कञ्चनपुरका ७९ मतदान केन्द्रमा ‘सिसिटिभी’ जडान

कञ्चनपुर- आसन्न प्रतिनिधिसभा सदस्य निर्वाचनलाई स्वच्छ, निष्पक्ष र मर्यादित बनाउन कञ्चनपुरका ७९ मतदान केन्द्रमा सिसिटिभी क्यामेरा जडान गरिएको छ । कञ्चनपुरका प्रमुख जिल्ला अधिकारी मदन कोइरालाले जिल्लाका तीन निर्वाचन क्षेत्रमा रहेका एक सय ३२ वटा मतदान केन्द्रमध्ये ७९ मतदान केन्द्रमा सिसिटिभी क्यामेरा जडान गरिएको जानकारी दिए ।
त्यसैगरी यहाँका ६६ मतदान स्थललाई अतिसंवेदनशील सूचीमा राखिएको छ । सुरक्षाका दृष्टिकोणले मतदान स्थललाई अतिसंवेदनशील, संवेदनशील र सामान्य गरी तीन तहमा वर्गीकरण गरी यसैअनुरुप सुरक्षाको व्यवस्था मिलाइएको प्रशासनले जनाएको छ । एक सय ३२ मतदान स्थलमध्ये ६६ वटा मतदान स्थललाई अतिसंवेदनशील, ४० वटा मतदान स्थल संवेदनशील र २६ मतदान स्थललाई सामान्यको सूचीमा राखेर सुरक्षा व्यवस्था मिलाइएको छ ।
कञ्चनपुर जिल्ला भारतसँग सीमा जोडिएका कारण पनि अतिसंवेदनशील मतदानस्थलको सङ्ख्या बढी छ । मतदानस्थलको सुरक्षा व्यवस्थालाई चुस्त दुरुस्त बनाउनका लागि तीन तहको सुरक्षा घेराको निर्माणको योजना अघि सारिएको छ । तीन निर्वाचन क्षेत्र रहेको जिल्लामा निर्वाचन क्षेत्र नम्बर १ मा ३४ अतिसंवेदनशील मतदान स्थल छन् भने १४ संवेदनशील र चार मतदान केन्द्र सामान्य छन् ।
त्यसैगरी क्षेत्र नम्बर २ मा १७ अतिसंवेदनशील मतदान स्थल छन् । तेह्र वटा संवेदनशील र १३ सामान्य मतदान स्थल छन् । निर्वाचन क्षेत्र नम्बर ३ मा १५ अतिसंवेदनशील,१३ संवेदनशील र नौ वटा सामान्य मतदान स्थल रहेका जनाइएको छ ।