धनगढीमा केयरटेकर अस्पताल सञ्चालनमा

धनगढी । धनगढीका बासिन्दाहरूलाई सरकारी अस्पतालभन्दा सस्तो र निजी अस्पतालभन्दा सुलभ स्वास्थ्य सेवा उपलब्ध गराउने उद्देश्यले केयरटेकर अस्पताल सञ्चालन सुरु भएको छ। अस्पतालका अध्यक्ष गोपाल बहादुर शाहीले मंगलबार पत्रकार सम्मेलन आयोजना गरी उद्घाटन गरेका हुन् ।

उनले सरकारी अस्पतालमा भीडभाड र निजी अस्पतालमा महँगो उपचारले ग्रस्त नागरिकको समस्या समाधान गर्ने उद्देश्यले अस्पताल सञ्चालनमा ल्याएको बताए । “यहाँ उपचार खर्च सरकारी अस्पताल सरह, तर सेवा निजी अस्पताल स्तरको छ,” उनले भने ।

नयाँ सञ्चालनमा आएको अस्पतालमा १०० बेड क्षमता, अत्याधुनिक मोड्युलर अपरेसन थिएटर र २४ घण्टे इमर्जेन्सी सेवा उपलब्ध रहेको उनले बताए । सामान्य चिकित्सा, प्रसूति, हाडजोर्नी, छाला रोग, नाक-कान-घाँटी, दन्तचिकित्सा, फिजियोथेरापी, सामान्य र ल्याप्रोस्कोपिक सर्जरी लगायतका विशेषज्ञ सेवा र डिजिटल एक्स-रे, अल्ट्रासाउन्ड जस्ता परीक्षण सुविधा रहेको छ। अस्पतालमा एयरकन्डिसन, पर्याप्त पार्किङ र हरियाली वातावरणको पनि व्यवस्था गरिएको छ।

अस्पतालले निकट भविष्यमा सिटी स्क्यान सुविधा थप्ने, भेन्टिलेटरयुक्त एम्बुलेन्स ल्याउने र आइभिएफ कार्डियोलोजी र क्यान्सर विभाग सञ्चालन गर्ने योजना बनाएको छ। साथै, नर्सिङ कलेज सुरु गरी स्वास्थ्य शिक्षा र दक्ष जनशक्ति उत्पादन गर्ने लक्ष्य राखिएको छ। सामाजिक दायित्व अन्तर्गत ग्रामीण क्षेत्रमा निःशुल्क स्वास्थ्य शिविर पनि सञ्चालन गरिने छ। शाहीले बिरामीलाई सम्मानपूर्वक सेवा, उपचारमा पारदर्शिता र मानव जीवनलाई प्राथमिकता दिने प्रतिबद्धता जाहेर गरे।