सुनको मूल्य चार हजार ३०० रुपैयाँले घट्यो

नेपाली बजारमा सुन र चाँदीको मूल्यमा बिहीबार ठुलो गिरावट आएको छ। नेपाल सुनचाँदी व्यवसायी महासंघका अनुसार सुनको मूल्य तोलामा चार हजार ३०० रुपैयाँ र चाँदीको मूल्य तोलामा १५० रुपैयाँले घटेको छ।

महासंघले सार्वजनिक गरेको विवरण अनुसार बुधबार सुनको मूल्य दुई लाख ९९ हजार रुपैयाँ कायम भएकोमा आज बिहीबार घटेर दुई लाख ९४ हजार ७०० रुपैयाँ पुगेको छ।

यस्तै, चाँदीको मूल्यमा पनि गिरावट देखिएको छ। बुधबार पाँच हजार २५ रुपैयाँमा कारोबार भएको चाँदी बिहीबार घटेर चार हजार ८७५ रुपैयाँ कायम भएको छ।

पछिल्लो समय अन्तर्राष्ट्रिय बजारमा आएको उतारचढावका कारण स्थानीय बजारमा पनि मूल्य प्रभावित भएको व्यवसायीहरूले बताएका छन्।

अन्तर्राष्ट्रिय सञ्चारमाध्यमहरूका अनुसार आज अन्तर्राष्ट्रिय बजारमा एक औँस सुन चार हजार ७१३ र त्यति नै परिमाणको चाँदी ७३ अमेरिकी डलरमा कारोबार भइरहेको छ।