प्रधानमन्त्री कप क्रिकेट : एपीएफले पायो १०८ रनको सामान्य लक्ष्य

वीरगन्ज-  प्रधानमन्त्री कप पुरुष राष्ट्रिय क्रिकेट प्रतियोगितामा कर्णाली प्रदेशले विभागीय टोली एपीएफ क्लबलाई १०८ रनको लक्ष्य प्रस्तुत गरेको छ ।

जनकपुरधामस्थित रामजानकी मैदानमा शनिबार टस जितेर सुरुवाती ब्याटिङ गरेको कर्णालीले ३६ ओभरमा सबै विकेट गुमाएर १०७ रन जोडेको हो ।

कर्णालीका लागि विकेट किपर ब्याट्सम्यान अर्जुन घर्तीले अविजित रहँदै सर्वाधिक ३८ रन बनाए । ७३ बल खेलेका अर्जुनले तीन चौका प्रहार गरे । दीपेन्द्र रावतले २५, ओपनर रवीन्द्र शाहीले १८ र सुनिल धमलाले १७ रन बनाउँदा अरु ब्याटर चलेनन् । निश्चल रावल र विपिन रावल शून्यमै पेभेलियन फर्किए भने बिपिन शाहीले एक रन बनाए ।

कर्णालीलाई सस्तैमा समेट्ने क्रममा एपीएफका कमल ऐरी र अभिषेक गौतमले समान चार÷चार विकेट लिए । कप्तान रोहित पौडेलले एक विकेट हात पारे ।

कर्णालीले दिएको लक्ष्य पछ्याउन एपीएफ केहीबेरपछि मैदानमा उत्रनेछ । जारी प्रतियोगितामा एपीएफ सातौं स्थानमा र कर्णाली आठौं स्थानमा छ । दुवै टोलीको समान तीन अंक छ ।