तिङ्कर नाका नियमित सञ्चालन प्रतिबद्धता

दार्चुला । नेपाली कम्युनिस्ट पार्टी (नेकपा) दार्चुलाका उम्मेदवार लक्ष्मणदत्त जोशीले प्रतिनिधि सभा निर्वाचनमा आफू र आफ्नो पार्टीले जित हासिल गरे चीनको ताक्लाकोटसँग जोडिएको तिङ्कर नाकालाई नियमित रूपमा सञ्चालन गर्ने पहल प्रतिबद्धता गर्नुभएको छ ।

अन्य दलभन्दा केही ढिलो गरी घोषणापत्र सार्वजनिक गर्नुभएका उहाँले तिङ्कर नाका नियमित रूपमा सञ्चालन गर्न आवश्यक पर्ने अध्यागमन कार्यालय स्थापनाका लागि आवश्यक थप पहल गर्ने प्रतिबद्धता जनाउनुभएको हो । हिन्दु धर्मावलम्बीको सबैभन्दा ठुलो तीर्थस्थलका रूपमा रहेको कैलाश मानसरोवर यात्राका लागि तिङ्कर नाका सबैभन्दा छोटो रुटका रूपमा रहेको भन्दै उहाँले यो नाकालाई विकास गर्दै लैजाने प्रतिबद्धता व्यक्त गर्नुभएको छ । हाल यो नाका बन्द अवस्थामा छ ।

नेकपाले यहाँको हिमालमा पाइने बहुमूल्य हिमाली जडीबुटी यार्चागुम्बालगायतका जडीबुटीको दिगो व्यवस्थापन गरी स्थानीयको रोजगारी सुनिश्चित गर्ने घोषणापत्रमार्फत प्रतिबद्धता जनाएको छ ।

टेलिफोन टावरमा विद्युतीकरण गर्दै प्रत्येक बस्तीमा गुणस्तरीय फोन सेवा र इन्टरनेट सेवा उपलब्ध गराउने, लक्षितवर्गका अधिकार सुनिश्चित गर्न र पहुँचमा बृद्धि गर्ने, लक्षितवर्गको बजेटमार्फत कार्यक्रम कार्यान्वयनमा ल्याउने सो पार्टीले सार्वजनिक गरेको घोषणापत्रमा उल्लेख छ ।

महाकाली र चमेलियाका सहायक नदीमा निजी क्षेत्र तथा सरकारी क्षेत्रबाट जलविद्युत् उत्पादनमा जोड दिई आगामी पाँच वर्षमा पाँच सय मेगावाट विद्युत् उत्पादनका लागि अग्रसरता गर्ने भनिएको छ । उच्च हिमाली भेगका उत्पादनलाई प्याकेजिङ तथा ब्रान्डिङ गरी ठुला सहरसम्म पु¥याउन बजेटको व्यवस्था गर्ने तथा बलाँचदेखि भारतको जौलजिवीसम्मको ट्रान्समिसन लाइन आगामी दुई वर्षभित्र निर्माण सम्पन्न गर्न पहल गर्ने प्रतिबद्धता गरिएको उम्मेदवार जोशीले बताउनुभयो ।

महाकाली, चमेलिया र सहायक नदीले कटान गरेका क्षेत्रमा आवश्यक तटबन्धन निर्माण गर्ने, गोकुलेश्वर बजार क्षेत्रलाई सुरक्षित गर्न चौलानी नदीमा पक्की तटबन्ध निर्माण गर्ने, सीमा सुरक्षाका साथै वनजङ्गल फँडानी रोक्न त्रिदेशीय सीमा क्षेत्र व्यास गाउँपालिका–१, कौवामा सुरक्षा व्यवस्थापन गर्न आवश्यक पहल गर्ने घोषणापत्रमार्फत प्रतिबद्धता गरिएको उहाँले बताउनुभयो ।

राष्ट्रिय प्रजातन्त्र पार्टी (राप्रपा) दार्चुलाले निर्माणाधीन दार्चुला–तिङ्कर सडक तथा महाकाली कोरिडोरलाई छिटो सम्पन्न गर्न पहल गर्ने, कालापानी लिम्पियाधुरा क्षेत्रलाई कूटनीतिक पहलमार्फत फिर्ता ल्याउने घोषणापत्रमार्फत प्रतिबद्धता जनाएको छ । राप्रपाका उम्मेदवार राजेश चन्दले गोकुलेश्वर विमानस्थललाई सञ्चालनमा ल्याउन पहल गर्ने, दीनदुःखी तथा असहायको सहयोगका लागि आफूले पाउने पारिश्रमिकको ५० प्रतिशत रकम जम्मा गरी अक्षयकोष खडा गर्ने घोषणापत्रमा प्रतिबद्धता जनाउनुभएको छ ।

जिल्ला अस्पतालाई स्तरोन्नति गर्दै सम्पूर्ण सुविधासहितको विशेषज्ञ अस्पताल बनाउने, गरिब र विपन्न वर्गका लागि निःशुल्क आकस्मिक सेवा सुनिश्चत गर्ने, दुर्गमका स्थानमा खाद्यान्न डिपोमार्फत सुपथ मूल्यमा खाद्यान्न उपलब्ध गराउने भनिएको छ । भ्रष्टाचारलाई शून्य सहनशीलताका साथ अन्त्य गर्ने, लागुऔषध दुव्र्यसनीमुक्त समाज बनाउने र व्यासको दुम्लिङ र नौगाडको नागु क्षेत्रको बाटो, स्वास्थ्य, रोजगारी र पूर्वाधारमा गरिएको व्यवस्थाको अन्त्य गर्ने प्रतिबद्धता गरिएको उहाँले बताउनुभयो । रास्वापा दार्चुलाले हालसम्म घोषणापत्र सार्वजनिक गरेको छैन ।

नेपाली कांग्रेसबाट धर्मानन्द जोशी, नेपाल कम्युनिस्ट पार्टी (एमाले) बाट गणेशसिंह ठगुन्ना, राष्ट्रिय स्वतन्त्र पार्टीबाट राजेश सिंह सामन्त (साउद) ले उम्मेदवारी दिनुभएको छ ।