भ्रष्टाचार मुद्दामा पूर्वसांसद चालिसेलाई पाँच लाख धरौटीमा छाड्न आदेश

भ्रष्टाचारको आरोप लागेका नेपाली कांग्रेसका निवर्तमान सांसद सन्तोष चालिसेलाई विशेष अदालतले पाँच लाख रुपैयाँ धरौटीमा छाड्न आदेश दिएको छ। सोमबार विशेष अदालत काठमाडौँमा भएको सुनुवाइपछि न्यायाधीश नारायणप्रसाद पौडेल र विदुर कोइरालाको इजलासले पुर्पक्षका लागि उक्त धरौटी रकम तोकेको हो।

अख्तियार दुरुपयोग अनुसन्धान आयोगले चालिसेविरुद्ध गैरकानुनी सम्पत्ति आर्जन गरेको आरोपमा मुद्दा दायर गरेको थियो। सोही मुद्दाको प्रक्रिया अन्तर्गत उनी सोमबार अदालतमा उपस्थित भएका थिए। अदालतले प्रारम्भिक सुनुवाइपछि उनलाई धरौटीमा रिहा गर्न आदेश दिएको हो।

अख्तियारको दाबीअनुसार चालिसेले गोकर्णेश्वर नगरपालिकाको मेयर पदमा रहँदा आफ्नो आम्दानीभन्दा धेरै सम्पत्ति आर्जन गरेका थिए। अनुसन्धानमा उनको परिवारको वैधानिक आम्दानीभन्दा करिब तीन करोडभन्दा बढी रकमको स्रोत पुष्टि हुन नसकेको उल्लेख गरिएको छ।

चालिसे २०७४ देखि २०७९ सालसम्म गोकर्णेश्वर नगरपालिकाका मेयर थिए। त्यस अवधिमा उनको तथा परिवारका सदस्यहरूको आय–व्ययको विवरण अध्ययन गर्दा ठूलो रकम बराबरको खर्च र लगानी देखिएको अख्तियारको आरोपपत्रमा उल्लेख गरिएको छ।

यता चालिसेले भने आफूविरुद्ध लगाइएका आरोप अस्वीकार गर्दै देखाइएको रकममध्ये धेरै हिस्सा ऋण र सापटीबाट आएको दाबी गरेका छन्। उनले त्यससम्बन्धी कागजातसमेत अख्तियारसमक्ष पेस गरेको बताइएको छ।

अदालतको आदेशसँगै चालिसे धरौटी बुझाएर रिहा हुन पाउने भएका छन् भने भ्रष्टाचारसम्बन्धी मुद्दाको थप सुनुवाइ आगामी दिनमा जारी रहनेछ।