एनआरएनए अमेरिकाद्वारा सगरमाथा आरोही निमा सम्मानित
कोलोराडो(अमेरिका), २६ फागुन ।
अन्तर्राष्ट्रिय महिला दिवसका अवसरमा गैर आवासीय नेपाल संघ(एनआरएनए) एनसीसी अमेरिकाले सगरमाथा आरोही निमा डोमा शेर्पालाई सम्मान गरेको छ ।
निमा सगरमाथा आरोहण गर्ने एकल महिला हुन् । जसले आफ्नो पतिको सगरमाथा आरोहण गर्ने अधुरो सपना पुरा गरिन् । उनको त्यही साहस र प्रेरणादायी योगदानको कदर गर्दै एनआरएनए एनसीसी अमेरिकाले सम्मान गरेको हो ।
१८ अप्रिल २०१४ को बिहान करीव ६ बजेर ३० मिनेट जाँदा सगरमाथाको चुचुरोमा उक्लिदै गरेको १६ जना आरोहीको टोली १९ हजार फिटस्थित ‘खुम्बु आइसफल’ ले पुरियो । सगरमाथाकै काख खुम्जुङमा जन्मिएका छिरिङ ओङ्चु त्यही हिमपहिरोमा अस्ताए । हिम पहिरोमा पुरिएर मृत्यु भएका छिरिङ ओङ्चु निमा डोमा शेर्पाका पति थिए ।
निमाका बुवा आङ्छुवी शेर्पाले १९९३ मा सगरमाथा आरोहण गरिसकेका थिए । उनका पति ओङ्चुले ससुरा आङ्छुवीको पद्चाप पछ्याए ।
सगरमाथामाथि बिजय हात पार्न घरबाट विदावारी भएर निस्किएका उनका पति १८ अप्रिल २०१४ को विहान सूर्योदय नहुदै हिउँमा अस्ताए । ओङ्चुको सगरमाथाको टाकुरामा टेक्ने सपना र जीवन हिमपहिरोमा अस्ताएको त्यो उनको जीवनको कालो दिन थियो ।
पति बियोगमा दुई वर्षभन्दा बढि समय रोएर बिताएकी निमाले त्यसपछि आफूलाई सम्हालिन् । उनले सगरमाथाको चुचुरोमा टेक्ने पतिको अुधरो सपनालाई पुरा गर्ने अठोट गरिन् । र, विभिन्न संघसंस्थाको सहयोगमा हिमाल आरोहणको प्रशिक्षण लिईन् । र पतिको मृत्यु भएको पाँच वर्षमा २३ मे २०१९ मा उनले सगरमाथाको चुचुरोमा पाईला टेकिन ।
उनको यो साहस र सफलताको कथा उनी जस्तै अरु थुप्रै सगरमाथा आरोही शेर्पाका एकल महिलाहरुका लागि मात्र नभएर सम्पूर्ण महिलाहरुका लागि प्रेरणादायी छ ।
अन्तर्राष्ट्रिय महिला दिवसका अवसरमा आईतवार नेपाली घरमा आयोजित कार्यक्रममा कोलोराडो राज्य सभा सदस्य केनी न्यूयाङ र वेष्टमिनिष्टर नगरकी मेयर क्लेरा कार्मेलियाले प्रेरणादायी सगरमाथा आरोही शेर्पालाई प्रशंसा पत्र प्रदान गरेकी थिईन् ।
एनआरएनए एनसीसी अमेरिकाले सगरमाथा आरोही शेर्पा सहित बिभिन्न बिधा र क्षेत्रमा योगदान पु¥याउने प्रेरणादायी नौ जना महिलालाई सम्मान गरेको हो ।
सगरमाथा आरोही शेर्पा सहित ओलम्पियन निष्मा गुरुङ, महिला उद्यमी तथा समाजसेवी दिल कुमारी श्रेष्ठ, डा. शारदा काफ्ले त्रिपाठी, समाजसेवी मीना पौडेल, गायिका निर्मला श्रेष्ठ, लेखिका प्रमिला शर्मा, समाजसेवी उत्तरा श्रेष्ठ, उद्यमी तथा सांस्कृतिक दूत मिना मास्केलाई सम्मान गरिएको थियो ।
एनआरएनए कोलोराडो च्याटर र नेपाल वुमन थ्राईभ(एनडब्लुटी) को सहकार्यमा आयोजित कार्यक्रम एनआरएनए कोलोराडो च्याप्टरकी महिला उपाध्यक्ष नमुना गैरको अध्यक्षतामा सम्पन्न भएको थियो ।
ट्रेन्डिङ
सम्बन्धित
