प्रधानमन्त्रीको सांसदसँग ‘प्रदेशवाइज’ छलफल : साम्पाङले भने- कोठे बैठकमा आउँदैनौँ

प्रधानमन्त्री बालेन्द्र शाहले मन्त्रीहरूसँगको छलफलपछि सोमबारबाट सांसदहरूसँग प्रदेशगत छलफल थालेका छन्। प्रधानमन्त्री कार्यालयका अनुसार हाल कर्णाली प्रदेशका सांसदहरूसँग छलफल भइरहेको छ।

यसैबिच, श्रम, संस्कृति पार्टीका अध्यक्ष तथा कोशी प्रदेशबाट सांसद हर्क साम्पाङले प्रधानमन्त्रीले बोलाएको बैठकमा सहभागी नहुने बताएका छन्। प्रतिनिधिसभा बैठक बोलाउन माग गर्दै उनले सामाजिक सञ्जालमा भनेका छन्, ‘प्रधानमन्त्रीले सदन बोलाउन पहल नगरी कोठे बैठकमा बोलाएको कारण थाहा भएन। हामी आउँदैनौँ।’

उनले अगाडि थपेका छन्, ‘सदन बैठक कम्तीमा हप्ताको एक पटक राख्नुपर्छ। जनताका प्रश्नबाट भाग्न पाइँदैन, सबै प्रश्नको उत्तर दिनैपर्छ।’

आज प्रधानमन्त्रीले अन्य प्रदेशका सांसदहरूसँग पनि छलफल गर्दैछन्। सोही अनुसार श्रम, संस्कृति पार्टीलाई पनि निम्तो पठाएको थियो।