इरानमा चलिरहेको सैन्य कारवाही सफलता नजिक : ट्रम्प

काठमाण्डौ- अमेरिकी राष्ट्रपति डोनाल्ड ट्रम्पले इरानसँग चलिरहेको सैन्य कारबाही सफलताको नजिक पुगेको दाबी गरेका छन् । ह्वाइट हाउसबाट देशका नाममा विशेष सम्बोधन गर्दै ट्रम्पले अमेरिकी सैन्य उद्देश्य पूरा हुने क्रममा रहेको र निकट भविष्यमा पूर्णता दिने बताए ।

ट्रम्पले अबको २र३ हप्ता अमेरिकाले इरानमाथी कडा आक्रमण गर्ने र लक्ष्य पूरा गर्ने चेतावनी दिएका छन् । उनले इरानी नौसेना समाप्त भएको, वायुसेना भग्नावशेषमा परिणत भएको, आणविक कार्यक्रम ध्वस्त पारेको दाबी गरेको बीबीसीले जनाएको छ ।

ट्रम्पका अनुसार इरानको मिसाइल र ड्रोन प्रहार गर्ने क्षमता अहिले व्यापक रूपमा कटौती भएको छ । क्षेत्रीय सुरक्षाका विषयमा ट्रम्पले इजरायल र खाडी देशहरुलाई अमेरिकाले कहिल्यै असफल हुन नदिने आश्वासन पनि दिएका छन् ।

साथै, उनले सहयोगी देशहरुलाई हर्मुज जलसन्धिको सुरक्षाका लागि आफैँ अघि बढ्न आग्रह गरेका छन्  । गएको फेब्रुअरी २८ तारिखमा अमेरिका र इजरायलले इरानमा संयुक्त आक्रमण शुरू गरेका थिए । जसमा इरानका सर्वोच्च नेता अली खामेनी मारिएपछि मध्यपूर्वमा द्वन्द्व चर्किएको हो ।