फैलाइएको कम्पनीले जनाएको छ ।

फोनपेले सुरक्षित र जिम्मेवार डिजिटल अर्थतन्त्र निर्माणमा आफ्नो प्रतिबद्धता दोहोर्‍याउँदै यस्ता वित्तीय साक्षरता अभियानलाई आगामी दिनमा पनि निरन्तरता दिने जनाएको छ ।